ESEKIELE 45

₁“ ‘Musi ni tshi kovhekanya shango nga madeṅwa, ni kovhele Yahavee mukovhe mukhethwa wa shango: vhulapfu ḽi vhe maga a 25 000, u aṱama ḽi vhe maga a 20 000. Shango heḽo ḽoṱhe ḽi ḓo vha ḽikhethwa. ₂Shangoni ḽeneḽo hu vhe na fhethu ha vhulapfu ha maga a 500 na u aṱama ha maga a 500 ha thembele, ho tangwa nga tshikhala tsha vhuphara ha maga a 50. ₃Henefho ni ele fhethu ha vhunavha ha maga a 25 000 na vhuphara ha maga a 10 000, hune ha ḓo ima thembele. Henefho ndi hukhethwakhethwa. ₄Hafho ndi hone hune ha ḓo vha wone mukovhe mukhethwa wa shango; hu ḓo vha ha vhotshifhe vhane vha shuma thembeleni, vha sendela tsini ha Yahavee vha tshi mu shumela. Vha ḓo vha na nnḓu dzavho henefho na fhethu hukhethwa ho khethelwaho thembele. ₅Tshipiḓa tsho salaho tsha vhulapfu ha maga a 25 000 na vhuphara ha maga a 10 000 tshi ḓo vha tsha Vhalivi vhane vha shumela thembele, hu vhe ha miḓi ine vha ḓo dzula khayo. ₆Muḓi ni u siele fhethu hune ha vha na vhulapfu ha maga a 25 000 na vhuphara ha maga a 5 000, ho ṋekanaho masakha na tshipiḓa tsha ḽa thembele, afho hu ḓo vha ha vhathu vhoṱhe vha Israele.

₇“ ‘Muvhusi u fanela u vha na fhethu ho kanukanaho na tshipiḓa tsha fhethu hukhethwa na ho khethelwaho muḓi, ho fhandekanaho na shango ḽa fhethu hukhethwa na ḽa muḓi, u ela vhukovhela na vhubvaḓuvha ḽi ḓo eḓana na ḽa tsinde ḽithihi ḽa vhathu vha Israele. ₈Hoyo u ḓo vha wone mukovhe wawe kha ḽa Israele; ndi hone vhavhusi vhanga vha si tsha ḓo kandeledza vhathu vhanga; shango ḽiṅwe vho fanela u ḽi siela vhathu vha Israele ḽa vha ḽa matsinde avho.’ ”

₉Muṋe wa zwoṱhe Muṋe washu u ri, “Inwi vhavhusi vha Israele, zwino no guma! Ni songo tsha huvhadza vhaṅwe, ni songo tsha vha ṱangula, itani zwi re zwone ni fulufhedzee, ni songo tsha thatha vhathu vhanga mukovheni wavho! Hu amba Nṋe Muṋe wa zwoṱhe Yahavee. ₁₀Ivhani na mielo yone-yone na zwikalo zwone-zwone. ₁₁Mielo ya vhukhopfu na ya maḓi nga i eḓane: homere ndi bathi dza fumi, ndi epha dza fumi. Mielo yoṱhe muteo wayo nga i vhe homere. ₁₂Gera dza 20 ndi shekele dza 60, ndi mina nthihi.

₁₃“Mitendelo ine na fanela u bvisa ngei: tshipiḓa tshithihi kha 60 tsha goroi na bali, ₁₄tsha mapfura a miolivi ni bvise tsha ḓana. ₁₅Ni bvise nngu nthihi kha 200. Ndi dzone nduvho dza thoro na zwiṱhavhelo zwi fhiswaho na nduvho dza vhukonani. Hezwo zwi ḓo vha zwone zwipfumelo zwaṋu – hu amba Nṋe Muṋe wa zwoṱhe Yahavee. ₁₆Vhathu vhoṱhe vha shango vha bvise nduvho iyo i vhe ya muvhusi wa Israele. ₁₇Muvhusi ene muṋe a vhone uri hu vhe na tshiṱhavhelo tshi fhiswaho na nduvho ya thoro na waini ya thevhula ya vhuṱambo na Ṅwedzi muswa na Dzisabatha na vhuṱamboni hoṱhe hune ha itwa nga vhathu vha Israele. O fanela u bvisa nduvho ya tshipfumelo na nduvho ya thoro na tshiṱhavhelo tshi fhiswaho na nduvho ya vhukonani tsha vha tshipfumelo tsha vhathu vha Israele.”

₁₈Muṋe wa zwoṱhe Yahavee u ri, “Nga ḓuvha ḽa u ranga ḽa ṅwedzi wa u ranga, ni dzhie mbohwana i si na luvhadzi, i kumulule thembele. ₁₉Tshifhe u fanela u dzhia malofha a nduvho ya tshipfumelo a ḓodze mihangammbwa ya thembele na masia oṱhe maṋa a tombo ḽa aḽiṱari na mihangammbwa ya khoro ya muṱa wa ngomu. ₂₀Ni dovhe ni ite nga u ralo nga ḓuvha ḽa vhuṱanu na vhuvhili ḽa ṅwedzi ni tshi itela vhoṱhe vhe vha tshinya vha sa iti nga khole kana vha sa zwi ḓivhi. Hetsho tshi ḓo vha tshipfumelo tsha thembele.

₂₁“Nga ḓuvha ḽa 14 ḽa ṅwedzi wa u ranga ni ite vhuṱambo ha Paseka. Hu vhuye hu fhele maḓuvha maṱanu na mavhili muṅwe na muṅwe a tshi ḽa mikonde ya vhurotho vhu si na mbilisa. ₂₂Musi wonoyo, muvhusi a ṋekedze mboho i vhe tshiṱhavhelo tsha tshipfumelo tsha u pfumelela ene muṋe na vhathu vhoṱhe vha shango. ₂₃Maḓuvha hayo maṱanu na mavhili a vhuṱambo, ḓuvha ḽiṅwe na ḽiṅwe a ṋekedze Yahavee tshiṱhavhelo tshi fhiswaho tsha mboho ṱhanu na mbili na thutha ṱhanu na mbili dzi si na luvhadzi, musi muṅwe na muṅwe hu vhuye hu fhele vhege, na mbokoṱo nthihi musi muṅwe na muṅwe i vhe tshiṱhavhelo tsha tshipfumelo. ₂₄U ṋekedza nduvho ya epha nthihi na mboho iṅwe na iṅwe, na epha nthihi na thutha iṅwe na iṅwe, na litha nṋa dza mapfura na epha iṅwe na iṅwe, i vhe nduvho.

₂₅“Vhuṱamboni vhune ha itwa nga ḓuvha ḽa 15 ḽa ṅwedzi wa vhuṱanu na vhuvhili, u fanela u ita zwi fanaho na zwenezwo hu vhuye hu fhele maḓuvha maṱanu na mavhili, a ṋekedze nduvho ya tshipfumelo na tshiṱhavhelo tshi fhiswaho, na nduvho ya thoro na mapfura.”