MUFUNZI 9

₁Ndo elekanya zwoṱhe hezwo ndi tshi edzisa u zwi ṱalukanya, nda vhona uri Mudzimu u langa zwiito zwa vha mu thetshelesaho na vhaṱali, hone muthu ha ḓivhi zwo mu lindelaho; ha ḓivhi arali hu tshi ḓo vha na u funana kana u vhengana. ₂A hu na phambano; vhoṱhe vho livhana na zwithihi – vha thetshelesaho Mudzimu na vhavhi, vhavhuya na vha mbilu dzo ṱambaho na vha dzitshika, vha ṋekedzaho Mudzimu zwiṱhavhelo na vha sa mu ṋekedzi; zwa muvhuya zwi ḓi fana na zwa mutshinyi; zwa ane a ita muano zwi ḓi fana na zwa ane a ofha u ana nga u ḓivha uri u na mulandu – ₃vhoṱhe vho livhana na zwi no fana. Hezwo zwo khakhea u ḓi fana na zwoṱhe zwi iteaho fhano fhasi ha ḓuvha. Zwi ita uri vhathu vha tshi kha ḓi tshila mbilu dzavho dzi ḓale vhuvhi na tshipengo, vha fhedza nga u fa. ₄Ndi nnyi ane zwa si mu kwame?

Ane a kha ḓi tshila u na tshe a tshi lavhelela; mmbwa i tshilaho i fhira ndau yo faho. ₅Vha tshilaho vha a zwi ḓivha uri vha ḓo fa, ngeno vho faho vha sa ḓivhi tshithu; a vha tsha ḓo vha na iṅwe pfufho, vho hangwiwa tshoṱhe. ₆Lufuno lwavho, vengo ḽavho, vivho ḽavho, vha fa nazwo! A vha tsha vhuya vha kovhekana na vhaṅwe zwi no itea fhano fhasi ha ḓuvha.

₇Iyo ḽa vhuswa hau u takale, u nwe waini yau mbilu yau yo takala; ndi zwenezwo zwe Mudzimu a u tendela uri u zwi ite. ₈U dzule wo ambara nguvho tshena, ṱhoho yau yó ḓola mapfura. ₉Ḓiphiṋe nga vhutshilo na musadzi ane wa mu funa maḓuvha oṱhe a vhutshilo hau ha mahandana he wa ṋewa nga Mudzimu fhano fhasi ha ḓuvha; ndi zwone zwo u livhaho u tshi kha ḓi tshila u tshi khou ḓinetisa nga u shuma fhano fhasi ha ḓuvha. ₁₀Zwoṱhe zwine wa kona u ita u shume nga nungo dzoṱhe; ngei vhudzulavhafu hune wa ya hone a hu tshee na mushumo, a hu tshee na u humbula, a hu na nḓivho, a hu na vhuṱali.

₁₁Nda dovha nda vhona uri fhano fhasi ha ḓuvha ane a wana tshiphuga tsha mbambe a si a re na luvhilo; ane a kunda nndwani a si wa maanḓa; na zwiḽiwa a zwi wanwi nga muṱali; na lupfumo a lu wanwi nga a re na ṱhalukanyo; na u takalelwa nga vhathu a zwi ḓi nge muthu a funzea; zwoṱhe zwi langwa nga tshifhinga na shudu. ₁₂A hu na a no ḓivha ḽawe ḓuvha; ri sokou tshenuwa ro welwa nga zwo vhifhaho, ra nga khovhe dzi tshi fashwa nga mambule, ra nga zwiṋoni zwi tshi fashwa nga tshikwekwe.

₁₃Hu na tshiṅwe hafhu tshe nda tshi vhona; ndi tsumbo ya uri vhuṱali vhu na mushumo mungafhani fhano fhasi ha ḓuvha. ₁₄Ho vha hu na muḓi muṱuku u na vhathu vha si gathi; wa mbo ḓi diwa nga khosi ya maanḓa; iyo khosi ya u govhela, ya fhaṱa mitsheṱo mihulu ya u tangela ngomu. ₁₅Henefho ho vha hu tshi dzula muṅwe munna wa mushai we a vha e na vhuṱali; a mbo ḓi tshidza uyo muḓi nga vhuṱali hawe, hone ho vha hu si na na we a vhuya a mu elelwa. ₁₆Ndi zwine nda ri, vhuṱali vhu fhira maanḓa, hone vhuṱali ha mushai vhu a nyadziwa, na maipfi awe ha pfiwi. ₁₇U thetshelesa maipfi o dzikaho a muṱali zwi fhira u thetshelesa muvhusi a no sokou zhamba a tshi vhusa matsilu. ₁₈Vhuṱali vhu fhira zwihali zwa nndwani, fhedzi mutshinyi muthihi u tshinya zwivhuya zwinzhi.