1“Muṋe washu Ramaanḓaoṱhe, Mudzimu wa Israele, ri khou vhidzelela ri na mimuya yo ṱungufhalaho na mbilu dzo hanganeaho. 2Yawee Muṋe washu, ri thetshelese, u ri khathutshele, ro tshinya phanḓa hau. 3Iwe u vhusa lini na lini, ngeno riṋe ri tshi khou lovha tshoṱhe. 4Muṋe washu Ramaanḓaoṱhe, Mudzimu wa Israele, zwino thetshelesa thabelo ya Vhaisraele vho no ṱodzimelaho lufuni, vhana vha avho vhe vha u khakhela vha si thetshelese ipfi ḽa Mudzimu Muṋe wavho; ndi nga u tshinya havho khombo dzo tou ri ndwa. 5Zwino u songo tsha elelwa vhuvhi ha vhokotsi ashu, tshau khomboni iyi elelwa maanḓa au na dzina ḽau. 6Iwe u Mudzimu Muṋe washu, ndi zwine ra ḓo u renda, Muṋe washu! 7Wo longa nyofho mbiluni dzashu uri ri u ofhe, ri vhidzelele dzina ḽau. Ri tama u u renda naho ri fhano vhuthubwani, ngauri mbiluni dzashu ro laṱa vhuvhi hoṱhe ha vhomakhulukuku washu vhe vha tshinya phanḓa hau. 8Edzou vhona, ṋamusi ri vhuthubwani he wa ri balanganyela hone, uri ri nyadziwe, ri teketelwe, ri tambudzwe nga mulandu wa vhutshinyi hoṱhe ha vhokotsi ashu vhe vha ṱutshela Mudzimu Muṋe washu.”
Tshirendo tsha vhuṱali vhu re mulayoni wa Mushe
9Inwi Vhaisraele, ipfani milayo ine ya ni ṋea vhutshilo,
thetshelesani ni gude vhuṱali.
10Inwi Vhaisraele, mulandu ndi mini ní shangoni ḽa maswina aṋu,
ni tshi khou kalahela shangoni ḽisili?
Ndi mini no shatwa tshika nga vhafu,
11ni tshi vhalwa na vha yaho dindini?
12Ndi nge na ṱutshela tshisima tsha vhuṱali.
13Ngavhe ni tshimbile nḓilani ya Mudzimu,
ndi musi no tshila nga mulalo lini na lini.
14Gudani hu re na vhuṱali,
hu re na nungo,
hu re na ṱhalukanyo,
uri ni ḓivhe-vho hu re na ndalamo na vhutshilo,
hu re na tshedza tsha maṱo na mulalo.
15We a wana vhudzulo ha vhuṱali ndi nnyi?
Ndi nnyi we a dzhena zwisikuni zwaho?
16Vhavhusi vha dzitshakha vha ngafhi
avho vhe vha vhusa na dzone phukha dza ḽifhasi
17vha tshi tamba nga zwiṋoni zwi fhufhaho?
Vha ngafhi vha no khokha siliva na musuku,
zwithu zwi fulufhedzwaho nga vhathu,
vha no ṱoḓa u pfuma nga thundu vha sa gumi?
18Vhafuli vha siliva vhatsila vhomakone vha ngafhi?
Zwe vha fula a zwi ṱoṱoredzei!
19Vho ngalangala vha tsela dindini,
vhudzuloni havho ho vuwa vhaṅwe.
20Ho ḓa mirafho i tevhelaho ya vhona tshedza tsha ḓuvha,
vha ḓadza shango,
hone na vhone vha si gude nḓila ya nḓivho,
21vha si vhone vhuṱala hayo.
A vho ngo vhu swikela.
Vhana vhavho na vhone, vho vha vhe kule na nḓila yaho.
22Kha ḽa Kanana nḓivho a yo ngo vhuya ya pfiwa,
na shangoni ḽa Themani a yo ngo vhuya ya vhonwa.
23Vhana vha Hagara
vha no ṱoḓa nḓivho ḽifhasini,
vhashavhi vha Midiani na Themani,
vhaani vha dzingano vhadziavhuṱali
a hu na na muthihi wavho we a ḓivha nḓila ya vhuṱali,
kana a humbula vhuṱala haho.
24Iwe Israele, nnḓu ya Mudzimu yo hula hani!
Shango ḽawe ḽo ṱanḓavhuwa hani!
25Ḽo hulesa, a ḽi na mikano,
ḽi ṋanzwa makole, a ḽi na muelo!
26Khaḽo ho bebwa miswonḓa,
vhanna vha bvumo tsha kale na kale,
vha tshivhumbeo tshihulu,
vhomakone nndwani.
27Mudzimu ho ngo nanga vhone,
na nḓila ya nḓivho ho ngo vha ṋea.
28Tshavho vho lovha nga u shaya vhuṱali,
vho lovhiswa nga vhutsilu havho.
29We a vhuya a gonya makoleni a yo vhu dzhia ndi nnyi?
30Ndi nnyi we a wela lwanzhe
a yo vhu wana,
a vhu renga nga musuku ú songo vangwaho?
31A hu na a no ḓivha nḓila i yaho khaho,
kana a londa vhuṱala haho.
32Hone Ene ane a ḓivha zwithu zwoṱhe u a zwi ḓivha,
o dzula o vhu wana nga ṱhalukanyo yawe.
Ndi Ene we a tea ḽifhasi ḽa ima ḽó khwaṱha lini na lini,
a ḽi ḓadza nga phukha dza khwanḓa nṋa.
33Ndi Ene a no ruma tshedza, tsha ya,
a tshi vhidza, tsha mu thetshelesa,
tsha vhuya khae tshi tshi tetemela.
34Ṋaledzi dzi penya dzo takala dzi vhuimoni hadzo.
35Musi a tshi dzi vhidza, dzi fhindula dza ri,
“Ri fhano!”
dzi tshi penyela Muvhumbi wadzo dzó takala.
36Ndi Ene Mudzimu washu,
ha vhambedzwi na muṅwe.
37O dzumbulula nḓila yoṱhe ya nḓivho,
a i sumbedza Jakopo muḓinḓa wawe,
a i ṋea Israele,
murwa wawe ane a mu funa.
38Ha vha hu hone
vhuṱali vhu tshi thoma u vhonala ḽifhasini,
ha dzula na vhathu.
