2 VHAMAKHABI 10

₁Zwino Muṋe washu a endedza Makhabiosi na khonani dzawe vha dzhiulula thembele na muḓi, ₂vha thutha aḽiṱari dzo fhaṱwaho nga vhannḓa vanḓani ḽa muḓi, vha thutha na zwitembele zwavho zwo vhielwaho luhura, ₃vha kumulula thembele vha fhaṱa aḽiṱari ntswa. Ndi hone vha tshi pferudza tombo ḽa ḽiangahwe vha funga mulilo, vha ṋekedza tshiṱhavhelo lwa u thoma hó fhela miṅwaha mivhili tshi sa ṋekedzwi, vha dubisa zwioro, vha funga mbone, vha ṱana mikonde ya tshinkwa tsha u sumela Mudzimu. ₄Musi vho no fhedza izwo, vha shuvhama fhasi vha humbela Muṋe washu uri vha si dovhe vha wela khomboni yo raloho. Vha ri arali vha nga tshenuwa vho tshinya, a vha rwe nga ṱhamu yawe ya khathutshelo, a si vha kumedze vhannḓa vha vhanyefuli vha mahwarahwara. ₅Hu tshi fhela ṅwaha nga ḓuvha ḽeneḽo ḽe thembele ya kumadzwa nga vhannḓa, ndi uri, nga ṅwedzi wonoyo wa Khisilevi ú na maḓuvha a mahumi mavhili na maṱanu (25), ha kumululwa thembele. ₆Majuda vha ita vhuṱambo vha pembela ha vhuya ha fhela maḓuvha maṱanu na mararu (8) u fana na nga vhuṱambo ha Mishasha, vha tshi elelwa zwe vha kha ḓi bva u ita vhuṱambo ha Mishasha vha tshi khou tshila unga phukha dza ḓaka vhe mapakoni a dzithavha. ₇Vha fara ṱhanga dzo vhofhelelwaho maṱari na matavhi madala na mitshevho, vha pembelela Mudzimu we a ita uri hu dohwe hu kumululwe thembele yawe, vha mu imbela nyimbo dza thendo na ndivhuho. ₈Vha vhea mulayo wa uri lushaka lwoṱhe lwa Majuda vha pembelele maḓuvha ayo ṅwaha muṅwe na muṅwe.

₉Ndi kwone kufele kwa Anthiokhosi we a vha a tshi pfi Ephifanese. ₁₀Zwino ri ḓo anetshela zwe zwa itea musi hu tshi vhusa Anthiokhosi Yuphathoro, murwa wa munna uyo muvhi, ra amba na nga u pfufhifhadza nga vhuvhi vhuhulu ho ḓiswaho nga nndwa dzawe. ₁₁Musi Yuphathoro a tshi dzhena vhuhosi, a vhea muṅwe a no pfi Lisiasi uri a lange muvhuso e mulangammbi muhulwane wa Koele Siria na Finikia. ₁₂Tholemiosi we a vha a tshi pfi Makhroni o vha ene wa u ranga u fara Majuda zwavhuḓi nge vha ranga u fungiswa, a linga nga nungo dzoṱhe u tshilisana navho nga mulalo. ₁₃Ndi zwe a pomokwa ha Yuphathoro nga Khonani dza khosi. Vhukuma, masia oṱhe o pfa a tshi pfi ndi tshifheṱi nge a ṱuwa Kipirosi, ḽe a vha o kumedzwa nga Filomethoro, na nge a pfukela kha Anthiokhosi Ephifanese. A sala a tshi kha ḓi vha na maanḓa, hone hu si tshee na ane a mu hulisa, a mbo ḓi ḽa tshiganame a ḓivhulaha.

₁₄Musi Gorogiasi a tshi vha muvhusi wa dzingu iḽo, a topa vhahali vha vhatsinda, a linga nga nungo dzoṱhe u levhela Majuda. ₁₅Misi yeneyo na Vhaedomo, vhe vha vha vhe na madzhavhelo fhethu hu no fhira vhathu vhanzhi, vho vha vha tshi khou fungisa Majuda; vho ṱanganedza tshavhi dzi bvaho Jerusalema, vha linga nga nungo dzoṱhe u lapfisa nndwa. ₁₆Makhabiosi na khonani dzawe vha rabela hó kuvhangana lushaka lwoṱhe, vha humbela Mudzimu uri a ime navho, vha mbo ḓi bva vha yo dia madzhavhelo a Vhaedomo. ₁₇Vha lwa vho tou vusa maanḓa, vha kunda vha dzhia fhethu afho, vha shakulisa vhoṱhe vho lindaho mitsheṱo, vha vhulaha maswina avho a no swika zwigidi zwa mahumi mavhili (20 000). ₁₈Vhaṅwe vhane vha nga fhira zwigidi zwiṱanu na zwiṋa (9 000) vha shavhela thawarani mbili dzo khwaṱhaho dzi re na zwoṱhe zwi ṱoḓeaho u konḓelela u govhelwa uho. ₁₉Makhabiosi a sia Simoni na Josefa vhe na Zakia na vhahali vhawe, vha tshivhalo tsho eḓanaho uri vha govhele, ene muṋe a ṱuwa a ya fhethu he a vha a tshi khou ṱoḓea nga u ṱavhanya. ₂₀Vhanna vhaṅwe vha re mmbini ya Simoni vha no funesa mali vha ro ita tshanḓanguvhoni, vha ṱanganedza drakhima dza zwigidi zwa mahumi maṱanu na mavhili (70 000) kha vhanna vhaṅwe vha re thawarani, vha litsha vhaṅwe vha shavha. ₂₁Musi Makhabiosi a tshi vhudzwa zwe zwa itea, a kuvhanganya vhalangammbi, a pomoka vhathu avho a ri vho rengisa vha havho nga mali vha litsha maswina avho a shavha uri matshelo a dovhe u lwa na Majuda. ₂₂Ndi hone a tshi vha vhulaha ngauri ndi zwifheṱi, a si vhuye a lenga u yo thuba thawara idzo ene muṋe. ₂₃A hu na he zwa mu kunda a tshi bva pfumo; madzhavheloni ayo mavhili o vhulaha vhanna vhane vha fhira zwigidi zwa mahumi mavhili (20 000).

