NZUMBULULO 10

₁Zwenezwo nda vhona muṅwe muruṅwa wa maanḓa a tshi bva ṱaḓulu o putelwa nga gole, ṱhohoni o ambara musingavhadzimu, tshifhaṱuwo tshawe tshi tshi penya sa ḓuvha, milenzhe yawe i tshi nga phuphu dza mulilo, ₂tshanḓani o fara kubugwana kwo vulwaho, o kanda lwanzhe nga mulenzhe wa tshauḽa, wa tshamonde wo kanda shangoni. ₃A vhidzelela nga ipfi ḽihulu ḽi vhombaho sa ndau. O no vhidzelela ha fhindula mibvumo miṱanu na mivhili. ₄Ndi tshi kha ḓi tou ri ndi a ṅwala zwo ambiwaho nga mibvumo iḽa miṱanu na mivhili nda pfa ipfi ḽi bvaho ḽiṱaḓulu ḽi tshi ri, “Zwe wa zwi pfa nga iḽa mibvumo miṱanu na mivhili u songo zwi ṅwala, nga tshi vhe tshiphiri.”

₅Uḽa muruṅwa we nda vhona o ima nṱha ha lwanzhe na shango a imisela tshanḓa tshauḽa ṱaḓulu, ₆a ana nga a tshilaho lini na lini, Ene o sikaho ḽiṱaḓulu na ḽifhasi na lwanzhe na zwoṱhe zwi re khazwo, a ana a ri, “A zwi tsha ḓo lenga. ₇Musi muruṅwa wa 7 a tshi lidza phalaphala yawe, ndi hone Mudzimu a tshi ḓo khunyeledza tshiphiri tsha zwe a dzula o zwi dzudzanya, sa zwe a ḓivhadza vhaporofita vhaḓinḓa vhawe.”

₈Zwenezwo ḽiḽa ipfi ḽe nda ranga u ḽi pfa ḽi tshi bva ṱaḓulu ḽa dovha ḽa amba na nṋe ḽa ri, “Iyo dzhia kuḽa kubugwana kwo vulwaho ku re tshanḓani tsha uḽa muruṅwa o kandaho lwanzheni na shangoni.” ₉Nda ya ha uḽa muruṅwa nda mu humbela kuḽa kubugwana. Ene a ri, “Ku dzhie u ku ḽe! Haṋwani u ḓo pfa ku tshi ḓifha sa mutoli, hone wo no mila, thumbuni hu ḓo kalakata.” ₁₀Nda mbo ḓi dzhia kuḽa kubugwana tshanḓani tsha uḽa muruṅwa nda ku ḽa, nangoho ku haṋwani nda pfa ku tshi ḓifha sa mutoli, hone ndo no mila nda pfa thumbuni hu tshi kalakata. ₁₁Ndi hone ndi tshi vhudzwa upfi, “Dovha u yo ḓivhadza zwine Mudzimu a ḓo ita vhathu vha tshakha dzo fhambanaho na nyambo na mahosi.”