1 VHAKORINTA 12

₁Vha hashu, musi ri tshi ḓa kha mpho dza Muya Mukhetwa, hu na zwiṅwe zwine nda tama ni tshi zwi ṱalukanya zwavhuḓi. ₂Ni a zwi ḓivha uri musi ni tshee vhannḓa no vha ni tshi sokou kumbiwa na kungelwa kha midzimu ya zwimuma.

₃Zwino ni ḓivhe uri haho ane a nga ri, “Yesu kha a teketelwe!” o funzedzwa nga Muya wa Mudzimu; nahone haho-vho ane a nga ri, “Yesu ndi Muṋe wa zwoṱhe!” a songo funzedzwa nga Muya Mukhethwa.

₄Hu na mpho dzo fhambanaho, Muya Ene ane dza bva khae e muthihi. ₅Hu na mishumo yo fhambanaho ya u fhaṱa tshivhidzo, hone Muṋe washu ane ra mu shumela ngayo e muthihi. ₆Maanḓa a Mudzimu a shuma nga nḓila dzo fhambanaho, hone Mudzimu e onoyo muthihi ane a ṋea vhoṱhe havho nungo uri vha kone u shuma. ₇Muya u ḓidzumbulula kha muṅwe na muṅwe uri a kone u shumela tshivhidzo nga he a ṋewa ngaho nga Muya. ₈Muṅwe u ṋewa vhuṱali ha u eletshedza, i tshi bva kha Ene Muya, ngeno muṅwe a tshi ṋewa nḓivho nga onoyo Muya muthihi; ₉muṅwe a ṋewa lutendo lwo khwaṱhaho nga onoyo Muya, ngeno muṅwe a tshi ṋewa mpho dza u fhodza vhathu, muṋei e onoyo Muya; ₁₀muṅwe a ṋewa maanḓa a u ita maḓembe; muṅwe a ṋewa mpho ya u ḓivhadza vhathu zwe Mudzimu a dzudzanya; muṅwe a ṋewa vhukoni ha u ṱalukanya mishumo ya Muya wa Mudzimu na ya mimuya isili; muṅwe a ṋewa u kona u amba ndimidzo fhambanaho, muṅwe a ṋewa mpho ya u dzi ṱalutshedza; ₁₁zwoṱhe hezwo u mushumo wa Muya onoyo muthihi ane a kovhela muṅwe na muṅwe nga hune Ene Muya a funa.

₁₂Khristo ri nga mu fanyisa na muvhili wa muthu: naho u na miraḓo minzhi u ḓi vha muvhili muthihi. ₁₃Zwenezwo riṋe roṱhe ro lovhedzwa ra ṋewa Muya muthihi ra vha muvhili muthihi nga u ralo, hu sa londwi uri u Mujuda kana u Mugiriki kana u phuli, kana u muḓilangi; nahone ndi onoyo Muya muthihi we ra mu nwa roṱhe.

₁₄Hafhu muvhili a si muraḓo muthihi fhedzi, u na miraḓo minzhi. ₁₅Arali lwayo lu tshi nga ri, “Vhunga nṋe ndi si tshanḓa a thi muraḓo wa hoyu muvhili,” ndi uri lwo no tumuwa kha muvhili nge lwa ralo naa? ₁₆Nahone arali nḓevhe i tshi nga ri, “Vhunga nṋe ndi si iṱo, a thi muraḓo wa muvhili,” izwo zwi nga i tumula i sa tsha vha muraḓo wa muvhili naa? ₁₇Arali muvhili woṱhe wo vha u tshi tou vha iṱo wo vha u tshi ḓo pfa nga mini? Hu ḓi nga arali muvhili woṱhe wo vha u nḓevhe fhedzi, wo vha u tshi ḓo nukhedza hani? ₁₈Zwó ralo Mudzimu o vhea muraḓo muṅwe na muṅwe wa muvhili he a funa u tshi dzula hone. ₁₉Arali muvhili woṱhe wo vha u muraḓo muthihi ndi musi u tshi kha ḓi vha muvhili naa? ₂₀Huno-ha miraḓo ndi minzhi, muvhili wone u muthihi.

₂₁Zwenezwo iṱo ḽi nga si ambe na tshanḓa ḽa ri, “Thi na mushumo na iwe!” Na yone ṱhoho i nga si ambe na milenzhe ya ri, “Thi na mushumo na inwi!” ₂₂Kha ri dzou sedza miraḓo ine ya tata: yeneyo ndi yone ine arali i siho ra sa kone u tshila; ₂₃nahone yeneyo miraḓo ine ra vhona unga i a nyadzisea, ndi yone ine ra i vhavhalela nga zwiambaro u fhira miṅwe. Zwenezwo miraḓo i shonisaho i a londoleswa, ₂₄ngeno yo nakaho i si na mushumo nazwo. Ndi Mudzimu we a vhumba muvhili nga u ralo, miraḓo i nyadzeaho a i hulisa u fhira miṅwe, ₂₅uri miraḓo yoṱhe i anḓane, i farisane u eḓana. ₂₆Arali muraḓo muthihi u tshi pfa vhuṱungu, na miṅwe yoṱhe i a vhu pfa; arali muraḓo muthihi u tshi khoḓwa, na miṅwe yoṱhe i a takala.

₂₇Zwó ralo inwi noṱhe ni muvhili wa Khristo; muṅwe na muṅwe waṋu ndi muraḓo wa wonoyo muvhili. ₂₈Zwenezwo tshivhidzoni Mudzimu o vhekanya vhoṱhe vhuimoni havho: vha phanḓa ndi vhaapostola, ha ḓa vha na mpho ya u ḓivha zwe Mudzimu a dzudzanya, ha ḓa vhafunzi, ha konou tevhela vha itaho maḓembe, vha tevhelwa nga vho ṋewaho mpho ya u fhodza, kana ya u farisa vhaṅwe kana ya u ranga tshivhidzo phanḓa, kana ya u amba ndimi dzo fhambanaho. ₂₉Kani-ha vhoṱhe ndi vhaapostola? Kani-ha vhoṱhe vha na mpho ya u ḓivha zwe Mudzimu a dzudzanya? Kani vhoṱhe ndi vhafunzi? Vhoṱhe vha na mpho ya u ita maḓembe naa? ₃₀kana ya u fhodza malwadze? kana ya u amba nga nyambo dzo fhambanaho? kana ya u dzi ṱalutshedza? ₃₁Zwino-ha, vheani mbilu dzaṋu kha mpho dzone-dzone.

Hone maitele a no fhira oṱhe asia: