1 VHAMAKHABI 1

₁Alekzannda wa Makedonia, murwa wa Filipi, o ḓa a tshi bva shangoni ḽa Kitimi, a kunda Dariosi, khosi ya Vhapheresia na Vhamedia, a vha khosi vhudzuloni hawe, ó ranga u vhusa kha ḽa Giriki. ₂Alekzannda o lwa nndwa nnzhi, a thuba madzhavhelo, a vhulaha mahosi a ḽifhasi. ₃O fhirela phanḓa o livha migumoni ya ḽifhasi, a thuba thundu dza tshakha nnzhi. Musi a tshi vhona ḽifhasi ḽo dzika, a thoma u ḓihudza, a ḓiḓivha. ₄O vhumba mmbi yo khwaṱhaho vhukuma, a luvhisa mashango na dzitshakha na vhavhusi, vha vha vhalanda vhawe. ₅Hone musi o no ita zwoṱhe izwo, a lwala, a zwi vhona uri lufu lwawe lu tsini. ₆Ndi hone a tshi vhidza magota awe, vhaḓivhalea vhe a aluwa navho a tshi kha ḓi vha nga hawe, a vha kovhekanya muvhuso wawe a tshi kha ḓi tshila. ₇Alekzannda a dzama ó vhusa miṅwaha ya fumi na mivhili.

₈Zwenezwo magota awe a thoma u vhusa, muṅwe na muṅwe a vhusa dzinguni ḽawe. ₉Musi Alekzannda o no dzama, magota ayo oṱhe a ambara khare dza vhuhosi, na vhana vhavho vha vha tevhela vha ḓi ita nga u ralo ha vhuya ha fhela miṅwaha minzhi, vha tshinya zwinzhi ḽifhasini.

₁₀Kha vhenevho ha mela ḓadzwane ḽivhi, ene Anthiokhosi Ephifanese, murwa wa khosi Anthiokhosi, we a vhuya a farwa a dzula Roma. Anthiokhosi Ephifanese o vha khosi nga ṅwaha wa ḓana na mahumi mararu na miṱanu na mivhili (137) wa muvhuso wa Magiriki.

₁₁Misi yeneyo kha Vhaisraele ho bvelela vhanna vhe vha vha vhe vhapfuki vha Mulayo, vha xedza vhathu vhanzhi vha tshi ri, “Nga ri yo ita pfano na vhannḓa vha re vhadzulelani vhashu, vhunga tshee ra fhandekana navho, ro welwa nga khombo nnzhi.” ₁₂Muhumbulo uyo vha u takalela. ₁₃Vhaṅwe vhavho vha mbo ḓi ṱavhanya vha ya ha khosi, a vha tendela uri vha thome u tevhedza kutshilele kwa vhannḓa. ₁₄Ndi hone vha tshi fhaṱa fhethu ha mitambo Jerusalema vha tshi tevhedza maitele a vhannḓa. ₁₅Vha thutha luswayo lwavho lwa u fumba, vha ṱutshela mulanga mukhethwa, vha ima na vhannḓa, vha tou ḓikumedza vhutshinyi tshoṱhe.

₁₆Anthiokhosi musi a tshi vhona unga muvhuso wawe wo ṱoka midzi, a ri u ṱoḓa u vha khosi ya Egipita, uri a vhe khosi ya mivhuso iyo mivhili. ₁₇Anthiokhosi a dia shango ḽa Egipita e na mmbi khulu, na dzigariki na dzinḓou na zwikepe zwinzhi, ₁₈u yo lwa na Tholemiosi, khosi ya Egipita. Tholemiosi a tshi vhona Anthiokhosi a tshi swika, a tshenuwa a shavha, a sia khuvhabvu nnzhi. ₁₉Miḓi yo tsireledzwaho ya shango ḽa Egipita ya thubiwa, Anthiokhosi a ṱangula shango ḽa Egipita.

₂₀Anthiokhosi musi o no kunda Egipita nga ṅwaha wa ḓana na mahumi maṋa na miraru (143), a huma a gonya Israele a swika Jerusalema e na mmbi khulu. ₂₁Anthiokhosi a dzhena hukhethwa nga lunyadzo, a dzhia aḽiṱari ya musuku na tshivheambone na zwoṱhe zwi shumaho khatsho. ₂₂A dzhia na ḓafula ḽa mikonde ya tshinkwa tshi sumelwaho Midzimu, na zwinwelo zwa nduvho ya zwinwiwa, na dzindilo na midzio ya musuku ya u dubisa zwioro, na luvhemba lwa lupila na dzikhare na makolo a musuku a re phanḓa ha thembele, a ṱangula zwoṱhe. ₂₃A dzhia musuku na siliva na midzio ya mutengo muhulu, a ita na u dzhia lupfumo lwo dzumbiwaho lwe a lu wana. ₂₄Anthiokhosi a hwala zwoṱhe izwo a ṱuwa nazwo a vhuelela shangoni ḽawe. Izwo ndi musi o no amba nga lunyadzo a vhulaha vhathu vhanzhi.

