YESAYA 63

₁Uyu ane a ḓa a tshi bva Botsora kha ḽa Edomo ndi nnyi?

Ndi nnyi uyu o ambaraho tswuku dza maṱeleṱele,

a no kanda e na mutsindo?

“Ndi Nṋe ndi na maanḓa a u tshidza,

ndi khou ḓa u ḓivhadza u kunda hanga!”

₂Khezwi nguvho dzau dzo tswuka?

Khefha u tshi nga wo vha u tshi khou suka nḓirivhe

nga milenzhe bonḓeloni?

₃“Ndo kandekanya dzitshakha ndi ndoṱhe

unga muthu a tshi suka nḓirivhe bonḓeloni;

a hu na lushaka lwo imaho na Nṋe.

Ndo vha kandekanya ndo sinyuwa;

ndo vha sukekanya ndi mbitini,

malofha avho a hashekanya nguvho dzanga,

zwiambaro zwanga zwa ḓala malofha.

₄Ndo vhona uri ḓuvha ḽa u lifhedza ḽo swika,

ho ḓa ṅwaha wa u tshidza vhathu vhanga.

₅Zwo nkanukisa nge nda ri ndi tshi sedza

nda vhona hu si na ane a mpfarisa,

nda kunda nga tshanḓa tshanga tsha maanḓa,

nda tikwa nga mbiti dzanga.

₆Ndo kandekanya dzitshakha ndo sinyuwa,

nda vha kambisa mbiti dzanga,

nda shululela malofha avho mavuni unga tuvhu ḽa nḓirivhe

dzi tshi sukwa.”

₇Ndi ḓo ḓivhadza lufuno lwa Muṋe washu

na zwoṱhe zwine a fanela u rendelwa zwone;

Muṋe washu o ri tonda zwinzhi;

o itela Israele vhuthu vhuhulu,

a ri pfela vhuṱungu;

lufuno lwawe a lu dzinginyei.

₈O ri,

“Vhukuma ndi vhathu vhanga,

ndi vhana vhanga,

vha nga si mphure.”

Ndi zwe a vha Mutshidzi wavho.

₉Maṱhupho avho oṱhe na Ene o a pfa,

ndi Muṋe washu nga eṱhe we a vha muruṅwa

a vha tshidza;

o vha funa, a vha pfela vhuṱungu,

o vha lamukisa;

o vha takula a vha hwala maḓuvha oṱhe a kale.

₁₀Naho zwo ralo vhone vha mu shandukela,

vha ṱungufhadza Muya wawe Mukhethwa;

ndi zwe a vho vha swina ḽavho a lwa navho.

₁₁Ndi hone vha tshi elelwa maḓuvha a kale,

misi ya Mushe, vha vhudzisa vha ri,

“Muṋe washu u ngafhi zwino,

Ene we a tshidza vhalisa vha sambi ḽa nngu dzawe lwanzheni?

U ngafhi Ene we a vhea Muya wawe Mukhethwa

vhukati havho,

₁₂a shuma mishumo ya vhugala,

ya maanḓa,

nga tshanḓa tsha Mushe,

a fhandekanya maḓi a lwanzhe,

vha fhira vhukati hao,

uri a vhe na bvumo ḽa lini na lini?

₁₃O vha endedza vhukati ha maḓi mahulu,

vha kanda zwavhuḓi,

unga bere i tshi gidima mudavhini,

vha si vhuye vha khukhulwa.

₁₄Muya wa Muṋe washu o vha awedza

unga kholomo dzi tshi tsela govhani ḽa pfulo i titimaho;

o endedza vhathu vhawe nga u ralo,

dzina ḽawe ḽa huliswa.”

₁₅Ri sedze u makoleni,

hune wa dzula kha khuluṋoni yau khethwa ya vhugala!

U ḓifunga hau na maanḓa au zwi ngafhi?

Lufuno lwau luhulu lwo yafhi?

A u tsha ri pfela vhuṱungu naa?

₁₆Khotsi ashu ndi Iwe;

Abrahamu ha ri ḓivhi,

Israele ha ri londi;

Khotsi ashu ndi Iwe Muṋe washu;

u ḓi pfi Mutshidzi washu tsha kale na kale.

₁₇Muṋe washu,

ndi mini u tshi litsha

ri tshi pambuwa nḓilani dzau,

ra ita tshipimbi ra si u hulise?

Vhuya u tshi itela vhalanda vhau,

one matsinde e wa ḓikhethela.

₁₈Vhathu vhau vho tou dzulinyana fhethu hau hukhethwa,

hone zwino maswina ashu o hu phusukanya.

₁₉Riṋe ri vhathu vhau tsha kale na kale,

hone zwino ri vho nga a wo ngo vhuya wa ri vhusa,

a ro ngo vhuya ra pfi vhau.