1 JOHANISI 1

₁Ri ni ṅwalela nga Ipfi ḽi ri ṋeaho vhutshilo, ḽe ḽa vha ḽi hone u bva mathomoni. Ro zwi pfa nga dzashu nḓevhe, ra zwi vhona nga ashu maṱo, ra zwi sedza, ra zwi kwama nga zwanḓa zwashu. ₂Vhutshilo honoho ro vhu dzumbululelwa ra vhu vhona; ri ṱhanzi dzazwo. Zwino riṋe fhano ri ni ḓivhadza zwa vhutshilo vhu sa gumi he ha vha vhu na Khotsi, ha vhuya ha dzumbululelwa riṋe.

₃Ndi zwone, zwe ra zwi vhona ra zwi pfa ri zwi ḓivhadza-vho na inwi, uri na inwi ni vhe vhathihi na riṋe; iṱali roṱhe ro no vha vhathihi na Khotsi na Murwa wawe Yesu Khristo. ₄Ri ni ṅwalela hezwi uri ri takale tshoṱhe.

₅Zwino-ha ndaedzo ye ra pfa ngae, ine zwino ra ni ḓivhadza yone ngei: Mudzimu ndi tshedza, khae a hu na swiswi na kathihi.

₆Zwenezwo arali ri tshi ri ri vhathihi nae, hone ri tshi ḓi tshila swiswini, ndi mazwifhi fhedzi, ro no bva ngohoni. ₇Hone arali ri tshi tshila tshedzani unga Ene e tshedzani, ndi hone ri tshi ḓo vha na vhukonani nga tshashu, malofha a Yesu Murwa wawe a ri ṱanzwa vhutshinyi hoṱhe. ₈Arali ra ri a ri khakhi, ndi u ḓifhura, a ro ngo ima ngohoni. ₉Hone arali ri tshi tenda zwe ra tshinya, Mudzimu u a ri hangwela a ṱanzwa vhuvhi hashu hoṱhe; ha khakhi, zwe a ri fulufhedzisa u a zwi ita. ₁₀Arali ra ri a ri athu tshinya, ri khou mu ita muzwifhi; zwenezwo na ipfi ḽawe a ro ngo vhuya ra ḽi swielela.