1 TIMOTI 3

₁Hu pfi, “Ane a funa u vha mulisa wa tshivhidzo o tama mushumo wavhuḓi.” Hayo ndi mafhungo ane a fanela u fulufhelwa. ₂Mulisa wa tshivhidzo nga a vhe a sa solisei, a tshi fulufhedzea kha musadzi wawe, ó tokomelwa, ó dzika, a ḓifaraho tshihulwane, a takalelaho vhaeni, a konaho u funza; ₃a songo vha e tshidakwa kana mudziadzinndwa, a vhe wa vhulenda na mulalo, a sa funesi tshelede, ₄a konaho u langa muṱa wawe zwavhuḓi, na vhana vhawe o vha gudisa u mu thetshelesa na u hulisa. ₅Ndi uri muthu a tshi kundwa nga muṱa wawe, tshivhidzo tsha Mudzimu a nga kona u tshi londola hani? ₆A songo vha muthu ane a kha ḓi bva u rembuluwa, uri a sa ḓo ḓihudza a vho ḓo rwiwa nga ṱhamu i ngaho iḽa yo rwaho diabolo. ₇U fanela u vha muthu ane na vhannḓa vha mu amba zwavhuḓi, uri a sa ḓo elwa nga phungo a vho fashwa nga tshikwekwe tsha diabolo.

₈Na kha madikoni zwo ralo. Na vhone vha fanela u vha na tshileme. Vha songo vha na nyambakavhili; vha songo vha vhathu vho ḓikumedzaho kha halwa kana vha ṱoḓaho u pfuma nga vhufhura. ₉Tshiphiri tshe Mudzimu a ri dzumbululela ra tshi tenda kha vha tshi nambatele mvalo dzo ṱamba. ₁₀Na vhone vha fanela u thoma u sedzeswa kutshilele, ha ḓo ri hu songo wanala tshi soliseaho vha ḓo konou tendelwa u ita mushumo wa vhudikoni.

₁₁Hu ḓi nga vhasadzi vha fanela u vha na tshileme, vha si na zwitshele, vho tokomelwa, vha fulufhedzeaho tshoṱhe. ₁₂Mudikoni a vhe e muthu a fulufhedzeaho kha musadzi wawe, a konaho u langa vhana vhawe na muṱa wawe zwavhuḓi. ₁₃Huno madikoni vha shumaho zwavhuḓi vha ḓo ḓiwanela vhuimo havhuḓi vha ḓo kona u amba a u fulufhela havho Khristo Yesu vha sa ofhi tshithu.

₁₄Naho ndo lavhelela u ḓa ngeo hu si kale, litshani ndi ni ṅwalele haya mafhungo ₁₅uri arali nda lenga ni vhe ni tshi ḓivha uri vhathu vha ḓifara hani muṱani wa Mudzimu, ndi amba tshivhidzo tsha Mudzimu a tshilaho, yone phuphu i tikaho ngoho. ₁₆Tshiphiri itshi tsha u ofha Mudzimu a hu na ane a nga kona u hanedza a ri a si tshihulu: