DANIELE (TSHIGIRIKI) 13

₁Ho vhuya ha vha na munna muṅwe a no pfi Joakimi, a tshi dzula Babilonia. ₂O vha o dzea musadzi wa lunako, a no ofha Mudzimu, a tshi pfi Susana, ṅwananyana wa Hilikia. ₃Vhabebi vha Susana vho vha vhe vhathu-vhathu, ndi zwe vha mu alusa vha tshi mu funza u tevhedza mulayo wa Mushe. ₄Joakimi o vha o pfuma vhukuma. O vha e na ngade yavhuḓi tsini na nnḓu yawe. Majuda vho vha vha tshi anzela u ya khae ngauri o vha a tshi huliswa u fhira vhoṱhe.

₅Ṅwaha wonoyo ho vha ho vhewa vhahulwane vhavhili vha vhathu u vha vhahaṱuli. Muṋe washu a tshi amba vha no nga avho o ri, “Vhuvhi ho ḓa Babilonia nga vhahulwane na vhahaṱuli vhane vha ḓiita vhaendedzi vha vhathu.” ₆Vhanna avho vho vha vha tshi anzela u ya nḓuni ya Joakimi, vhoṱhe vho vha vha tshi hwedza milandu yavho khavho.

₇Susana o vha a tshi anzela u dzhena ngadeni ya munna wawe a tshimbila-tshimbila musi vhathu vho no balangana mirunzi yo no fhambanya. ₈Huno vhahulwane avho vha tshi ḓi mu vhona a tshi dzhena henefho misi yoṱhe u yo tshimbilia-tshimbila, vha thoma u mu emula. ₉Vha kandeledza mvalo dzavho, vha si liladze maṱo avho ḽaṱaḓulu, vha hangwa zwine vhuvhuya ha ṱoḓa zwone. ₁₀Nangwe vhuvhili havho vho vha vha tshi mu emula, a vho ngo vhudzana zwe zwa vha zwi tshi vha dina; ₁₁vho vha vha tshi shona u dzumbulula nyemulo dzavho dza u mu dzhenisa nḓuni, ₁₂hone vha ḓi futelela u mu ṱalela ḓuvha ḽiṅwe na ḽiṅwe.

₁₃Muṅwe musi vha vhudzana vha ri, “Nga ri ṱuwe ri ye hayani, ndi tshifhinga tsha u swiṱula.” Ndi hone vha tshi ṱuwa, muṅwe na muṅwe a fara yawe nḓila. ₁₄Hone vhanna avho vhoṱhe vha huma, vha dovha u ṱangana, vha vhudzisana tshi vha humisaho, vha vhudzana zwa nyemulo dzavho. Ndi hone vha tshi langana tshifhinga tshine vha nga wana Susana e eṱhe.

₁₅Muṅwe musi izwi vha tshee vho lindela tshifhinga tshine vha nga mu wana, Susana a dzhena henefho sa nga misi e na vhalanda vhawe vhavhili vha tshisadzini fhedzi, a humbula u ḓiambusa henefho ngadeni nge ḽa vha ḽi tshi fhisa. ₁₆Ho vha hu si na muthu muṅwe a re henefho, vhe vha vha vhe henefho ndi vhahulwane vhenevho vhavhili, vho dzumbama vho mu lalela. ₁₇Susana a vhudza vhalanda vhawe a ri, “Nnḓiseleni mapfura a muolivi na zwiḓolo, ni vale mahothi a ngade uri ndi kone u ṱamba.” ₁₈Avho vha ita zwe a vha vhudza, vha vala mahothi a ngade, vha bva nga gethe ya nga thungo u yo dzhia zwe a vha vhudza, vha sa vhoni vhahulwane avho, ngauri vho vha vho dzumbama.

₁₉Zwenezwo vhalanda avho vha tshisadzini vha tshi tou kwaṱa, vhanna avho vhavhili vha mbo ḓi dzumbuluwa vha gidimela kha Susana, vha ri, ₂₀“Nga vha vhone, mahothi a ngade o hoṋiwa, a hu na ane a nga ri vhona. Ri khou tou swa nga nyemulo dza u tama vhone, nga vha tende ri vha dzhenise nḓuni. ₂₁Arali vha hana, riṋe ri ḓo vha pomoka ra ṱanzilela uri ro vha fara vhe na muṱhannga, ndi zwe vha ṱuwisa vhalanda vhavho.”

