LUIMBOIMBO 1

₂Nkhiseni! Nkhiseni ni tshi dovha!

Lufuno lwaṋu lu ḓifha u fhira waini.

₃Zwiḓolo zwaṋu zwi tou nukhelela.

Dzina ḽaṋu ndi tshi ḽi pfa

zwi nga ndi pfa zwiḓolo zwo shululwaho.

Ndi zwine na tou vha tshililelwa tsha vhasidzana.

₄Nkokodzeni ri mbo ḓi ṱaha,

ni mbo ḓi vha khosi yanga,

ni nnyise pfamoni dzaṋu!

Ri ḓo dzula roṱhe ro takala,

ndi tshi khoḓa lufuno lwaṋu lu no takadza u fhira waini.

Vhasidzana vhoṱhe vha tshi ni funa a zwi kanukisi.

₅Inwi vhasadzi vha Jerusalema,

nṋe ndo swifhala, hone ndo naka.

Ndo swifhala unga dennde dza Kedara,

hone ndo naka

unga lupila lwa pfamo ya Solomoni.

₆Ni songo nṱalela nga u vhona ndo swifhala,

ndó swa nga ḓuvha;

khaladzi dzanga vho mpfara nga tshiṱuhu,

vha ntshumisa tsimuni ya minḓirivhe,

lunako lwanga, yone tsimu yanga,

nda lu ṅaledza.

₇Edzonu mmbudza,

inwi mufunwa wa mbilu yanga:

Nngu dzaṋu ni dzi lisa ngafhi?

Masiari ḓuvha ḽi tshi fhisa ni dzi awedza ngafhi?

Vhaṅwe vhalisa vha ḓo ri mini

vha tshi vhona ndi tshi tendeleka ndi tshi ni ṱoḓa?

₈A ni hu ḓivhi naa,

inwi ni no fhira vhasadzi vhoṱhe nga lunako?

Tevhelani vhuṱala ha sambi,

ni wanele mbudzi dzaṋu pfulo tsini ha dennde dza vhalisa.

₉Mufunwa wanga,

ni ntakadza unga bere ya tsadzi i no kokodza gariki yanga

i no bva ha Farao.

₁₀Ṱhaha dzaṋu dzo naka hani nó ḓiṱama nga zwiṅina,

nó tanda mukulo waṋu nga vhulungu ha tsetshela!

₁₁Nṋe ndi ḓo ni itela vhulungu ha musuku

ho vangiwa nga siliva.

₁₂Musi khosi i pfamoni dzayo na vhaṱanuni,

nṋe tshiḓolo tshanga tsho vha tsho ḓadza muya

nga u nukhelela u ḓifha,

₁₃mufunwa wanga a tshi nga tshiḓolo tsha zwinukheleli

hezwi o ḓitika nga maḓamu anga.

₁₄Mufunwa wanga u nga maluvha a ḓaka

ane a fhufhuma masimuni a minḓirivhe,

masimuni a Engedi.

₁₅No naka hani, mufunwa wanga,

no naka hani!

Maṱo aṋu a penya unga a ḽiivha.

₁₆No naka hani, mufunwa wanga!

Ni ntakadza hani!

Ri ḓo shuvhama hatsini vhudala,

ha vha hone vhulalo hashu.

₁₇Mikedara i ḓo vha yone phuphu

dza pfamo yashu,

ṱhanga í miṱaululo.