1 VHAMAKHABI 6

₁Khosi Anthiokhosi o vha a tshi khou buḓekanya madzingu a dzithavhani, a pfa hu tshi pfi kha ḽa Pheresia hu na muḓi une wa pfi Elimaisi, wa bvumo ḽa lupfumo lwawo lwa siliva na musuku, ₂na uri thembele yawo yo pfumesa, i na zwiṱangu zwa musuku na zwipilakhana na zwihali, zwo siwaho henefho nga Alekzannda, murwa wa Filipi wa Makedonia, khosi ya u thoma ya Magiriki. ₃A mbo ḓi ya henengei a linga u thuba muḓi uyo uri a u ṱangule, hone zwe vhutoto, nge vhanna vha afho muḓini vha ṱavhanya vha ḓivha zwe a elekanya, ₄vha takutshedza vha kovholana nae. Zwenezwo a huma, a ṱuwa o shona a vhuelela Babele.

₅Musi e henefho Pheresia, muḓinḓa a swikisa mafhungo a uri mmbi ye ya rumiwa shangoni ḽa Judia yo shakuliswa, ₆na uri Lisiasi o ranga u ya na mmbi yo khwaṱhaho, a shakuliswa, Majuda vho no vha na maanḓa siani ḽa zwihali na vhanna, na thundu nnzhi ye vha i thuba kha mmbi dze vha dzi lozwa, ₇na uri vho thutha tshi nengisaho tshe a tshi fhaṱa nṱha ha aḽiṱari ngomu ha Jerusalema, na uri vho fhaṱa mitsheṱo milapfu u mona na hukhethwa, zwa nga zwiḽa u rangani, na u mona na muḓi wa Anthiokhosi wa Bethe Tsuru.

₈Musi khosi i tshi pfa mafhungo ayo, ya farwa nga nyofho, ya tou tetemela. A ṱungufhala lwe a tou lwala, nge maano awe a pfuvha, a vhuya a tou lala thovhoni. ₉A lala henefho a fhedza maḓuvha manzhi ó ziamedzwa nga vhuṱungu ha u kundwa, a zwi ḓivha uri u ḓo ṱuwa a tshi fa.

₁₀Ndi hone a tshi vhidza khonani dzawe dzoṱhe a vha vhudza a ri, “A thi tsha kona u fara khofhe, mbilu yanga i khou mbwandamela nga u ḽa mbilu. ₁₁Ndo ḓivhudzisa nda ri, ‘Ndo welwa nga khombo-ḓe ndí kha magabelo aya a vhuṱungu? ₁₂Hufha ndo vha ndi na vhuthu, ndí mufunwa muvhusoni wanga.’ Hone zwino ndi khou humbula vhuvhi he nda ita Jerusalema ndi tshi hwala midzio yoṱhe ya musuku na siliva ye ya vha i ngomu hawo, nda amba uri vhadzuli vha Judia vha lozwiwe vha si na tshe vha tshinya. ₁₃Ndi ḓivha uri ndi zwone zwi nṱulelaho khombo idzi; zwino ndi khou fa ndi tshi vhavha ndí shangoni ḽa vhasili.”

₁₄Ndi hone a tshi vhidzisa Filipi, muṅwe wa khonani dzawe, a mu vhea uri a lange muvhuso wawe woṱhe. ₁₅A mu ṋea khare yawe ya vhuhosi na khanzu yawe na rinngi yawe ya luswayo, uri a eletshedze Anthiokhosi murwa wa khosi, a mu alusele vhuhosi. ₁₆Khotsi awe khosi Anthiokhosi a fela Pheresia nga ṅwaha wa ḓana na mahumi maṋa na miṱanu na miṋa (149).

₁₇Musi Lisiasi a tshi pfa upfi khosi yo dzama, a vhumba mutukana wa khosi Anthiokhosi a vha khosi, ndi ene we a mu lela musi a tshee ṅwana, a mu rina dzina ḽi no pfi Yuphathoro.

