Mbumbano ya Dimitriosi na Tholemiosi
1Khosi ya Egipita ya kuvhanganya mmbi dzayo, dzó anda unga muṱavha wa khunzikhunzini ya lwanzhe, na zwikepe zwinzhi; o vha a tshi khou linga u dzhia muvhuso wa Alekzannda nga vhufhura uri a engedze wawe ngawo. 2A dzhena Siria a tshi khou amba maipfi a mulalo, vhathu vha afho muḓini vha mu vulela khoro dzavho vha mu ṱanganedza, nga he vha laiwa nga khosi Alekzannda, ngauri Tholemiosi o vha e makhulu wawe.
3Hone musi Tholemiosi a tshi dzhena afho miḓini nga muthihi nga muthihi, o vhea vhahali vhawe muḓini muṅwe na muṅwe. 4Musi a tshi swika Ashidodo a sumbedzwa thembele ya Dagoni yo fhiswaho nga mulilo, na Ashidodo na u mona nawo ho phusukanywaho, na zwitumbu zwo rambalalaho hoṱhe, na zwitumbu zwa vhe vha fhiswa nndwani nga Jonathani, zwó khokhiwa u navha na nḓila yawe. 5Khosi ya vhudzwa zwe Jonathani a ita, vhathu vha tshi fulufhela uri i ḓo mu vhona mulandu, hone yone ya si ambe tshithu. 6Jonathani a ṱanganedza khosi nga mutsindo muḓini wa Jopa, vha reshana, vha eḓela henefho. 7Jonathani a fhelekedza khosi vha vhuya vha swika mulamboni wa Eleutherosi, a konou humela Jerusalema. 8Ndi hone khosi Tholemiosi a tshi thuba miḓi ya khunzikhunzini ya lwanzhe u vhuya u swika Selukia khunzikhunzini ya lwanzhe a tshi khou itela Alekzannda tshimbevha. 9A ruma vhaḓinḓa vha ya ha khosi Dimitriosi vha ri, “Nga vha ḓe, nṋe na vhone ri ite ndangano, ndi ḓo vha ṋea ṅwananyana wanga we a vhingwa nga Alekzannda, vhone vha konou vhusa vhudzuloni ha khotsi avho. 10Ndi pfa ndi tshi ḓisola nge nda ṋea Alekzannda ṅwananyana wanga, ngauri o vhuya a ṱoḓa u mmbulaha.” 11Ho vha hu u zwifhelela Alekzannda nge a vha a tshi emula shango ḽawe. 12Tholemiosi a mbo ḓi dzhia ṅwananyana wawe a mu ṋea Dimitriosi, ha vha u luṱana na Alekzannda, vha mbo thoma u vha maswina.
13Tholemiosi a dzhena Antiokia a ḓiambadza khare ya vhuhosi ha Asia. Zwenezwo a vho vha na khare mbili dza vhuhosi: ya Egipita na ya Asia.
Lufu lwa Alekzannda na lwa Tholemiosi
14Misi yeneyo khosi Alekzannda o vha e Kilikia, ngauri vhathu vha dzingu ḽeneḽo vho vha vha tshi khou vhanga. 15Musi Alekzannda a tshi pfa mafhungo ayo, a bvela Tholemiosi pfumo. Tholemiosi a bva u yo ṱangana nae e na mmbi yo khwaṱhaho, a mu kunda. 16Alekzannda a shavhela Arabia u yo ṱoḓa tsireledzo. Tholemiosi o vha o kunda tshoṱhe. 17Huno Zabudiele, muṅwe murangaphanḓa wa Maarabu, a tumula ṱhoho ya Alekzannda a i isa ha Tholemiosi. 18Huno musi ho no fhela maḓuvha mavhili, khosi Tholemiosi ene muṋe a dzama-vho, vhahali vhawe vha re miḓini ya madzhavhelo vha vhulahwa nga vhadzulapo vhayo. 19Zwenezwo Dimitriosi a vha khosi nga ṅwaha wa ḓana na mahumi maṱanu na ḽithihi na miṱanu na mivhili (167).