₂₂Susana a gomela a ri, “Ndo hanganea tshoṱhe. Arali nda tenda, ndi ḓo vha ndo fa; arali nda hana ndi nga si kone u ponyoka maanḓa aṋu. ₂₃Nangwe zwo ralo, ndi khwiṋe u hana na ntambudza zwanga ndi si na mulandu, u fhira u tenda nda tshinya maṱoni a Muṋe washu.” ₂₄Ndi hone Susana a tshi ṱavha mukosi muhulu, vhanna avho vhavhili na vhone vha ṱavha mukosi vha tshi khou mu pomoka. ₂₅Muṅwe wavho a gidima a yo vula mahothi a ngade. ₂₆Musi vhathu vha re nḓuni vha tshi pfa mukosi u re ngadeni, vha gidima vha dzhena nga gethe ya nga matungo u yo vhona zwo iteaho kha Susana. ₂₇Musi vhahulwane avho vho no pomoka Susana, vhalanda vha pfa vho tou niwa nga ṱhoni, ngauri zwo raloho zwo vha zwi sa athu vhuya zwa ambelwa Susana.

₂₈Nga matshelo vhathu vha kuvhangana muṱani wa Joakimi munna wa Susana, vhahulwane avho vhavhili na vhone vha ḓa vhe na tshimbevha tsha u ṱoḓa u pomoka Susana na u mu vhulahisa. Vha amba phanḓa ha vhathu vha ri, ₂₉“Nga hu vhidzwe Susana ṅwananyana wa Hilikia, mufumakadzi wa Joakimi.” ₃₀Ndi hone Susana a tshi vhidziswa. A ḓa na vhabebi vhawe na vhana vhawe na mashaka awe oṱhe. ₃₁Zwino Susana o vha a tshi vhonala e musadzi mutete vhukuma, wa lunako. ₃₂O vha o khurumela lupila, hone vhanna avho vhavhi vha ri a khurumule lupila uri vha ḓiphine nga u vhona lunako lwawe. ₃₃Vhoṱhe mashaka awe na vho mu vhonaho vho vha vha tshi khou tsengisa miṱodzi.

₃₄Zwino vhahulwane avho vhavhili vha takuwa vha ima vhukati ha vhathu, vha vhea zwanḓa zwavho ṱhohoni ya Susana. ₃₅Susana a liladza maṱo ḽiṱaḓulu a tshi tsengisa miṱodzi, ngauri o vha a tshi fulufhela Mudzimu nga mbilu yawe yoṱhe. ₃₆Vhahulwane avho vha mu pomoka vha ri, “Ro ri musi ri tshi khou tshimbila ngadeni ri roṱhe musadzi uyu a dzhena e na vhalanda vhavhili vha tshisadzini, a hoṋa mahothi a ngade, a ṱuwisa vhalanda avho. ₃₇Zwino ha ḓa muṱhannga muṅwe we a vha o dzumbiwa henefho, a dzhenisa Susana nḓuni. ₃₈Riṋe ro vha ri khuḓani ya ngade; musi ri tshi vhona vhuṱudzi honoho, ra gidimela khavho. ₃₉Ro vha vhona vho kuvhatedzana, hone ra si kone u fara munna uyo, ngauri o vha a tshi ri kunda nga maanḓa, a vula mahothi a shavha. ₄₀Zwino riṋe ra fara musadzi uyu, ra mu vhudzisa uri munna uyo ndi nnyi, ₄₁hone ene a hana u ri vhudza. Uho ndi hone vhuṱanzi hashu.” Gogo ḽa tenda zwine vha amba, ngauri vho vha vhe vhahulwane na vhahaṱuli vha vhathu, Susana vha mu haṱulela lufu.

₄₂Huno Susana a lila a tou ṱavha mukosi, a ri, “Yawee Mudzimu wa lini na lini, u ḓivha zwo dzumbamaho zwoṱhe, u vhona zwithu zwi sa athu itea. ₄₃Iwe u a ḓivha uri vhanna avha vho mpomoka vha ṱanzilela mazwifhi. Zwino ndi fhano ndi pfi ndi fe, nangwe ndi songo ita na tshivhi na tshithihi tshe vha mpomoka ngatsho.”

₄₄Muṋe washu a pfa tshililo tshawe. ₄₅Huno zwenezwo Susana a tshi khou iswa u vhulahwa, Mudzimu a ritha muya mukhethwa wa muṱhannga muṅwe we a vha a tshi pfi Daniele, ₄₆uyo a ṱavha mukosi a ri, “Nṋe a thi nga longi tshanḓa kha u shulula malofha a musadzi uyu!”