₁₈Vhanna vha re vhuimavhahali vho vha vha tshi khou ḓi endela u thivhela Vhaisraele ngomu u mona na hukhethwa, vha tshi ḓi ita vha tshi linga u vha huvhadza na u khwaṱhisa vhannḓa. ₁₉Hone Judasi a elekanya u vha lozwa, a ramba vhathu vhoṱhe uri a vha govhele. ₂₀Huno nga ṅwaha wa ḓana na mahumi maṱanu (150) vha kuvhangana, vha dia vhuimavhahali uho, a fhaṱa thawara dza u govhela na mitshini ya nndwa. ₂₁Vhaṅwe vha vho govhelwaho vha shavha, Vhaisraele vhaṅwe vho guneaho vha ḓibaḓekanya navho. ₂₂Vha takuwa vha ya ha khosi vha swika vha ri, “Vha ḓo litsha u ri lamukisa u swika lini? Ndi mini vha sa ri lifhedzeli vha hashu? ₂₃Ro tenda u shumela khotsi avho na u tevhedza ndaela dzavho na u thetshelesa maipfi avho. ₂₄Zwino ro wanani ngazwo? Vhana vha vhathu vha hashu vho shanduka maswina ashu! Vho vhulaha vhanzhi vhashu vhe vha vha wana, vha dovha vha ṱangula na thundu dzashu. ₂₅A vho ngo lwa na riṋe fhedzi, vho dovha vha dia na mashango oṱhe o ṋekanaho masakha na ḽavho. ₂₆Zwino edzonu vhona: Vho no govhela na vhuimavhahali vhu re Jerusalema uri vha vhu thube, vha ita na u fhaṱa mitsheṱo u mona na hukhethwa na u mona na Bethe Tsuru. ₂₇Vha sa ṱavhanya vha vha thivhela vha ḓo ita zwihulu zwi no fhira na izwi, vha si tsha vha kona.”

₂₈Musi khosi i tshi zwi pfa ya sinyuwa, ya ramba Dzikhonani na vhalangammbi na vhalangi vha vhanameli vha dzibere. ₂₉Ha ḓa na mmbi dza u rendelwa dzi tshi bva kha mivhuso miṅwe na dza seli ha lwanzhe. ₃₀Mmbi yawe yo vha i na vhahali vha tshimbilaho nga ṋayo vha no swika zwigidi zwa ḓana (100 000), vhanameli vha dzibere vhe zwigidi zwa mahumi mavhili (20 000), na nḓou dza mahumi mararu na mbili (32) dzo gudiswaho zwa nndwa. ₃₁Vha fhira vhukati ha Idumia, vha ṱoka mishasha u livhana na Bethe Tsuru. Vha lwa ha vhuya ha fhela maḓuvha manzhi, vha fhaṱa mitshini ya nndwa ya u govhela, hone Majuda vho govhelwaho vha bva muḓini vha vha tshoṱhela vha fhisa zwithu izwo, vha lwa nga vhuhali.

₃₂Ndi hone Judasi a tshi bva afho vhuimavhahali, a yo ṱoka mishasha yawe Bethe Zakaria, u livhana na mishasha ya khosi. ₃₃Khosi ya vuwa mapfuvhi a sa athu tswuka, ya ṱavhanya ya pfulusa mmbi nga gondo ḽi livhaho Bethe Zakaria, mmbi ya ḓilugisela nndwa, phalaphala dza lila. ₃₄Vha kambisa dzinḓou nga waini ya nḓirivhe na thebeila u dzi ṱuṱula uri dzi lwe. ₃₅Nḓou idzo dza kovhelwa vha tshimbilaho nga ṋayo, nḓou iṅwe na iṅwe yó ṋewa vhanna vha tshigidi (1 000) vho ambara khanzu dza tsimbi na miṅadzi ya musinaseṱha, na vhanameli vha dzibere vho nanguludzwaho vha maḓana maṱanu (500). ₃₆Avho vha dzula vho ima hune nḓou iyo ya vha hone, henefho hune ya tshimbilela hone, na vhone vha tshimbilela hone vha sa vhuyi vha fhambana nayo. ₃₇Nḓou iṅwe na iṅwe yo vha yo tibedzwa nga thawara ya thanda yo khwaṱhaho, yo vhofhelelwa khayo nga bannda, i tshi tshimbidzwa nga Muindia, yo namelwa nga vhahali vhararu vha tshi lwa vhe nṱha hayo. ₃₈Vhanameli vha bere vho salaho Lisiasi o vha vhea ngeno na ngeno lurumbuni lwa mmbi u itela u levhela maswina, vhone vhaṋe vhó pilwa nga vha tshimbilaho nga ṋayo. ₃₉Musi ḓuvha ḽi tshi vho penya kha zwiṱangu zwa musuku na zwa musinaseṱha, thavha dza tou penya nga tshedza tshazwo, dza funga unga mbone dza khavhu. ₄₀Tshipiḓa tshiṅwe tsha mmbi ya khosi tsha phapha zwivhangani, ngeno vhaṅwe vhe ngeno fhasi, vha ḓi kandela phanḓa vho dzudzanywa zwavhuḓi. ₄₁Vhoṱhe vhe vha pfa phosho ya gogo iḽo ḽa vhathu na mutsindo wavho vha tshi kanda na u kuḓana ha zwihali vha tetemela; ndi uri mmbi iyo yo vha i khulu, i na maanḓa.

