DOTORONOMIO 17

₁“Ni songo ṱhavhela Muṋe washu Mudzimu waṋu kholomo kana mbudzi kana nngu i re na luvhadzi kana yo holefhalaho; hezwo Muṋe washu Mudzimu waṋu u a zwi nengwa.

₂“Arali muḓini muṅwe wa haṋu we Muṋe washu Mudzimu waṋu a ni ṋea ha wanala munna kana musadzi a itaho zwi sa takadzi Muṋe washu, nga u vhofholola mulanga wa Mudzimu waṋu, ₃a ya a shumela midzimu isili, a luvha ḓuvha kana ṅwedzi kana ṋaledzi – zwithu zwe nda si ni laye, ₄zwa swikiswa na pfa uri zwo ralo, zwenezwo ni fanela u sedza zwavhuḓi arali i ngoho, arali vhukuma zwithu hezwo zwi nengisaho zwo itwa kha Vhaisraele; ₅zwa wanala uri ndi zwone, ni dzhie onoyo muthu o itaho vhuvhi vhungafho ni mu bvisele khoroni ya muḓi, ni mu kanḓe nga matombo a fe. ₆Kha a vhulawe arali hu na ṱhanzi mbili kana tharu; arali hu na ṱhanzi nthihi fhedzi ni songo mu vhulaha. ₇Ṱhanzi dzazwo kha vha vhe vhone vha u thoma u mu vhulaha, hu konou tevhela vhaṅwe vhoṱhe. Ngauralo ni ḓo fhelisa vhuvhi hoho ha si tsha pfala kha inwi.

₈“Zwi nga itea uri ni ṱangane na mafhungo a no ni kunda u haṱula – a nga vha a u ṱalula muthu we a vhulaha muṅwe nga khole kana we a sokou tshenuwa o no vhulaha, kana a u hanedza khaṱhulo, kana a u huvhadzana. Zwenezwo ni ye fhethu he Muṋe washu Mudzimu waṋu a ḓinangela, ₉ni swike ha vhotshifhe, vhone Vhalivi, ni vhudzise muhaṱuli ane iḽo ḓuvha ḽa vha diso ḽawe. Vhenevho vha ḓo ni haṱulela mafhungo, ₁₀na konou ita zwenezwo zwe vha ni vhudza vhe fhethu he Muṋe washu a hu nanga; ni tevhedze zwoṱhe zwine vha ni laya. ₁₁Vhukuma ndayo ine vha ni laya na khaṱhulo ine vha ni sumbedza, ndi zwone zwine na fanela u ita, ni songo vhuya na bva kha zwe vha ni vhudza. ₁₂Muthu ane a nyadza zwine zwa ambiwa nga tshifhe o imaho phanḓa ha Muṋe washu Mudzimu waṋu a tshi mu luvha thembeleni, kana a nyadza muhaṱuli onoyo, uyo muthu kha a fe; vhuvhi ho raloho kha vhu fhele vhu sa tsha pfala kha Vhaisraele. ₁₃Vhathu vhoṱhe vha ḓo pfa zwo iteaho vha ofha vha si tsha ita tshipimbi.

₁₄“Musi ni tshi swika shangoni ḽine Muṋe washu Mudzimu waṋu a ni ṋea, na ḽi dzhia na dzula khaḽo, na langana u ḓivhumbela khosi unga dziṅwe tshakha dzoṱhe dze na ṋekana masakha nadzo, ₁₅ni ite uri ni vhee onoyo ane Muṋe washu Mudzimu waṋu a mu nanga; ni nange Muisraele wa haṋu uri a vhe khosi yaṋu, ni songo nanga mutsinda a si Muisraele. ₁₆Hafhu khosi yaṋu i songo vha na bere nnzhi, nahone a songo tenda vhathu vha Israele vha tshi vhuelela Egipita u yo mu rengela dziṅwe bere; hufha Muṋe washu o amba a ri ni songo dovha na kanda Egipita. ₁₇A songo dzea vhasadzi vhanzhi, vha sa ḓo mu xedza a shandukela Muṋe washu; nahone a songo vha na lupfumo luhulu lwa siliva na musuku.

₁₈“Musi o dzhena vhuhosi nga a ḓiitele kopi ya ndayo idzi dza Muṋe washu dzo ṅwalululwa kha bugu ya vhotshifhe, vhone Vhalivi. ₁₉Bugu iyo a dzule nayo a i vhale maḓuvha oṱhe a vhutshilo hawe, uri a kone u guda u ofha Muṋe washu Mudzimu wawe, a vhulunge mafhungo oṱhe a ndayo idzi a tevhedze ndaela idzi, ₂₀ndi hone a sa ḓo ḓihudza a ḓifhima uri u fhira vhaṅwe Vhaisraele, nahone a nga si vhuye a bva kha mulayo. Ndi hone ene na vhana vhawe vha tshi ḓo lalama, vha vhusa Vhaisraele miṅwaha minzhi.