ESTERE (TSHIGIRIKI) 13

₁Maradokai a ṱuwa a yo ita zwenezwiḽa zwe Estere a mu laya. _1/8Zwino Maradokai a rabela Muṋe washu, a tshi khou elelwa mishumo yoṱhe ya Muṋe washu, _2/9a ri, “Mudzimu Muṋe washu, khosi ya maanḓa oṱhe, tsiko yoṱhe i langwa nga Iwe, a hu na ane a nga imedzana na Iwe arali u tshi funa u tshidza Vhaisraele.

_3/10“Wo sika ḽiṱaḓulu na ḽifhasi na zwimangadzo zwoṱhe zwi re fhasi ha lutombo. _4/11U Muṋe wa zwoṱhe, a hu na ane a nga imedzana na Iwe Muṋe washu. _5/12U ḓivha zwoṱhe. Muṋe washu, u a zwi ḓivha uri ndi sa gwadameli Hamani wa u ḓihudza, ndo vha ndi sa itiswi nga lunyadzo kana u ḓihudza kana u funa bvumo. _6/13Ndo vha ndi tshi nga ḓi takalela u kuvhatedza ṋayo dzawe uri Vhaisraele vha tshidzwe. _7/14Hone zwe nda ita ndo itela uri ndi si hulise muthu wa ṋama u fhira Mudzimu. A thi nga gwadameli muthu na muthihi, ndi ḓo gwadamela Iwe Muṋe wanga. Izwo a thi khou itwa nga u ḓihudza. _8/15Zwino Mudzimu Muṋe washu, Iwe u re khosi, Mudzimu wa Abrahamu, vhulunga vhathu vhau, ngauri maṱo a maswina ashu o ri zwondolola, vha khou langana u ri fhedza tshoṱhe, vha tama u lozwa lushaka lwe lwa ḓi vha lwau tsha kale na kale. _9/16U songo ṅaledza vhathu vhau vhukuma vhe wa ḓitshidzela shangoni ḽa Egipita. _10/17Thetshelesa thabelo yanga, vhathu vhau vha pfele vhuṱungu, shandukisa tshililo tshashu tshi vhe dakalo uri ri tshile ri rende dzina ḽau nga nyimbo, Muṋe washu. U songo tenda milomo ya vhane vha u renda i tshi lozwiwa.

_11/18“Vhaisraele vhoṱhe na vhone vho vhidzelela nga nungo dzavho dzoṱhe, ngauri vho vha vho livhana na lufu.”