Vhuthihi na u aluwa ha muvhili wa Khristo
1Zwino-ha nṋe ndo hoṋelwaho fhano dzhele nge nda vha wa Muṋe washu ndi a ni ṱuṱuwedza ndi ri: Tshilani nga nḓila ine ya sumbedza uri no vhidzwa nga Mudzimu. 2Ni dzule ni tshi ḓiṱukufhadza, ni vha vhulenda, ni sa fheli mbilu, ni sumbedzane lufuno nga u konḓelelana, 3ni fungelele u dzula ni vhathihi, Muya ó ni vhofhekanya nga mulalo. 4Muvhili ndi muthihi, na Ene Muya ndi muthihi, vhunga na tshilavhelelwa tshe Mudzimu a ni vhidzela tshone tshi tshithihi. 5Na Muṋe washu ndi muthihi; na lutendo ndi luthihi; na ndovhedzo ndi nthihi; 6na Mudzimu ndi muthihi, Ene Khotsi ashu roṱhe, a re Muṋe washu roṱhe, a shumaho nga riṋe roṱhe e kha riṋe roṱhe.
7Muṅwe na muṅwe washu o ṋewa mpho yawe nga he Khristo a mu tela ngaho. 8Maṅwalo a ri,
“A tshi gonya ṱaḓulu
o ṱuwa na muduba wa mathubwa awe,
a ṋea vhathu dzimpho.”
9Hu tshi pfi, “O gonya” hu ambiwani? A zwi ambi uri o thoma a tsela fhasi-fhasi shangoni naa? 10Zwenezwo hoyo we a tsela fhasi u tshee onoyo we a dovha a gonya nṱha-nṱha ha maṱaḓulu a vha Ene muḓalahoṱhe.
11Ndi Ene mukovhi wa mpho hedzi: vhaṅwe o vha ita vhaapostola, vhaṅwe a vha ita vhaḓivhadzi vha zwe Mudzimu a dzudzanya, vhaṅwe vha vha vha u tshimbila vha tshi ḓivhadza mafhungo maḓifha, vhaṅwe vha vha vhalisa na vhafunzi. 12Mpho idzo o vha kovhela uri vha kone u gudisa vhathu vha Mudzimu mushumo wavho wa u fhaṱa muvhili wa Khristo. 13Ndi hone roṱhe ri tshi ḓo vhuya ra vha vhathihi tshoṱhe kha lutendo lwashu na kha u ṱalukanya hashu Murwa wa Mudzimu, ra vha vhathu vho vhinaho vho swikaho kha tshivhino tsha Khristo. 14A ri tsha ḓo vha vhana; a ri tsha ḓo nga magabelo ra vhudzulelwa ngeno na ngei nga muya wa pfunzo iṅwe na iṅwe ya vhafhuri vhane vha xedza vhathu nga vhumbulu na vhukwila havho. 15Riṋe tshashu nga hu vhe u ima ngohoni nga muya wa lufuno, ndi hone vhuthihi hashu na Khristo ṱhoho yashu vhu tshi ḓo ḓi khwaṱha vhu tshi ya, nga nḓila dzoṱhe. 16Muvhili woṱhe u simuwa henefho kha Ene a re ṱhoho, miraḓo yoṱhe ya anḓana ya khwaṱhisana ya vha tshithu tshithihi, muṅwe na muṅwe u tshi shuma mushumo wawo, ya fhaṱana, lufuno lwa ḓi aluwa.
Kutshilele kwa kale na kuswa
17Ndi tshi amba lwa u tou ombedzela nga ḽa Muṋe washu ndi ri: ni songo tsha tshila sa vhannḓa vhane mihumbulo yavho i si vhuedze tshithu, 18mbilu dzavho dza vha dzo swifhalelwaho; a vha na vhutshilo vhune Mudzimu a ri ṋea, ngauri vho omisa dziṱhoho, na u pfa a vha pfi; 19na u shona a vha tsha shona; vho no tou ḓikumedza vhuḓabaḓaba, vha ita zwoṱhe zwi nengisaho vha sa pfeleli.
20Hone hezwo a si zwone zwe na funzwa zwone ni tshi ḓivhadzwa a Khristo. 21A thi ri no ri u pfa a tshi ambiwa na vha vhafunziwa vhawe, na funzwa ngoho i wanalaho kha Yesu? 22Zwino-ha laṱani kutshilele kwaṋu kwa kale na muthu waṋu mulala wa musi no tshinyala nga nyemulo dzaṋu dzi ni fhuraho, 23mbilu dzaṋu na ṱhalukanyo dzaṋu dzi shanduke tshoṱhe dzi vhe ntswa, 24ni ambare muthu muswa we a tshi sikwa ha vha u fanyisa Mudzimu, e muvhuya vhukuma, e mukhethwa vhukuma.
25Zwino-ha laṱani mazwifhi ni dzule ni tshi vhudzana ngoho nga tshaṋu, ngauri roṱhe ri miraḓo ya muvhili muthihi.
26Arali na tshenuwa no sinyuwa ni vhone mbiti dzaṋu dzi sa ḓo ni khakhisa, nahone ḽi songo vhuya ḽa kovhela ni tshee no sinyuwa, 27ni sa ḓo vulela diabolo nḓila.
28We a vha e fobvu a laṱe vhufobvu, a tou ḓishumela nga zwanḓa zwawe a wane zwiḽiwa nga nḓila yo fanelaho, uri a ḓo kona u farisa na vhashai.
29Hu songo tsha pfala maṱamba a tshi bva mulomoni waṋu, kha hu pfale maipfi a u farisa vhaṅwe ane a vha fhaṱa, a ḓisela vhathetshelesi mashudu.
30Ni songo vhaisa Muya Mukhethwa wa Mudzimu, ngauri ndi Ene luswayo lu sumbaho uri ni vha Mudzimu, ha vha u khwaṱhisa vhuṱanzi ha uri ḓuvha ḽi ḓo vhuya ḽa swika ḽine na ḓo rengululwa ngaḽo.
31Laṱani zwa u dinalea na dzimbiti na u sinyutshelana na u zhambelana na u semana na vhunwa; 32tshaṋu faranani nga vhuthu ni vhe na mbilu thethe, ni hangwelane unga na Mudzimu o ni hangwela nga Khristo.
