YESAYA 35

₁Phanga na mashango o omaho zwi ḓo pembela,

soga ḽi ḓo fhululedza ḽa fhufhumisa maluvha.

₂Vhukumakuma ḽi ḓo fhufhumisa maluvha,

ḽa pembela ḽa tou fhululedza;

ḽi ḓo naka unga thavha ya Libanoni,

ḽa vhibvela unga masimu a Kharamele na Sharoni;

vhathu vha ḓo vhona vhugala ha Muṋe washu,

vha vhona vhugala ha Mudzimu washu.

₃Zwanḓa zwo kuleaho nungo zwi khwaṱhiseni,

na khokhola dzi tetemelaho nga u kundelwa,

ni dzi ṋee nungo.

₄Vhudzani vhoṱhe vho kuleaho nungo ni ri,

“Khwaṱhani, ni songo ofha!

Mudzimu waṋu khoyo,

u khou ḓa u laṱisa maswina aṋu,

u khou ḓa u ni tshidza –

ndi mushumo wa Mudzimu nga eṱhe.”

₅Ndi hone mabofu a tshi ḓo kona u vhona,

madzinganḓevhe a vho pfa,

₆zwihole zwa thamuwa unga thutha,

zwimuma zwa ṱavha mukosi nga dakalo,

maḓi a gubunyea phangani,

sogani ha ela milambo;

₇mavu o swaho nga ḓuvha a vha dzivha,

shango ḽo omaho ḽa ḓala zwisima;

he ha vha hu tshi dzula phunguhwe ha mela hatsi na ṱhanga na madzhesi.

₈Henefho hu ḓo vha na gondo

ḽine ḽa pfi “Nḓila khethwa”;

a hu na o kumalaho a no ḓo tshimbila ngayo,

i ḓo tshimbilwa nga vhathu vha Mudzimu fhedzi;

na tsilu a i nga ḽi xedzi.

₉Henefho a hu nga vhi na dzindau;

a hu na phukha dzi ofhisaho dzi no ḓo fhira ngayo,

i ḓo tshimbilwa nga vhe vha vhofhololwa nga Muṋe washu.

₁₀Vhe Muṋe washu a vha vhofholola ngevhaḽaa,

vha khou vhuya hayani;

vha ḓo dzhena Tsioni nga mifhululu;

dakalo ḽa lini na lini ḽi ḓo vha tshone tshiala tshavho;

hune vha ya ndi dakalo na u pembela;

vhuṱungu na u gomela zwi ḓo shavha.