Hu tshi kundwa Lisiasi
1Hu sa athu fhela maḓuvha mangana, Lisiasi, shaka ḽa khosi ḽe ḽa i alusa, we a dovha a vha mulangi wa shango, a pfa zwo iteaho, zwa mu dina vhukuma, 2a ramba mmbi i na vhanna vha tshimbilaho nga ṋayo vha no swika zwigidi zwa mahumi maṱanu na mararu (80 000), na vhanameli vhawe vha dzibere vhoṱhe, a yo lwa na Majuda. Muhumbulo wawe wo vha u wa u ita Jerusalema vhudzulo ha Magiriki, 3na u thelisa muthelo wa thembele, sa zwe a ita hukhethwa ha tshakha dziṅwe, na u rengisa vhuphrista vhuhulwane ṅwaha muṅwe na muṅwe. 4Ho ngo vhuya a londa maanḓa a Mudzimu na kathihi, tshawe o vha a tshi takadzwa nga u fulufhela vhunzhi ha vhahali vhawe vha tshimbilaho nga ṋayo na zwigidi zwa vhanameli vhawe vha dzibere na nḓou dzawe dza mahumi maṱanu na mararu (80). 5Zwenezwo a dia Judia, a swika Bethe Tsuru, muḓi wo tingeledzwaho nga mitsheṱo une wa nga vha khilomitha dza mahumi mararu (30) u bva Jerusalema, a thoma u u dia. 6Makhabiosi na vhahali vhawe vha tshi pfa uri Lisiasi u khou govhela madzhavhelo, vhone na vhathu vhoṱhe vha rabela Muṋe washu nga zwililo muṱodzi u shamani, uri a rume muruṅwa muvhuya u tshidza Israele. 7Makhabiosi o vha wa u ranga u fara zwihali, a ṱuṱuwedza vhaṅwe uri vha mu tevhele vha ḓifunge vha lwele vha havho vha sa ofhi lufu. Ndi hone vha tshi mbo ḓi bva vhoṱhe sa munna muthihi. 8Kathihi fhedzi, musi vha tshee tsini na Jerusalema, ha bvelela munna o namela bere phanḓa havho, ó fuka zwifuko zwitshena, a tshi khou dzungudza zwihali zwawe zwa musuku. 9Vhoṱhe vha mbo ḓi livhuha Mudzimu zwe a vha khathutshela, mbilu dzavho dza khwaṱha lwe vha ḓilugisela u kunda vhathu, vha sa tati na mavhanda a ofhisaho a ḓaka, vhó ḓiimisela na u pwasha mitsheṱo ya tsimbi. 10Vha kandela phanḓa nga maitele a nndwa vhó rangwa phanḓa nga mulweli wavho a no bva makoleni. 11Vha wela maswina unga dzindau, vha rambaladza vha tshimbilaho nga ṋayo vha no swika zwigidi zwa fumi na tshithihi (11 000) na vhanameli vha dzibere vha no swika tshigidi na maḓana maṱanu (1 500), vhaṅwe vhoṱhe vha vha shakulisa. 12Vhunzhi ha vhe vha shavha vho vha vho huvhadzwa, vha ita na u dzhielwa zwihali zwavho, Lisiasi ene muṋe a shavha ó shona.
Hu tshi itwa mulalo na Vhasiria
13Hone Lisiasi o vha e si tsilu. O elekanya uri o kundwa hani, a zwi vhona uri tshine tsha ita uri muthu a si kone u kunda Vhaheberu, ndi uri Mudzimu wa maanḓa u ima navho. Ndi zwe a ruma vhaḓinḓa khavho 14a tshi humbela uri vha pfumedzane kha zwoṱhe nga mulalo, a fulufhedzisa uri u ḓo kwengweledza na khosi uri a vhe khonani yavho. 15Makhabiosi, nge a vha na dzangalelo ḽa uri vhoṱhe zwi vha nakele, a ṱanganedza zwoṱhe zwo ambiwaho nga Lisiasi. Khosi na yone ya tendela Majuda khumbelo dzoṱhe dzi re luṅwaloni lwe Makhabiosi a ṅwalela Lisiasi.
Maṅwalo maṋa o ṅwalwaho hu tshi dzudzanywa ndangano
16Khophi ya luṅwalo lwe Lisiasi a ṅwalela Majuda asiyi:
“Nṋe Lisiasi ndi khou resha Majuda vhoṱhe.