₂₉Ngavhuya ho no fhela miṅwaha mivhili, khosi ya ruma muthelisi muhulwane miḓini ya Judia, a swika Jerusalema na mmbi khulu. ₃₀A vha fhura nga maipfi a mulalo, vha mu fulufhedza. Ndi hone a tshi mbo ḓi tshoṱhela muḓi uyo kathihi fhedzi, a u phusukanya, a lozwa vhathu vhanzhi vha Israele. ₃₁A ṱangula muḓi uyo a u voṱa nga mulilo, a pwasha nnḓu dzawo na mitsheṱo yo u tangaho. ₃₂Vha hwala vhasadzi na vhana vha vha ita mathubwa, vha dzhia na kholomo. ₃₃Ndi hone vha tshi vusa Muḓi wa Dafita, vha fhaṱa mutsheṱo muhulu mulapfu, na thawara dza u khwaṱha, ha vha vhuimavhahali havho. ₃₄Henefho vha vhea vhathu vhavhi, vhanna vha no nyadza mulayo, vhenevho vha ḓitika henefho ngomu, ₃₅vha khokha zwihali na zwiḽiwa, zwe vha ṱangula Jerusalema vha zwi kuvhanganya vha zwi vhea henefho. Vha tou vha tshira tshihulu.

₄₁Zwino khosi ya bvisa mulevho wa iswa muvhusoni wayo woṱhe wa uri vhoṱhe vha vhe lushaka luthihi, ₄₂muṅwe na muṅwe a landule maitele a lushaka lwa hawe. Vhannḓa vhoṱhe vha tenda mulayo wa khosi. ₄₃Vhaisraele vhanzhi vha takalela vhurereli ha khosi, vha ṋekedza midzimu ya zwifanyiso zwiṱhavhelo, Sabatha vha i nyadza.

₄₄Khosi ya ruma vhaḓinḓa vhe na maṅwalo vha isa Jerusalema na miḓini ya Judia, ya vha vhudza uri vha tevhedze maitele asili a si a shango ḽavho: ₄₅ha dzivhiswa zwiṱhavhelo zwi fhiswaho, na nduvho, na nduvho ya zwinwiwa, zwa si tsha ṋekedzwa thembeleni, ha pfi hu nyadzwe Sabatha na maḓuvha a vhuṱambo, ₄₆hu kumadzwe thembele na vhathu vho kumedzwaho Mudzimu, ₄₇hu fhaṱwe aḽiṱari dza zwitungulo na zwifho zwa midzimu, hu ṋekedzwe zwiṱhavhelo zwa nguluvhe na dziṅwe phukha dzo iledzwaho, ₄₈vhathu vha dzivhiswa u fumbisa vhana vhavho, vha kombetshedzwa u ḓikumadza nga tshifhio na tshifhio tsho iledzwaho na tshi nengisaho, ₄₉uri vha hangwe mulayo vha shandukise ndayo dzoṱhe. ₅₀Muthu ane a vhuya a hana u tevhedza ndayo ya khosi a pfi a vhulahwe.

₅₁Milayo yo raloho yo anḓadzwa muvhusoni wa khosi woṱhe. Khosi ya vhea vhaṱoli vha u sedza vhathu vhoṱhe, ya laya vha miḓi ya Judia uri vha ṋekedze zwiṱhavhelo zwo raloho miḓini yoṱhe. ₅₂Vhathu vhanzhi, vhoṱhe vho ṱutshelaho mulayo, vha baḓekana navho, vha ita vhutshinyi afho shangoni. ₅₃Vhaisraele vha ngoho vha shavha vha yo dzumbama fhethu hune vha nga wana vhudzumbamo.

₅₄Nga ḓuvha ḽa fumi na vhuṱanu ḽa ṅwedzi wa Khisilevi, nga ṅwaha wa ḓana na mahumi maṋa na miṱanu (145), khosi ya fhaṱa vhuṱudzi vhu ḓisaho mutshinyalo nṱha ha aḽiṱari ya tshiṱhavhelo tshi fhiswaho, vha fhaṱa aḽiṱari dza zwitungulo miḓini yo monaho na ḽa Judia. ₅₅Vha ita na u dubisa zwioro mahothini a dzinnḓu na mikotoni. ₅₆Bugu dza mulayo dze vha dzi wana vha dzi kherukanya, vha dzi fhisa. ₅₇Muthu we a wanwa e na bugu ya mulanga kana a tshi tevhedza mulayo, a haṱulelwa lufu nga mulayo wa khosi. ₅₈Zwenezwo vha ḓi endela u tambudza Vhaisraele vhe vha farwa miḓini ṅwedzi muṅwe na muṅwe nge vha nyadza mulayo wa khosi. ₅₉Musi ṅwedzi muṅwe na muṅwe ú na maḓuvha a mahumi mavhili na maṱanu (25), vho vha vha tshi ṋekedza tshiṱhavhelo kha aḽiṱari yo fhaṱwaho nṱha ha aḽiṱari ya zwiṱhavhelo zwi fhiswaho. ₆₀Vhasadzi vhe vha fumbisa vhana vhavho vho vha vha tshi vhulahwa hu tshi tevhedzwa mulayo uyo, ₆₁tshetshe dza nembeledzwa mikuloni ya vhomme adzo, vha miṱa yavho na vhe vha fumbisa vhana avho, na vhone vha vhulahwa. ₆₂Naho zwo ralo vhanzhi kha ḽa Israele vha ḓi ima vho khwaṱha, mbiluni dzavho vha ri vha nga si ḽe zwiḽiwa zwo iledzwaho. ₆₃Vha vhona zwi khwiṋe u fa u fhira u ḓikumadza nga zwiḽiwa zwo iledzwaho kana u nyadza mulanga mukhethwa, vhukuma vha fa. ₆₄Vhukuma mbiti dza Mudzimu dza tou ziamedza Vhaisraele.