Pfano ya Jonathani na Dimitriosi
20Misi yeneyo Jonathani a kuvhanganya vhanna vhoṱhe vha Judia u yo dia vhuimavhahali ha Jerusalema, vha rekanya mitshini minzhi ya nndwa ya u u phusukanya. 21Maṅwe maswina a vhathu vha havho, vhanyadzi vha mulayo, vha ya ha khosi vha mu sevha uri Jonathani u khou govhela vhuimavhahali. 22Dimitriosi a tshi zwi pfa a sinyuwa, a mbo ḓi bva a livha Tholemai. A ṅwalela Jonathani uri a litshe mugovhelo, a mbo ḓi ṱangana nae Tholemai vha tou amba. 23Jonathani a tshi zwi pfa a vhudza vhahali vhawe uri mugovhelo u ye phanḓa, a konou nanga vhahulwane na vhaphrista vhaṅwe vha Israele vha u mu fhelekedza, a ḓiwedza khomboni nga u ya ha khosi muḓini wa Tholemai. 24O isa siliva na musuku na zwifhiwa zwiṅwe zwinzhi, khosi ya mu takalela, 25naho vhanna vhaṅwe vha lushaka lwa hawe vho ḓi mu pomoka, 26khosi ya mu itela vhuthu u ḓi nga vho i rangaho phanḓa, ya mu hulisa zwihulu phanḓa ha Khonani dzayo dzoṱhe. 27A pfumbisa vhuimo hawe ha u vha muphrista muhulwane, na vhuimo vhuṅwe hoṱhe he a vha e naho, na ha u vha muhulwane wa avho vha no pfi Khonani Khulwane dza khosi.
28Jonathani a humbela uri khosi i vhofholole Judia na madzingu mararu a Samaria a si bvise muthelo, a mu fulufhedzisa uri u ḓo bvisa thalennde dza maḓana mararu. 29Khosi ya tenda ya ṅwalela Jonathani luṅwalo holu i tshi amba mafhungo eneo ya ri,
30“Khosi Dimitriosi u khou resha murathu wawe Jonathani na lushaka lwa Majuda. 31Ri khou ni rumela khophi ya luṅwalo lwe ra ṅwalela Lasithenese shaka ḽashu ri tshi ṱanzilela inwi, uri ni zwi ḓivhe-vho. 32Lu ri, ‘Khosi Dimitriosi u khou resha muzwala wawe muhulisea Lasithenese. 33Vhunga lushaka lwa Majuda lu tshi ri takadza, ro elekanya u vha itela zwivhuya; ndi khonani dzashu dzine dza khunyeledza pfanelo dzadzo kha riṋe. 34Zwino, ri a khwaṱhisedza uri ndi vhone vhaṋe vha shango ḽa Judia, vha dovha vha ṋewa na ḽa Afairema na Lida na Ramathaimi. Madzingu hayo khathihi na ane a ṋekana masakha nao o dzhielwa Samaria a engedza ḽa Judia hu tshi itelwa vhane vha ri ṋekedzela zwiṱhavhelo vhudzuloni ha uri vha bvise mithelo ya musanda ye kale khosi ya vha i tshi i wana khavho ṅwaha muṅwe na muṅwe i tshi bviswa kha zwi liṅwaho mavuni na kha mitshelo ya miri. 35U bva ṋamusi ri a vha tendela uri vho vhofhololwa, u bva zwino a vha tsha ḓo lifha na zwiṅwe zwoṱhe zwe zwa vha zwi tshi ḓo vha zwashu, ndi uri, zwa tshafumi na muthelo wa muṋo na muthelo wa khosi yone iṋe.