₄₇Vhathu vhoṱhe vha rembuluwa vha mu vhudzisa vha ri, “Zwine na khou amba ndi mini?” ₄₈Daniele a ima vhukati havho a ri, “Inwi Vhaisraele, ni matsilu mangafhani! Ni nga laṱa musadzi wa Muisraele ní songo ranga u sedzulusa mafhungo na wana vhuṱanzi vhu pfalaho naa? ₄₉Humelani tsengoni; vhanna avha vho ṱanzilela mazwifhi vha tshi pomoka Susana.”

₅₀Ndi hone vhathu vhoṱhe vha tshi mbo ḓi humela tsengoni. Huno vhahulwane vhoṱhe vha vhudza Daniele vha ri, “Iḓani ni dzule na riṋe ni ri vhudze, ngauri Mudzimu o ni ṋea mpho ya vhahulwane.” ₅₁Daniele a fhindula a ri, “Fhandekanyani vhanna avha vhavhili vha vhe kule na kule uri ndi kone u vha sengisa.”

₅₂Musi vho no fhandekanyiwa vha si tsheeho fhethu huthihi, Daniele a vhidza muṅwe wavho a mu vhudza a ri, “Vhone vho ḓi vha muvhi tsha kale na kale! Vhuvhi havho zwino ho dzumbuluwa. ₅₃Vho vha vha tshi ḓi haṱula nga tshiṱalula, vha tshi laṱa vha si na mulandu, vha vhofholola vha re na mulandu, nangwe Muṋe washu o amba a ri, ‘U songo vhulaha muthu a si na mulandu kana muvhuya.’ ₅₄Zwino, arali vhukuma vho mu vhona musadzi uyu, nga vha mmbudze: Vho vha vhona vho kuvhatedzana nga fhasi ha muri ufhio?” Munna uyo a fhindula a ri, “Ndo vha vhona fhasi ha muunga houḽa.” ₅₅Daniele a fhindula a ri, “Ndi zwone, mazwifhi avho a ḓo vha ḽa ṱhoho. Muruṅwa wa Mudzimu o no ḓi wana khaṱhulo i bvaho kha Mudzimu, u ḓo ṱuwa a tshi vha tumukanya nga vhukati.”

₅₆Daniele a dzhia munna uyo a mu vhetshela thungo, a ri vha ḓise uḽa muṅwe. Daniele a vhudza munna uyo a ri, “Vhone ṅwana wa Kanana a si wa Juda, vho fhurwa nga lunako, mbilu yavho yo xedzwa nga nyemulo. ₅₇Izwo ndi zwe vha ḓi ita vhananyana vha Israele, vhone vha sokou tenda nga u ofha, hone ṅwananyana wa Juda asuyu we a si konḓelele vhuvhi haṋu. ₅₈Zwino, nga vha mmbudze, vho vha fara vho kuvhatedzana fhasi ha muri ufhio?” Munna uyo a ri, “Vho vha vhe nga fhasi ha muoukhu mudala wo bvukaho.” ₅₉Daniele a vhudza munna uyo a ri, “Ndi zwone, mazwifhi avho o vha ḽa ṱhoho. Muruṅwa wa Mudzimu o ni lindela o fara banga uri vhuvhili haṋu a ni tumule nga vhukati.”

₆₀Gogo ḽoṱhe ḽa vhathu vha ṱavha mukosi vha tshi khou renda Mudzimu, Ene ane a tshidza vhane vha mu fulufhela. ₆₁Vhathu vha mbo ḓi vutshela vhahulwane avho vhavhili, ngauri Daniele o vha wana mulandu nga maipfi avho. Vho tevhedza mulayo wa Mushe, vha vha rwa nga ṱhamu i no nga ya tshimbevha tshe vha itela Muisraele ngavho vha tshi ṱoḓa u mu vhulahisa, ₆₂vha vha vhulaha vho tevhedza mulayo wa Mushe. Zwenezwo musi wonoyo ha vha ho tshidzwa muthu a si na mulandu.

₆₃Hilikia na mufumakadzi wawe vha renda Mudzimu nge a tshidza ṅwananyana wavho Susana, na munna wawe Joakimi na mashaka awe oṱhe na vhone vha renda Mudzimu, nge Susana a wanala o ṱamba kha zwiito zwi shonisaho zwe a pomokwa.

₆₄U bva musi wonoyo Daniele a vha na bvumo ḽihulu vhathuni.