₄₂Judasi na mmbi yawe vha sendela phanḓa uri vha yo lwa, ha rambaladzwa vhanna vha maḓana maṱanu na ḽithihi (600) vha mmbi ya khosi. ₄₃Eliazara, we a vha a tshi pfi Avarani, a vhona iṅwe ya nḓou idzo i no fhira dzoṱhe, a vhona unga yo vha yo fanela u namelwa nga khosi, ngauri yo vha yo tibedzwa nga tshipileli tsha musanda. ₄₄Zwenezwo a ṋekedza vhutshilo hawe a tshi itela u tshidza vhathu vha hawe, a ḓiitela dzina ḽa lini na lini. ₄₅A mbo ḓi i thamutshela a sa ofhi a tshi tou dzhena vhukati ha mmbi a tshi vhulaha ngeno na ngeno, vha wa nga zwitiko masia oṱhe. ₄₆A mbo ḓi gidima a sera fhasi ha nḓou a i runga a i vhulaha, ya wela fhasi ya mu tsika, a fela henefho. ₄₇Majuda vha tshi vhona maanḓa a mmbi ya musanda na u ofhisa ha vhahali, vha humela murahu.

₄₈Tshipiḓa tsha mmbi ya khosi tsha gonya Jerusalema u yo vha dia, khosi ya ṱoka mishasha Judia na Thavhani ya Tsioni. ₄₉A pfumedzana na vhathu vha Bethe Tsuru, vha bva afho muḓini nge vha vha vha si na zwiḽiwa henefho uri vha kone u konḓelela u govhelwa, ngauri uyo wo vha u ṅwaha wa Sabatha afho shangoni, hu sa liṅwi. ₅₀Khosi ya thuba Bethe Tsuru, ya vhea vhalindi vha u u linda. ₅₁Ha fhela maḓuvha manzhi o govhela hukhethwa, a vhea magidi na mitshini na zwiposi zwa mulilo na zwiposi zwa matombo na vhura ha u posa misevhe na matombo a gatho. ₅₂Majuda vha ḓilwela nga u ḓiitela mitshini yavho, ha fhela tshifhinga tshilapfu i tshi khou lwiwa. ₅₃Hone ho vha hu si na zwiḽiwa zwo vhulungwaho, ngauri wo vha u ṅwaha wa vhuṱanu na vhuvhili, nahone zwiḽiwa zwe zwa vha zwo vhulungwa zwo vha zwo fhedzwa nga vhe vha lamukiswa kha vhannḓa vha ḓiswa Judia. ₅₄Ho tou sala vhanna vha si gathi hukhethwa, vhaṅwe vha balangana muṅwe na muṅwe a livha hayani hawe, ngauri vho vha vho welwa nga nḓala khulu.

₅₅Lisiasi a pfa upfi Filipi, uḽa we khosi Anthiokhosi a mu vhea a sa athu dzama uri a gudise murwa wawe Anthiokhosi u vha khosi, ₅₆o vhuya a tshi bva Pheresia na Media na mmbi ye ya fhelekedza khosi, na uri u khou ṱoḓa u dzhia muvhuso. ₅₇Zwenezwo a mbo ḓi ṱavhanya a vhudza mmbi uri i takuwe, a vhudza khosi na vharangaphanḓa vha mmbi na vhahali a ri, “Nungo dzashu dzi khou ḓi fhungudzea ḓuvha ḽiṅwe na ḽiṅwe, mbuvha dzashu ho sala ṱhukhu, fhethu hune ra khou hu govhela ho khwaṱha, nahone ndi pfanelo yashu u sedza mafhungo a muvhuso washu. ₅₈Zwenezwo nga ri pfane na vhanna avha, ri pfumedzane navho na lushaka lwa havho lwoṱhe. ₅₉Nga ri vha vhofholole vha tshile vha tshi tevhedza milayo yavho u ḓi nga u rangani. Vha tshi vhuya vha sinyuwa vha ita zwithu izwi zwoṱhe, ndi nge ra thutha milayo yavho.”

₆₀Mafhungo ayo a takalelwa nga khosi na vharangaphanḓa. Ndi hone a tshi swikisa mafhungo a mulalo kha Majuda a ri nga ḽi lale, vhone vha zwi ṱanganedza. ₆₁Ndi hone khosi na vharangaphanḓa vha tshi vha itela muano, musi ho no pfaniwa nga u ralo vha ṱuwa dzhavheloni. ₆₂Hone musi khosi i tshi vho dzhena thavhani ya Tsioni, ya vhona uri dzhavhelo ḽo tsireledzwa hani nga mitsheṱo, ya mbo ḓi vhofholola muano we ya ana, ya ri mutsheṱo wo u tingeledzaho u thuthiwe. ₆₃Ndi hone a tshi ṱuwa nga u ṱavhanya a humela Antiokia, a wana Filipi a tshi vho vhusa muḓi uyo, a lwa nae a dzhia muḓi uyo nga khani.