YESAYA 48

₁Thetshelesani inwi

vha muṱa wa Jakopo,

inwi ni no pfi vhana vha Israele,

ni no bva kha lutsinga lwa Juda,

inwi ni no ana nga dzina ḽa Yahavee,

na luvha Mudzimu wa Israele,

hone zwi sa bvi mbiluni,

ni sa iti zwine a funa –

₂ni ḓihudza na ri ni vhadzulapo vha muḓi mukhethwa,

na ḓitika nga Mudzimu wa Israele ane a pfi Yahavee Mulangazwoṱhe.

₃Ndi amba na inwi ndi ri,

“Zwe zwa bvelela ndo dzula ndo zwi amba

kale-kale;

ndo zwi amba zwa ḓivhiwa,

nda mbo ḓi ita uri zwi bvelele kathihi fhedzi.

₄Ndo zwi ḓivha uri ni na tshipimbi,

ni na mutsinga, ni omisa ṱhoho ya tou te unga tsimbi;

₅ndi zwe nda dzula ndo dzumbulula zwithu zwi sa athu swika,

nda ni ḓivhadza zwoṱhe zwi sa athu itea,

ni sa vho ḓo ri zwo itwa nga midzimu yaṋu,

zwo dzudzanywa nga zwifanyiso zwa thanda

na mudzimu wa tsimbi.

₆Edzonu sedza zwoṱhe hezwo zwithu –

hufha no zwi pfa;

a ni zwi tendi naa?

“Zwino ndi ḓo dovha nda ni dzumbululela zwiswa,

zwithu zwo dzumbamaho zwine na si zwi ḓivhe.

₇Zwenezwo ndo zwi sika zwino a si zwa kale;

a ni athu vhuya na zwi pfa;

ni songo ri ni a zwi ḓivha.

₈Ndi ḓivha uri a ni vhuyi na fulufhedzea,

no ḓi ḓivhea ni mavhanga tshee na bebwa,

ndi zwe hezwo na si vhuye na zwi pfa,

na ipfi na ḽithihi ḽa si vhuye ḽa swika nḓevheni dzaṋu na ḽi ḓivha.

₉Ndi lengisa mbiti dzanga ndi tshi itela dzina ḽanga;

ndi a dzi kanda nda si ni lozwe,

ndi tshi itela uri ndi rendwe.

₁₀Ndi tshi ni rwa ho vha hu u ni laṱisa vhuvhi

nga u ni dzhenisa ṋanḓoni ya maṱungu,

hone ni tshi bva na si nge siliva ye ya bviswa manyelo oṱhe

nga mulilo.

₁₁Ndi tshi ni vhofholola ndi ḓo vha ndi sa iteli vhuvhuya haṋu,

ndi ḓo vha ndi tshi itela Nṋe muṋe;

a thi nga tendi dzina ḽanga ḽi tshi nyadziwa;

vhugala hanga a thi nga dzhielwi nga muṅwe mudzimu.”

₁₂“Thetshelesani inwi vhana vha Jakopo,

Israele,

inwi vhe nda ni vhidzela u ntshumela:

Ndi Nṋe Mudzimu ndi ndoṱhe;

ndi Nṋe mathomo,

ndi Nṋe magumo!

₁₃Tshanḓa tshanga tsho tea ḽifhasi tsha ṱharamudza lutombo;

ndo ri u amba uri zwi vhe hone zwa mbo ḓi vha hone zwoṱhe.

₁₄Iḓani noṱhe ni thetshelese:

ndi ufhio mudzimu we a vhuya a bvumba hezwi zwithu?

Nṋe ndo nanga munna ane nda mu takalela

uri a die Babele;

u ḓo rwa Vhakhaladia unga ndo dzudzanya nga u ralo.

₁₅Ndi Nṋe we nda amba;

ndi Nṋe we nda mu vhidza;

ndo mu ḓisa, ndi ḓo ita uri zwi mu nakele.

₁₆Zwino sendelani tsini ni pfe zwine nda amba:

u bva mathomoni ndo ḓi amba ndi si na tshidzumbe,

zwi tshi itea ndi Nṋe ane nda ḓo ḓi vha ndi hone.”

Zwino Muṋe wa zwoṱhe Muṋe washu o mpha Muya wawe a nthuma.

₁₇Muṋe washu Mukhethwa wa Israele

Mutshidzi waṋu, u ri,

“Ndi Nṋe Yahavee Mudzimu waṋu;

ndi ni funza ndi tshi itela uri ni wane zwivhuya,

nda ni endedza nḓilani ine na fanela u i fara.

₁₈Ngavhe ni thetshelese ndaela dzanga nandi,

mashudu aṋu o vha a tshi ḓo ela unga mulambo,

gundo ḽaṋu ḽa ḓa unga magabelo a lwanzhe;

₁₉vhana vhaṋu vho vha vha tshi ḓo anda unga muṱavha,

vhaḓuhulu vhaṋu vha nga thorwana dza mavu,

nda si vhuye nda vha furalela,

dzina ḽavho ḽa ḓi dzula ḽi tshi pfala.”

₂₀“Pfuluwani Babele!

Shavhani Vhakhaladia!

Ḓivhadzani mafhungo haya ni tshi fhululedza!

A anḓadzeni a swike migumoni ya ḽifhasi, ni ri,

‘Yahavee o vhofholola mulanda wawe Jakopo!’

₂₁Zwiḽa ndi tshi vha endedza phangani

a vho ngo vhuya vha farwa nga ḓora;

ndo vha phulela maḓi, a ela a tshi bva tomboni;

ndo fhandula tombo,

maḓi a gubunyea.

₂₂Vhavhi vhone a vha nga vhi na mulalo.”

Ho amba Muṋe washu!