ESEKIELE 9

₁Huno ndi tshi thetshelesa nda pfa Muṋe washu a tshi khou vhidzelela a tshi ri, “Inwi vhalifhedzi vha muḓi, tshifhinga ndi tshone, iḓani hafha no fara zwihali zwaṋu zwa u lozwa.” ₂Kathihi fhedzi ha mbo ḓi swika vhanna vhaṱanu na muthihi vha tshi bva khoroni ya nṱha ya devhula, muṅwe na muṅwe e na tshihali tsha u vhulaha. Vhukati havho ho vha hu na munna o ambaraho tshena, o kungela zwa u ṅwala ngazwo kha bannda yawe. Vha dzhena vha ima phanḓa ha aḽiṱari ya musinaseṱha. ₃Vhugala ha Mudzimu wa Israele ha raha vhu tshi bva nṱha ha vhakherube he ha vha vhu hone, ha ya tshifhingoni tsha thembele. Muṋe washu a vhidza uḽa munna o ambaraho tshena o kungelaho zwa u ṅwala ngazwo kha bannda yawe, ₄a ri, “Tshimbila na muḓi woṱhe wa Jerusalema, vhoṱhe vhane vha lila vha tshi vhona zwi nengisaho zwi itwaho khawo vha tou gomela, u vha vhee luswayo kha phanḓa.” ₅Nda pfa a tshi vhudza vhaṅwe a tshi ri, “Mu tevheleni a tshi tshimbila na muḓi ni vha lozwe. Ni songo khathutshela muthu, ni songo vha pfela vhuṱungu; ₆vhakalaha, vhaṱhanngana, vhasidzana, vhana, vhasadzi, vha vhulaheni vhoṱhe ni vha fhedze. Hone a re na luswayo kha phanḓa ni songo mu kwama. Ni thome nga fhethu hanga hukhethwa.” Vha mbo ḓi thoma nga vhahulwane vhe vha vha vho gwadama fhaḽa phanḓa ha thembele. ₇A vha vhudza a ri, “Miṱa ya thembele i ḓadzeni zwitumbu, ni songo tata u kumadza thembele.” Vha mbo ḓi tshimbila na muḓi vha tshi vhulaha vhathu.

₈Musi vha tshi khou vha vhulaha nṋe ndo vha ndo sala ndi ndoṱhe. Nda wa nga tshifhaṱuwo nda ṱavha mukosi nda ri, “Yawee, Muṋe wa zwoṱhe, Muṋe washu, wo sinyutshela Jerusalema lune wa vho ṱoḓa u lozwa Vhaisraele vhoṱhe vho salaho u fa naa?” ₉Ene a ri, “Mulandu wa vhathu vha Israele na Juda wo no hulela, wo no kalula; shango ḽo ḓala malofha e vha fhaladza, muḓini ho ḓala u piringanya khaṱhulo, ngauri vha ri, ‘Yahavee o ṱutshela shango, Yahavee ha vhoni tshithu!’ ₁₀Zwino ndi zwone, na Nṋe a thi nga vha pfeli vhuṱungu, na Nṋe ndi ḓo vha fhedza. Zwe vha ita vhaṅwe, na vhone zwi ḓo vha wela-vho.”

₁₁Uḽa munna o ambaraho tshena o kungelaho zwa u ṅwala ngazwo kha bannda yawe, a vhuya, a vhika a ri, “Ndo ita zwe wa ri ndi ite.”