DOTORONOMIO 20

₁“Musi ni tshi bva pfumo ni tshi yo lwa na maswina aṋu, na vhona uri vha na bere na gariki dza nndwa, nahone vha a ni fhira nga u anda, ni songo vha ofha, hufha Muṋe washu Mudzimu waṋu e na inwi, ndi Ene we a ni pfulusa shangoni ḽa Egipita. ₂Musi ni sa athu thoma u lwa, tshifhe u fanela u sendela a amba na vhathu ₃a ri, ‘Vhanna vha Israele, thetshelesani! Ṋamusi ni khou ya u dia maswina aṋu; ni songo tshenuwa, ni songo ofha, ni songo vha tetemela, ni songo hanganea ni tshi vha vhona. ₄Muṋe washu Mudzimu waṋu u a ni fhelekedza uri a ni lwele a tshi lwa na maswina aṋu, u ḓo ita uri ni kunde.’

₅“Ndi hone vhakoma vha tshi fanela u amba na vhathu vha ri, ‘Ndi nnyi fhano ane a kha ḓi bva u fhaṱa nnḓu, hone a sa athu dzula khayo? Kha a humele hayani a sa ḓo fa nndwani nnḓu yawe ya dzhiwa nga muṅwe a dzula khayo. ₆Ndi nnyi ane a kha ḓi bva u lima tsimu ya minḓirivhe, hone a sa athu wana tshifhinga tsha u fula nḓirivhe dzayo? Na ene kha a humele hayani a sa ḓo fa nndwani nḓirivhe dza ḽiwa nga muṅwe. ₇Ndi nnyi ane a kha ḓi bva u dzea musidzana hone a sa athu mu vhinga? Na ene kha a humele hayani a sa ḓo fa nndwani musidzana wawe a dzewa nga muṅwe.’ ₈Vhakoma vha dovhe vha ambe na vhathu vha ri, ‘Ndi nnyi ane a ofha kana a tetemela? Na ene kha a humele hayani a sa ḓo ita uri na mbilu dza vhaṅwe dzi ṋoke vha ofhe vhoṱhe.’

₉“Musi vhakoma vho no fhedza u amba na vhathu, vha fanela u vhea vharangaphanḓa vha mmbi. ₁₀Musi ni tshi vho govhela muḓi uri ni lwe nawo ni range u linga u pfumedzana navho. ₁₁Arali vha tshi tenda u pfumedzana vha ni vulela khoro, vhadzulapo vhoṱhe vha muḓi vha ḓo vha phuli dzaṋu, ni vha kombetshedze u ni shumela. ₁₂Hone arali vha sa tendi u pfumedzana na inwi, vha lwa na inwi, inwi ni vha govhele. ₁₃Muṋe washu Mudzimu waṋu u ḓo vha kumedza zwanḓani zwaṋu. Zwenezwo ni fanela u vhulaha vhanna vhoṱhe vha muḓi nga pfumo, ₁₄hone vhasadzi na vhana vhaṱuku na zwifuwo na thundu dzoṱhe dzi re muḓini dzine muthu a nga dzhia ni zwi thube, ni ḽe zwe na thubela maswina aṋu nó fhiwa nga Muṋe washu Mudzimu waṋu. ₁₅Ndi zwone zwine na ḓo ita miḓi yoṱhe i re kule-kule na shango ḽa haṋu, i si miḓi ya Vhakanana havha. ₁₆Miḓi ya tshakha idzi ine Muṋe washu Mudzimu waṋu a ni ṋea uri i vhe yaṋu, khayo ni songo litsha tshithu na si vhulahe, ₁₇ni fanela u lozwa zwoṱhe ni zwi kumedze Muṋe washu. Ndi Vhahithi na Vhaamori na Vhakanana na Vhapherisi na Vhahivi na Vhajebusi; vhenevho Muṋe washu Mudzimu waṋu o ni laedza uri ni vha lozwe, ₁₈u itela uri vha si ni funzedze u ita zwithu zwoṱhe zwi nengisaho zwine vhone vha luvha midzimu yavho ngazwo na vho khakhela Muṋe washu Mudzimu waṋu.

₁₉“Arali na lwa na muḓi na u govhela ha fhela maḓuvha manzhi, ni songo rema miri ya iḽo shango kana na i tshinya, hufha ni tshi ḓo sala ni tshi i ḽa, ni songo i rema! Kani-ha miri yo no vha maswina aṋu ni tshi vho ṱoḓa u lwa nayo? ₂₀Yeneyo miri ine na ḓivha uri a i ḽiwi, ndi yone fhedzi ine na nga i rema ni tshi itela u fhaṱa maḓingo a u pfula muḓi ni khao na vhuya na kunda uyo muḓi une wa lwa na inwi.