₂₄Majuda vho vha vho no kunda Timoti luthihi. Huno a dovha a kuvhanganya mmbi khulu ya vhatsinda, na vhanameli vha dzibere vha na tshivhalo, a mbo ḓi swika Judia a tshi vhona unga u ḓo hu thuba nga khani. ₂₅Musi Makhabiosi na vhahali vhawe vha tshi mu vhona a tshi sendela, vha rabela Mudzimu vha ḓishela mavu ṱhohoni vha vhofha khundu dzavho nga madzanganda. ₂₆Vha shuvhama tsindeni ḽa aḽiṱari, vha humbela uri Mudzimu a vha khathutshele, a vhe swina ḽa maswina avho, a lwe na vha lwaho navho, nga hune zwa ambiwa nga Mulayo.

₂₇Musi vho no rabela vha fara zwihali zwavho, vha tshimbila lwendo lu vhonalaho u bva muḓini, vha ima musi vha tshi vho sendela tsini na maswina. ₂₈Musi mapfuvhi a tshi tou tswuka nndwa ya ṱangana, Majuda vha tshi fulufhela uri zwi ḓo vha nakela vha kunda, hone vha sa pikisi vhuhali havho fhedzi, vhó fulufhela Muṋe washu, maswina a tshi dzhia mbiti dzavho a dzi rangisa phanḓa a tshi lwa. ₂₉Zwenezwo nndwa yo no tou vha tswuku, maswina a vhona hu tshi bvelela vhanna vhaṱanu vhahuluhulu vha tshi bva makoleni vhó namela bere dza ḓomo dza musuku vhó ranga Majuda phanḓa, ₃₀vha tanga Makhabiosi vha mu pilela nga zwipileli zwavho zwa nndwa. Vho mu tsireledza a si tsha huvhadzwa, ngeno vha tshi khou pfula maswina nga misevhe, vha vha rwisa nga nḓadzi dzi bvumaho, maswina vha hanganea vha si tsha vhona tshithu, vha vilinganywa vha shakuliswa. ₃₁Ha vhulahwa vhahali vhavho vha tshimbilaho nga ṋayo vha zwigidi awa mahumi mavhili na maḓana maṱanu (20 500) na vhanameli vha dzibere vha maḓana maṱanu na ḽithihi (600). ₃₂Timoti ene a shavhela dzhavheloni ḽo khwaṱhaho ḽi no pfi Gezere. Mulangammbi wa henefho o vha e Kheriasi. ₃₃Makhabiosi na vhahali vhawe vha govhela dzhavhelo iḽo ha vhuya ha fhela maḓuvha maṋa. ₃₄Vha re ngomu vho vha vho fulufhela u khwaṱha ha dzhavhelo, vha tshi ḓi nyefula Mudzimu nga maṱamba a nengisaho vha sa ofhi. ₃₅Musi ḓuvha ḽa vhuṱanu ḽi tshi bvisa mulomo, ha vuwa vhaṱhannga vha mahumi mavhili (20) vha mmbi ya Makhabiosi, vhó sinyuswa nga maṱamba a maswina, vha mbo ḓi gonya mutsheṱo uyo nga vhuhali vha vhulaha muṅwe na muṅwe we vha ṱangana nae vhó sinyuwa vha sa tsha londa tshithu. ₃₆Vhaṅwe vha gonya mutsheṱo siani ḽiḽa vha dodela vho govhelwaho nga murahu, vha tshoṱhela vha re ngomu, vha funga thawara dza muḓi nga mulilo, vhanyefuli vha swela ngomu vha tshi khou tshila. Vhaḽa vha u ranga vha vha vho no pwasha dzigethe vha vulela mmbi yoṱhe, ya mbo ḓi thuba muḓi. ₃₇Timoti o vha o wana tshisiku a dzumbama ngomu, hone vha mu tevhela vha mu vhulaha khathihi na murathu wawe Kheriasi, na Apholofanese. ₃₈Musi Majuda vho no vuledza nndwa idzo, vha renda Muṋe washu nga nyimbo, vha mu livhuha nge a itela Israele vhuthu vhungafhongafho a ita uri vha kunde maswina.