Anthiokhosi wa vhuṱanu na Lisiasi vha tshi dia Judia, na lufu lu ofhisaho lwa Menelaosi
1Nga ṅwaha wa ḓana na mahumi maṋa na miṱanu na miṋa (149), Judasi na vhahali vhawe vha pfa upfi Anthiokhosi Yuphathoro u khou dia Judia e na mmbi khulu, 2na uri u na Lisiasi uḽa o mu alusaho, mulangi wa muvhuso. Vho ḓa na mmbi ya Magiriki ya vhahali vha tshimbilaho nga ṋayo vha zwigidi zwa ḓana na fumi (110 000), na vhanameli vha dzibere vha zwigidi zwiṱanu na maḓana mararu (5 300), na nḓou dza mahumi mavhili na mbili (22), na gariki dza maḓana mararu (300) dzi na mapanga.
3Menelaosi na ene a ḓibaḓekanya navho, a ita muhoyo a tshi ṱuṱuwedza Anthiokhosi uri a songo humela murahu, hone a sa iteli uri shango ḽawe zwi ḽi nakele, tshawe hu u itela uri a vhuedzedzwe mushumoni wawe. 4Hone Khosi ya mahosi ya ṱuṱula mbiti dza Anthiokhosi a vutshela muthu uyo muvhi, zwa ita uri Lisiasi a vhudze khosi uri mifhirifhiri yoṱhe yo vhangwa nga Menelaosi, khosi ya ri a iswe Beria a vhulahelwe henengei hu tshi tevhedzwa maitele apo. 5Ndi uri henefho Beria hu na thawara ya vhulapfu ha mitha dza mahumi mararu na ṱhanu (35) u ya nṱha, i re na lumeme lwa tsimbi lu tshingamelaho ngomu nṱha ha milora. 6Muthu a na mulandu wa u tswa zwikhethwa kana vhuvhi vhuṅwe, u imiswa henefho, a khurumedzelwa fhasi a fela milorani. 7Menelaosi o fa nga u ralo nge a pfuka Mulayo, na u swiṱwa a si swiṱwe zwavhuḓi. 8Vhukuma zwo vha zwo mu fanela uri ene we a tshinyela aḽiṱari zwinzhi, yone aḽiṱari ya mulilo mukhethwa na milora mikhethwa, na ene a fele milorani.
Thabelo dza Majuda dzi tshi pfiwa muḓini wa Modeini
9Khosi yo vha i tshi khou ḓi fhirela phanḓa, yó luka vhunwa ha u ṱungufhadza Majuda u fhira zwiḽa zwe vha vhuya vha ṱungufhadzwa misi ya khotsi awe. 10Musi Judasi a tshi zwi pfa, a ṱuṱuwedza vhathu uri vha rabele Muṋe washu vhusiku na masiari, vha rabele u fhira zwe vha vhuya vha rabela, 11vha mu humbele uri a vha phalale vha si dzhielwe Mulayo wa Mudzimu na shango ḽavho na thembele khethwa, a si tende Majuda vhane vha kha ḓi bva u mila mare vha tshi dovha vha wela zwanḓani zwa vhannḓa vha phungo mmbi. 12Zwenezwo vhoṱhe vha baḓekana vha tshi khou ita nga u ralo, vha humbela Muṋe washu wa khathutshelo nga thabelo i sa tumuwi vha tshi khou tsengisa miṱodzi, vha tshi ḓidzima zwiḽiwa, vho shuvhama, ha vhuya ha fhela maḓuvha mararu. Ndi hone Judasi a tshi vha ṱuṱuwedza, a ri vha songo sendela kule nae, 13a konou vhidza muṱangano wa vhahulwane nga tshidzumbe, a vhofha uri vha songo lindela mmbi ya khosi i tshi thoma u dia Judia ya thuba muḓi uyo, tshavho hu vhe u yo i ṱanganedza vha i kunde vhó fariswa nga Mudzimu. 14Huno uri zwi ḓo fhelelafhi o zwi kumedza zwanḓani zwa Musiki wa shango ḽoṱhe, a ṱuṱuwedza vhahali vhawe uri vha lwe nga nungo dzoṱhe vha vhuye vha fe vha tshi lwela milayo yavho na thembele na muḓi na shango na muvhuso wavho. A ṱoka mishasha yawe tsini ha Modeini. 15A ṱavhela vhahali vhawe mukosi wa nndwa a ri, “U kunda hu bva ha Mudzimu!”, a nanguludza vhaṱhannga vha tshivhindi a ṱuwa navho vhusiku a tshoṱhela dennde ya khosi. A vhulaha vhanna vhane vha nga swika zwigidi zwivhili (2 000) henefho mishashani, vha ita na u vhulaha yone nḓou khulwane i no fhira dzoṱhe, khathihi na munameli wayo. 16Vha fhedza nga u huma vho kunda musi mapfuvhi a tshi tswuka, mishasha iyo vhó i ḓadza nyofho na vilinga. 17Izwo zwo itea nge Muṋe washu a vha farisa na u vha tsireledza.
Anthiokhosi wa vhuṱanu a tshi pfana na Majuda
18Zwino musi khosi yo no vhona vhuhali ha Majuda, ya lingedza u thuba hune vha vha hone nga vhufhura. 19Zwenezwo a bva a yo dia Bethe Tsuru, ḽone dzhavhelo ḽo khwaṱhaho ḽa Majuda, hone a vhilimedzwa, a likitwa a vhuya a kundiwa. 20Ndi hone Judasi a tshi farisa vhanna vha re nga ngomu nga zwoṱhe zwine vha zwi lila, 21hone Rodokhosi, wa mmbi ya Majuda, a mbo ḓi vha fheṱa nga u sevha maswina zwidzumbe zwa mmbi. Hone o wanala a fariwa a wana ṱhamu yo mu fanelaho. 22Khosi ya dovha ya linga u ambedzana na vhanna vha Bethe Tsuru, vha pfana vha fulufhedzisana, a huma, 23a yo dia Judasi na vhahali vhawe, hone a kundiwa. A sala a tshi pfa uri Filipi, we a mu sia uri a fare muvhuso Antiokia, o no mu shandukela. Ha mbo ḓi vha u kulea nungo hawe, a vhidza Majuda vha ambedzana, a tenda zwine vha zwi funa, a ana uri u ḓo tevhedza zwe vha mu vhetshela. Musi ho no pfaniwa nga u ralo, a ṋekedza tshiṱhavhelo, a hulisa thembele nga u bvisa zwifhiwa zwinzhi. 24O ṱanganedza Makhabiosi nga vhulenda, a sia Hegemonidese e muvhusi uri a lange shango u bva Tholemai u swika Gerara. 25Musi a tshi swika Tholemai a wana vhathu vha muḓi uyo vho sinyuswa nga ndangano iyo. Vhukuma vho vha vho dinalea lwe vha funa u thutha zwe zwa tendelanwa. 26Hone Lisiasi a yo ima phanḓa havho a ambela ndangano, vha vhuya vha tenda vha rudza mbilu. Ndi hone a tshi humela Antiokia.
Ha vha hone u fhela ha mafhungo a khosi i tshi dia shango na a u huma hawe.