36“ ‘U bva zwino a hu na na tshithihi tsha zwe zwa vhekanywa tshi no ḓo thuthiwa lini na lini. 37Zwenezwo vha vhone uri hu itwe khophi ya maipfi aya i ṋewe Jonathani, uri i ṱaniwe fhethu hune ha vhonala tshivhangani tshikhethwa.’ ”
Tshimbevha tsha Thirifoni
38Khosi Dimitriosi a vhona uri ḽo lala muvhusoni wawe, hu si tshee na ane a mu vhangisa, a vhofholola mmbi yawe yoṱhe, munna muṅwe na muṅwe a ye hayani hawe, ha tou sala mmbi dze a vha o tou dzi rendela dzi tshi bva kha zwiṱangadzime zwa tshakha dzisili. Zwenezwo vhahali vhoṱhe vhe vha shumela vho mu rangaho phanḓa vha vho mu shandukela. 39Munna muṅwe a no pfi Thirifoni, we kale a vha e wa ḽihoro ḽa Alekzannda, a tshi vhona uri mmbi dzoṱhe dzi khou gungulela Dimitriosi, a ya kha Muarabia a no pfi Imalakwe, we a vha a tshi khou alusa Anthiokhosi murwa wa Alekzannda, 40a ḓi endela u ita lunzili lwa uri Imalakwe a mu ṋee mutukana uyo uri a mu vhumbe khosi vhudzuloni ha khotsi awe. A ṱwa nae maḓuvha manzhi, a mu vhudza zwoṱhe zwe Dimitriosi a ita na uri vhahali vhoṱhe vho no mu shandukela.
Jonathani a tshi ima na Dimitriosi
41Zwenezwo Jonathani a ruma muthu a yo humbela khosi Dimitriosi uri a bvise mmbi dzawe vhuimavhahali ha Jerusalema na dzi re madzhavheloni, ngauri dzo vha dzi tshi ḓi endela u vutshela Israele. 42Dimitriosi na ene a swikisa maipfi ha Jonathani a tshi ri, “Inwi na lushaka lwa haṋu a thi nga ni iteli izwo fhedzi, ndi ḓo ni hulisa zwihulu musi tshifhinga tshi tshi ntendela. 43Zwo ralo zwi nga vha zwavhuḓi arali ni tshi nga ruma vhanna vha u nndwela, ngauri mmbi dzanga dzoṱhe dzo ntshandukela.”
44Ndi hone Jonathani a tshi ruma vhanna vha zwigidi zwiraru (3 000) vha re vhomakone vha nndwa vha ya kha Dimitriosi muḓini wa Antiokia. Musi vha tshi swika ha khosi, ya takalela u swika havho. 45Ho vha ho kuvhangana vhanna vha zwigidi zwa ḓana na mahumi mavhili (120 000) vha henefho muḓini vha tshi linga u vhulaha khosi. 46Vhanna avho vha vho langa mikoto mihulwane, vha thoma nndwa, hone khosi ya shavhela pfamoni, 47ya vhidza Majuda uri vha ḓe vha i phalale. Vhoṱhe vha mbo ḓi kuvhangana khae, vha balangana na muḓi. Musi wonoyo vha vhulaha vhanna vhane vha nga swika zwigidi zwa ḓana (100 000), 48vha ita na u fhisa muḓi vha u ṱangula zwinzhi, ha vha u tshidza khosi. 49Vhanna vha afho muḓini vha vhona uri Majuda vha khou ita zwine vha funa afho muḓini, vha kulea nungo, vha ṱavhela khosi mukosi vha tshi khou luvhelela, 50vha tshi ri, “Nga ri pfumedzane, vha vhudze Majuda uri vha litshe u ri dia na muḓi washu.” 51Ndi hone vha tshi laṱa zwihali zwavho fhasi, vha luvha. Majuda vha huliswa zwihulu nga khosi na nga vhalanda vhawe vhoṱhe, vha vha na bvumo muvhusoni woṱhe. Vha fhedza nga u humela Jerusalema vhe na thundu nnzhi ye vha thuba.
52Huno khosi Dimitriosi a dzula kha khuluṋoni yawe, vhuhosi hawe ha pfumba, ha si tsha vha na we a mu vhangisa. 53Hone a sala a tshi bva kha zwoṱhe zwe a vha o fulufhedzisa Majuda, a luṱana na Jonathani a si tsha mu pfufhela zwivhuya zwoṱhe zwe a mu itela, a thoma u mu sala murahu.
