JUDITHI 6

₁Musi mukosi wa gogo ḽa vhathu vho tangaho khoro u si tsha pfala. Holofenese mulangammbi muhulwane wa mmbi ya Vhaashuru a vhudza Akhioro zwi tshi pfiwa nga vhathu vha dzulaho khunzikhunzini ya lwanzhe na vha Muaba na Vhaamoni, a ri, ₂“Iwe Akhioro u nnyi u tshi vho ḓiita muporofita wa ri ri songo lwa na Vhaisraele ngauri Mudzimu wavho u ḓo vha tsireledza? Hu na mudzimu ufhio arali e si Nebukhadinetsara fhedzi? Ene muṋe u ḓo sumbedza maanḓa awe a vha swiela vha si tsha vha hone ḽifhasini. Mudzimu wavho a nga si vhuye a vha lamukisa. ₃Riṋe vhalanda vha Nebukhadinetsara ri ḓo vha lozwa ra nga ri khou lwa na munna muthihi, ngauri vha nga si kone u imedzana na mmbi yashu ya vhanameli vha dzibere. ₄Ri ḓo vha fhisa vhoṱhe. Thavha dzi ḓo kambiwa nga malofha avho, midavhi ya ḓala zwitumbu zwavho. Vha nga si imedzane na riṋe, vhoṱhe vha ḓo lovha. Khosi Nebukhadinetsara, muṋe wa ḽifhasi ḽoṱhe u ralo, o zwa maipfi awe, a nga si wele fhasi. ₅A vha iwe Akhioro, murendelwa wa Muamoni, nge wa sokou amba maipfi aya u sa londi, u bva ṋamusi a u tsha ḓo dovha wa vhona tshifhaṱuwo tshanga, ndi sa athu lifhedza lushaka ulu lwa vhathu vha no bva Egipita. ₆Zwino musi ndi tshi vhuya, banga ḽa mmbi yanga na pfumo ḽa vhalanda vhanga ḽi ḓo u runga lurumbu. Zwenezwo ndi tshi dia Israele, na iwe u ḓo rambalala vhukati ha khuvhabvu dzavho. ₇Zwino vhalanda vhanga vha ḓo u fhelekedza shangoni ḽa dzithavha, vha u sia muḓini muṅwe tsini na dziphara. ₈A u nga fi u woṱhe, u ḓo lozwiwa navho. ₉Arali vhukuma mbilu yau i tshi kha ḓi fulufhela uri a vha nga thubiwi, izwo u songo ṱungufhala nga u ralo! Ndi hone ndo amba, maipfi anga ha nga weli fhasi.”

₁₀Ndi hone Holofenese a tshi vhudza vhalanda vhe vha vha vha tshi mu shumela denndeni yawe uri vha fare Akhioro, vha mu ise Bethulia, vha mu ṋee Vhaisraele. ₁₁Ndi hone vha tshi mu fara vha mu bvisa mishashani a bvela mudavhini. U bva henefho vha mu endedza vho livha shangoni ḽa dzithavha vha vhuya vha swika tshisimani nga fhasi ha Bethulia. ₁₂Musi vhanna vha afho muḓini vha tshi vha vhona vha fara zwihali zwavho vha gidima vha bvela nnḓa ha muḓi vha livha muṱumbani wa thavha. Vhaposi vha gatho vhoṱhe vha posa avho vhalanda vha Holofenese nga matombo uri vha si gonye. ₁₃Ndi hone avho vha tshi dzumbama nga fhasi ha thavha, vha vhofha Akhioro, vha mu sia o lala tsindeni ḽa thavha, vha humela ha muṋe wavho.

₁₄Vhaisraele vha tsela khae vha tshi bva muḓini wavho, vha mu vhofholola, vha mu dzhenisa Bethulia, vha mu khwikhwidzela phanḓa ha vhahulwane vha muḓi. ₁₅Misi iyo vhahulwane vha muḓi vho vha vhe Uzia murwa wa Mika wa tsinde ḽa Simoni, na Khabrisi murwa wa Gothoniele, na Kharamisi murwa wa Melekhiele. ₁₆Avho vho kuvhanganya vhahulwane vhoṱhe vha muḓi, na vhaṱhannga vhavho vhoṱhe, khathihi na vhasadzi, vha ṱavhanya vha ya tshivhidzoni. Vha vhea Akhioro vhukati ha gogo, Uzia a mu vhudzisa zwoṱhe zwe zwa itea. ₁₇Akhioro a fhindula nga u vha anetshela zwe zwa ambiwa khoroni ya Holofenese, na zwoṱhe zwe ene a amba hu na magota a Vhaashuru, na zwe Holofenese a zuwa a ri u ḓo ita nnḓu ya Israele.

₁₈Vhathu vha tshi pfa zwenezwo vha wela fhasi vha shuvhama, vha luvha Mudzimu vha ṱavha mukosi vha ri, ₁₉“Muṋe washu, Mudzimu wa makoleni, edzou vhona u ḓihudza havho; ri pfele vhuṱungu u tshi vhona u nyadziwa hashu, ṋamusi u sedze nga vhuthu zwifhaṱuwo zwa avho vho kumedzwaho Iwe.” ₂₀Ndi hone vha tshi ri Akhioro a rudze mbilu, vha mu khoḓa zwihulu. ₂₁Musi tshivhidzo tsho no bva, Uzia a mu dzhia a mu isa muṱani wawe, a itela vhahulwane vhuṱambo. Vhusiku honoho hoṱhe vha lala vha tshi rabela Mudzimu wa Israele uri a vha farise.