VHAROMA 2

₁Asizwo-ha iwe mudzia-u-haṱula vhaṅwe, naho u tshi nga vha nnyi, a u na tshine wa nga ḓiṱamba ngatsho. U tshi haṱula vhaṅwe ndi u ḓivhea mulandu-vho. Hufha iwe muṋe u tshi ita zwenezwo-vho. ₂Zwino tshine ra ḓivha ndi uri Mudzimu u ita zwone a tshi haṱula vhathu vhane vha ita zwa u ralo. ₃Kani iwe une wa haṱula vhaṅwe, hu uri na iwe u ita zwenezwo zwine vhone vha ita, u vhona unga u nga ponyoka khaṱhulo ya Mudzimu? ₄Kani-ha u khou tou nyadza vhulenda hawe vhuhulu na u konḓelela hawe na u sa fhela hawe mbilu? A u zwi vhoni uri vhulenda ha Mudzimu ndi ha uri iwe u laṱe vhuvhi naa? ₅Hone nga tshipimbi tshau na mbilu i sa laṱi vhuvhi hayo, u khou ḓiṋaṋisela ṱhamu ya Mudzimu ine ya ḓo vhonala nga ḓuvha ḽa khaṱhulo yawe i sa khakhi. ₆Ndi hone Mudzimu a tshi ḓo ṋea muṅwe na muṅwe zwo fanelaho mishumo yawe. ₇Vhane vha lusa u ita zwivhuya uri vha wane vhugala na u huliswa na u sa fa, u ḓo vha fha vhutshilo vhu sa fheli. ₈Vhane vha londa zwavho fhedzi, vha sa thetshelesi vha tshi vhudzwa ngoho, vha tshi takalela vhutshinyi, u ḓo vha rwa ó sinyuwa. ₉Muṅwe na muṅwe ane a tshinya u ḓo shengela a tambula. Zwi ḓo thoma kha Mujuda, hone na wannḓa ha nga ponyoki. ₁₀Hone muṅwe na muṅwe ane a ita zwivhuya u ḓo wana vhugala na khuliso na mulalo. Hu ḓo thoma Mujuda, ha tevhela wannḓa. ₁₁Mudzimu ha ṱaluli.

₁₂Vho tshinyaho vha si na Mulayo wa Mushe, vha ḓo ḓi lovha vha si nawo. Vho tshinyaho vhe na Mulayo, vha ḓo sengiswa hu tshi tevhedzwa wone Mulayo; ₁₃ngauri vhane Mudzimu a ri vha pfi vhavhuya a si avho vhane vha sokou pfa Mulayo nga nḓevhe fhedzi, ndi vhane vha tou ita zwine Mulayo wa amba. ₁₄Vhannḓa a vha na Mulayo wa Mushe, hone arali nga nzulele vha tshi ita zwiṅwe zwine Mulayo wa amba zwone, zwi amba uri mulayo ndi vhone vhaṋe naho Mulayo wa Mushe vha si nawo. ₁₅Zwi sumbedza uri zwine Mulayo wa amba zwo ṅwaliwa mbiluni dzavho, na luvalo lu a ṱanzilela-vho; vha tshi elekanya vha a ḓipfa vhone vhaṋe uri: afha ndo khakha, huṅwe vha dovha vha ḓipfa uri: afha a tho ngo khakha. ₁₆Ndi zwone zwine nda amba ndi tshi ḓivhadza mafhungo maḓifha, nda ri zwi ḓo ralo nga ḓuvha iḽo ḽihulu ḽine Mudzimu a ḓo sengisa vhathu zwo dzumbamaho mbiluni dzavho, nga Yesu Khristo.

₁₇Zwino iwe-ha? U ri u pfi Mujuda; wa ḓitika nga Mulayo wa Mushe, wa zuwa Mudzimu; ₁₈wa ri u ḓivha zwine Mudzimu a funa, u kona u nanga zwi re khwiṋe vhunga wo funzwa nga Mulayo; ₁₉u ḓiita “mudededzi wa mabofu”, wa ri u “tshedza tsha avho vha re swiswini”, ₂₀u “mufunzi wa vha sa ḓivhiho tshithu”, u “mudededzi wa zwixele”, vhunga u na Mulayo u katelaho nḓivho yoṱhe na ngoho yoṱhe. ₂₁U kona u funza vhaṅwe – khe u sa ḓifunzi iwe muṋe; u laya vhathu uri vha songo tswa – iwe a u tswi? ₂₂U ri hu songo itwa vhupombwe – iwe a u iti naa? U tshi nengwa midzimu, iwe thundu dza thembele a u tswi? ₂₃U tshi zuwa Mulayo wa Mudzimu a u nyadzisi Mudzimu nga u pfuka Mulayo naa? ₂₄Ndi zwine Maṅwaloni ha pfi, “Inwi Majuda ni ita uri vhannḓa vha nyefule Mudzimu.”

₂₅U fumba Tshijuda hu a farisa arali u tshi ita zwine Mulayo wa amba; hone arali u mupfuki wa Mulayo ndi tshifa u songo vhuya wa fumba. ₂₆Zwino arali muthu a songo fumba, hone a tshi tevhedza zwine Mulayo wa amba, Mudzimu a nga si mu ite sa o fumbaho na? ₂₇Wannḓa a songo fumbaho muvhili arali a tshi tevhedza tshoṱhe Mulayo u ḓo haṱula iwe Mujuda, ngauri naho u na Maṅwalo, wo fumba, u ḓi vha mupfuki wa Mulayo. ₂₈Mujuda a si uyo ane vhathu vha vhona e Mujuda; u fumba vhukuma a si ha muvhilini hu vhonwaho nga vhathu. ₂₉Mujuda ndi a re Mujuda mbiluni yawe; u fumba vhukuma ndi ha mbiluni, a si zwi itwaho nga mulayo wo tou ṅwaliwaho, ndi mushumo wa Muya. Mujuda a si ane a rendwa nga vhathu, ndi ane a rendwa nga Mudzimu.