JAKOPO 3

₁Vha hashu, ni songo ḓiita vhafunzi noṱhe; a ni zwi ḓivhi uri ṱhamu ya riṋe vhafunzi i ḓo vhavha u fhira ya vhaṅwe naa? ₂Roṱhe ri anzela u khakha. Arali hu na muthu a sa vhuyi a khakha nga u amba, onoyo ndi muvhuya o khunyelelaho, u kona u langa na muvhili wawe woṱhe. ₃Bere ri i ambadza ḓomu uri ri i ise hune ra funa, ra vho langa muvhili wayo woṱhe nga heyo ḓomu. ₄Edzonu vhona na zwikepe: na u hula hazwo zwi tshi khadiwa nga maḓumbu mahulu, zwi ḓi tshimbidzwa nga tshitshimbidzi tshiṱukuṱuku zwa ya hune mutshimbidzi a funa. ₅Lulimi na lwone lwo tou ralo: ndi muraḓo muṱuku, hone lu zuwa zwihulu zwine lwa ita.

Edzonu vhona uri ṱhase nthihi i nga fhisa dzanda ḽingafhani ḽa khuni. ₆Lulimi na lwone ndi mulilo, lu imela shango ḽoṱhe ḽa vhuvhi mivhilini yashu. Lu shata muvhili woṱhe tshika; lu funga vhutshilo hashu hoṱhe nga mulilo, lwone lwó fungwa heleni. ₇Phukha ya lushaka luṅwe na luṅwe i a fuiwa, na zwiṋoni, na ṋowa, kana khovhe, zwoṱhe zwi nga gudiswa nga muthu. ₈Lulimi lwone a hu na ane a nga lu kona. Ndi tshithu tshivhi tshi sa konei, tsho ḓalaho tshiganame. ₉Ndi lwone lune ra renda ngalwo Muṋe wa zwoṱhe Khotsi ashu, ra dovha ra teketela ngalwo vhathu vhe Mudzimu a vha sika a tshi ḓifanyisa, ₁₀mulomo u wonoyo muthihi wa shudufhadza wa dovha wa teketela muthu. Hezwo a si zwone vha hashu. ₁₁Maḓi avhuḓi na a muṋo a nga ela a tshi bva tshisimani tshithihi naa? ₁₂Vha hashu, nṋa muhuyu u a aṋwa nyolivi? kana munḓirivhe wa aṋwa mahuyu? Sa zwenezwo tshisima tsha maḓi a muṋo tshi nga si bveledze maḓi-maḓi.

₁₃Arali hu na muṅwe waṋu a na vhuṱali na ṱhalukanyo, onoyo kha a sumbedze mishumo yawe nga kutshilele kwawe ku tamisaho, kwa vhulenda vhu bvaho kha vhuṱali. ₁₄Hone arali ni na muya wa u pikisana nga vhuhali na vivho, zwi laṱeni ni si tsha hanedza ngoho nga maṱaṱa na mazwifhi aṋu. ₁₅Vhuṱali ho raloho a vhu bvi kha Mudzimu, ndi ha shango, ndi ha tsiko mmbi ya muthu, ndi ha diabolo. ₁₆Hu re na muya wa u pikisana nga vivho, zwi vusa mifhirifhiri zwa ḓisa zwo vhifhaho zwa tshakha-tshakha. ₁₇Hone vhuṱali vhu bvaho kha Mudzimu tsha u ranga ho kuna, nahone vhu na mulalo, vhu na vhuthu, vhu ṱanganedza mihumbulo ya muṅwe, vhu na tshilidzi tshihulu na mishumo mivhuya minzhi, a vhu na tshiṱalula, a vhu na muhoyo. ₁₈Mulalo ndi tshikovha tsha vhuvhuya, vhu kaṋiwa nga vhaladzashango.