JAKOPO 1

₁Ndi nṋe Jakopo muḓinḓa wa Mudzimu na wa Muṋe washu Yesu Khristo. Ndi ṅwalela matsinde a 12 a Israele o balanganaho na shango. Ndi a ni resha ndi ri ni vhe hone.

₂Vha hashu, musi ni tshi lingiwa nga nḓila nnzhi ni vhone e mashudu fhedzi; ₃ngauri na vhona lutendo lwaṋu lu sa dzinginyei, ndi hone no wana nungo dza u konḓelela. ₄Hone ni konḓelele ni vhuye ni ṱhaphudze, uri ni vhe vho khunyelelaho, no dzia tshoṱhe, ni si na he na ṱahedza.

₅Hone arali hu na muṅwe waṋu a shayaho vhuṱali kha a humbele Mudzimu, u ḓo mu ṋea. Mudzimu ndi mapakulile, Ene u ḓi ri ṋea roṱhe a sa gunguli. ₆Hone ni humbele ni tshi fulufhela, ni sa timatimi. Ane a timatima u nga gabelo ḽa lwanzhe ḽine ḽa sokou khadwa ḽa vhudzulelwa hoṱhe-hoṱhe nga maḓumbu. ₇Wa u ralo a songo ri Muṋe washu u ḓo mu ṋea tshithu. ₈Hufha e muthu wa mbilu mbili. Kha zwoṱhe zwine a ita ha na vhuimo.

₉Mukhriste a re muheḓana kha a takalele vhuhulwane vhune Mudzimu a mu ṋea; ₁₀a re mupfumi a takalele u ṱukufhadzwa hawe; ngauri mupfumi u ḓo lovha sa dzuvha ḽa ḓaka. ₁₁Musi ḓuvha ḽi tshi ṱavha ḽa fhisa, iḽo dzuvha ḽi a puta, nḓevhe dzaḽo dza wela fhasi, huḽa u naka haḽo ha mbo ḓi vha ho fhela. Na kha mupfumi zwi ḓo tou ralo: u lovha e kha u kakarika hawe.

₁₂Wa mashudu ndi uyo ane a ri a tshi lingwa a ḓi ima o khwaṱha, ngauri musi u fulufhedzea hawe ho no vhonala u ḓo wana muṅene, hone vhutshilo he Mudzimu a fulufhedzisa vhane vha mu funa. ₁₃Ndi zwone, hu songo vha na ane a ri a tshi lingea, a ri, “Ndo rewa nga Mudzimu.” Mudzimu ha lingei, nahone Ene muṋe ha xedzi muthu. ₁₄Ane a lingea u ungiwa nga vhuanzwo ha nyemulo dzawe, a fashwa, ₁₅huno nyemulo musi yo no amara i dzwala vhutshinyi, vhutshinyi ho no aluwa ha guma nga u beba lufu.

₁₆Vha hashu vhafunwa, ni songo fhurea: ₁₇tshine tsha bva ṱaḓulu ndi zwifhiwa zwoṱhe na mpho dzoṱhe dzavhuḓi dzi si na tshiṱahe; zwi bva ha Khotsi a zwiedza. Ene ha shanduki; tshedza tshawe a tshi iti tshi tshi dzima unga tsha ḓuvha. ₁₈O ri beba nga ipfi ḽawe ḽa ngoho nga he a zwi funa, uri ri vhe vha vhuimo ha u thoma kha zwivhumbwa zwawe zwoṱhe.

₁₉Vha hashu vhafunwa, ḓivhani hezwi: muthu nga a dzule o ḓiimisela u thetshelesa, a si ṱavhanye u amba, na u sinyuwa a si ṱavhanye u sinyuwa. ₂₀Hafhu muthu ó no sinyuwa ha tsha ita zwine Mudzimu a zwi funa. ₂₁Zwenezwo laṱani maitele oṱhe a vhuaḓa na vhuvhi hoho ho salelaho, ni ḓiṱukufhadze ni ṱanganedze ipfi ḽe Mudzimu a zwala mbiluni dzaṋu; ndi ḽone ḽine ḽa kona u ni tshidza.

₂₂Ni songo sokou pfa ipfi nga nḓevhe fhedzi ni si tsha zwi ita; u ralo hu ḓo vha u ḓifhura; itani zwine ḽa amba. ₂₃Ane a sokou pfa ipfi nga nḓevhe fhedzi a si tevhedze zwine ḽa mu laya, u fana na muthu ane a ḓivhona nga tshivhoni, tshifhaṱuwo tshawe tsha bva tsho tou ralo, ₂₄a ri u ḓivhoni, a ṱuwa, ha mbo ḓi vha u hangwa uri o vha o tou ita hani. ₂₅Hone ane a tou sedzesa nga vhulondo mulayo wo khunyelelaho u re wone u vhofhololaho muthu, a dzula a tshi u vhulunga, a si u hangwe, a tevhedza zwenezwo, onoyo u ḓo vha na mashudu kha zwine a ita.

₂₆Ane a ḓifhima uri ndi murabeli ngeno a sa londi a tshi amba, onoyo u a ḓifhura, u rabela Mudzimu hawe a si tshithu. ₂₇Vhurabeli vhune Mudzimu Khotsi ashu a vhona vhu vhurabeli vhukuma vhu sa solisei ndi u londola tsiwana na tshilikadzi vha tambulaho, wa ḓilondota wa si tende u kumadzwa nga zwa shango.