HOSIA 6

“Iḓani ri vhuelele

ha Muṋe washu,

Ene o ri ṱhukhukanya,

u ḓo dovha a ri fhodza.

O ri huvhadza,

u ḓo pomba mbonzhe dzashu.

₂Hu ḓo ri u fhela maḓuvha mavhili

a dovha a ri ṋea vhutshilo,

nga ḓuvha ḽa vhuraru a dovha a ri vusa,

uri ri dzule nae a tshi ri lisa.

₃Nga ri ḓivhe Muṋe washu,

nga ri futelele u mu ḓivha.

Vhukuma u ḓo bvelela unga ḓuvha ḽi tshi tsha,

u ḓo ḓa ha riṋe unga mvula ya mibvumbi,

u ḓo ḓa unga mvula dza tseula dzine dza ṋukadza ḽifhasi.”

“Iwe Efraimi, ndi ḓo tou u ita hani?

Iwe Juda, ndi u ita hani?

Hufha lufuno lwau lu tshi nga khuli ya nga matsheloni,

lu tshi nga ṅwando une wa fhufha.

₅Ndi zwe nda ni vhaḓa nga vhaporofita vhanga,

nda ni vhulaha nga maipfi anga,

khaṱhulo dzanga dza ni vhonetshela unga lupenyo,

₆na konou ḓivha uri tshine nda tshi takalela a si tshiṱhavhelo,

ndi lufuno lu sa shanduki,

ndi funa ni tshi ḓivha Mudzimu,

u fhira u ṋekedza nduvho i fhiswaho.”

₇“Hone vhone vho vhofholola mulanga unga Adamu;

henefho ndo vhona vha sa fulufhedzei.

₈Giliadi ndi muḓi wa vhaitazwivhi,

milenzhe yavho yo khakhaṱhela malofha.

₉Zwigwada zwa vhotshifhe zwi nga mavemu

a no lalela muthu,

vha vhulaha vhathu gondoni ḽa u ya Shikheme,

vha luka vhunwa.

₁₀Ndo vhona zwi nengisaho kha vhathu vha Israele:

Efraimi u ntshandukela nga vhupombwe,

Israele a ḓishata tshika.

₁₁A vha iwe Juda,

ndo u vhetshela tshifhinga tshine nda ḓo u lifhedza.”