Hu tshi itwa mbumbano na Thirifoni
54Ngavhuya, Thirifoni a vhuya na Anthiokhosi, we a vha a tshee mutukana, a vhumbwa khosi a ambadzwa khare ya vhuhosi. 55Vhahali vhoṱhe vhe Dimitriosi a vha vhofholola uri vha ṱuwe, vha kuvhangana ha Anthiokhosi, vha lwa na Dimitriosi, a kundwa a tou shakuliswa. 56Thirifoni a thuba dzinḓou, a ita na u thuba muḓi wa Antiokia.
57Zwino mutukana Anthiokhosi a ṅwalela Jonathani luṅwalo a ri, “Ndi a vha khwaṱhisa u vha muphrista muhulwane, nahone ndi vha vhea u vha muvhusi wa madzingu maṋa, hafhu ndi tama uri vha vhe muṅwe wa Khonani dza Khosi.” 58Anthiokhosi a ita na u rumela Jonathani ndilo na zwa u ḽela khazwo zwa musuku, a mu ṋea na pfanelo ya u nwa nga tshinwelo tsha musuku na u ambara dza muridili wa vhuhosi na u ambara bannda ḽa musuku. 59Simoni mukomana wa Jonathani, khosi ya mu vhea u vha muvhusi wa dzingu ḽa u bva Vhunamelo ha Tiro u swika masakhani na Egipita.
60Jonathani a takuwa a fara lwendo u buḓekanya Vhukovhela ha Yufuratha na miḓi yaḽo, mmbi dzoṱhe dza Siria dza kuvhangana khae dza vhumbana nae. Musi a tshi swika Ashkeloni, vhadzulapo vhaho vha mu ṱanganedza nga mutsindo, 61hone musi a tshi livha Gaza, vhathu vha Gaza vha vala khoro dzavho uri a si dzhene. Zwenezwo a u govhela a u fhisa, a ṱangula miḓi yo u tangaho. 62Ndi hone vhathu vha Gaza vha tshi humbela uri a vha khathutshele, a pfumedzana navho. A dzhia vhatuka vha vhavhusi vhavho a vha ita zwivhoxwa, a vha isa Jerusalema. Ndi hone a tshi buḓekanya shango a vhuya a swika Damasko.
Hu tshi lwiwa na Dimitriosi
63Jonathani a pfa upfi vhalangammbi vha Dimitriosi vho ḓa na mmbi khulu muḓini wa Kadeshe kha ḽa Galelia, vha khou lwisa u mu bvisa mushumoni wawe. 64Zwenezwo a yo ṱangana navho, a sia mukomana wawe Simoni afho shangoni. 65Simoni a govhela Bethe Tsuru, a lwa nawo maḓuvha manzhi, a valela vhapo vhawo uri vha si bvele nnḓa, 66vha vhuya vha humbela u pfumedzana nae, a tenda. A vha thatha afho muḓini a u thuba, a vhea vhahali henefho.
67Zwenezwo Jonathani na mmbi yawe vha ṱoka mishasha tsini na Dzivha ḽa Genesaretha, nga maḓautsha vha bubela mudavhini wa Hatsoro. 68Henefho phanḓa hawe mudavhini ho vha hu na mmbi ya vhatsinda. Mmbi iyo yo ranga u mu lalela dzithavhani, ya konou bvela khagala ya mu tshoṱhela. 69Vhanna vho vha lalelaho vha tshi dzumbuluwa vhudzumbamoni, vha lwa navho vha vha tinga, 70vhahali vhoṱhe vha Jonathani vha shavha ha si sale muthu, ha tou sala mulangammbi Mathathiasi, murwa wa Abisalomu, na Judasi murwa wa Khalifi. 71Jonathani a kherukanya zwiambaro zwawe, a ḓishela mavu ṱhohoni, a rabela. 72Ndi hone a tshi vhuelela nndwani, a kunda maswina a tou vha shakulisa. 73Vhahali vhawe vhe vha vha vha tshi khou shavha vha zwi vhona, vha vhuya, vha vho pandamedza maswina u vhuya u swika mishashani yavho ya Kadeshe, henefho vha ṱoka yavho mishasha. 74Musi uyo ha rambalala vha zwigidi zwiraru (3 000) vha mmbi ya vhatsinda. Ndi hone Jonathani a tshi vhuelela Jerusalema.