17“Johanisi na Abisalomo, vhaḓinḓa vhaṋu, vho swikisa luṅwalo lwaṋu lune ra khou longa khophi yalwo, vha tshi nkhumbela uri ndi ṱanganedze zwe na humbela. 18Zwe zwa vha zwi tshi fanela u swikiswa ha khosi ndo mu tsivhudza; zwoṱhe zwe zwa ṱanganedzea ndo zwi tendela. 19Arali na dzula ni na vhuluvha muvhusoni washu, nṋe ndi ḓo linga nga nungo dzoṱhe uri zwi ni nakele. 20Kha zwidodombedzwa zwa mafhungo aya, ndo tendela vhaimeli vhanga, khathihi na vhaḓinḓa vhaṋu, uri vha a swikise ha inwi. Ni vhe hone!” 21Ṅwaha wa ḓana na mahumi maṋa na miṱanu na miraru (148), ḓuvha ḽa mahumi mavhili na vhuṋa (24) ḽa ṅwedzi wa Dioskorosi.
22Luṅwalo lwa khosi lwo vha lu tshi ri,
“Nṋe khosi Anthiokhosi ndi resha Lisiasi wa hashu. 23Zwino vhunga khotsi ashu o no orowa midzimuni, ri tama uri vhalanda vha muvhuso washu vha si lemedzwe, vha tendelwe u dzudzanya zwavho vhone vhaṋe. 24Ro pfa uri Majuda a vha pfani na maitele a khotsi ashu a u vha kombetshedza u tevhedza maitele a Tshigiriki, vha tama maitele a havho na u tevhedza milayo yavho. 25Zwino vhunga ri tshi tama uri vhathu avho vha songo lemedzwa, u ḓi nga dziṅwe tshakha dzoṱhe dzi sa lemedzwi, zwe ra elekanya ndi uri thembele yavho i vhuedzedzwe khavho, vha tshile vha tshi tevhedza maitele a vhomakhulukuku wavho. 26Itani zwenezwo ni vha rumele vhaḓinḓa vha swikise vhuṱanzi hashu ha vhukonani khavho, uri musi vha tshi pfa zwe ra elekanya vha si tsha ḽa mbilu, vha shume mishumo yavho vho rudza mbilu.”
27Luṅwalo lwe khosi ya ṅwalela Majuda lwo vha lu tshi ri,
“Nṋe khosi Anthiokhosi ndi resha sinethe ya Majuda khathihi na Majuda vhoṱhe. 28Arali ni tshee no takala, ndi zwine ra tama zwone. Riṋe-vho ri tshee ro takala. 29Menelaosi o ri vhudza uri ni takalela u vhuelela hayani haṋu uri ni shume mishumo yaṋu ya nga misi. 30Zwino ndi zwone, vhane vha ḓo vhuya hu sa athu fhira ḓuvha ḽa mahumi mararu (30) ḽa Santhikhosi, ri a vha fulufhedzisa uri vha songo ofha tshithu. 31Nga vha ḽe zwiḽiwa zwine vha funa, vha tevhedze milayo yavho sa kale. Hu songo vha na muthihi wavho a no diniwa nga nḓila ifhio na ifhio nga zwe a tshinya nga u shaya nḓivho. 32Nazwino ndo ruma Menelaosi uri a ni rudze mbilu. 33Ni vhe hone.” Nga ṅwaha wa ḓana na mahumi maṋa na miṱanu na miraru (148), nga ḓuvha ḽa fumi na vhuṱanu ḽa ṅwedzi wa Santhikhosi.
34Vharoma na vhone vho vha ṅwalela luṅwalo vha ri,
“Riṋe Khwinthusi Memiusi, na Titosi Maniliusi, na Maniusi Seregiusi, vhaḓinḓa vha Vharoma, ri resha Majuda.
35“Zwoṱhe zwe Lisiasi shaka ḽa khosi a ni tendela, na riṋe ri a zwi tenda. 36A vha mafhungo e a vhona uri a fanela u thoma u sedzwa nga khosi, a sedzeni zwavhuḓi, ni konou ruma muthu wa u ri ḓivhisa one, uri ri kone u a pfesesa nga nḓila ine ya nga ni farisa, ngauri ri lwendoni lwa u ya Antiokia. 37Zwino ni ṱavhanye ni ri rumele vhane vha ḓo ri ḓivhisa zwe na elekanya. 38Ni vhe hone!”
Nga ṅwaha wa ḓana na mahumi maṋa na miṱanu na miraru (148), ḓuvha ḽa fumi na vhuṱanu (15) ḽa ṅwedzi wa Dioskorosi.
