DZIPHISALEMA 98

₁Imbelani Muṋe washu luimbo luswa,

o ita zwimangadzo!

O kunda nga maanḓa awe,

nga tshanḓa tshawe tshikhethwa.

₂Muṋe washu o ri sumbedza gundo ḽawe,

a dzumbululela dzitshakha u fulufhedzea hawe.

₃U a fulufhedzea;

zwe a fulufhedzisa Israele nga lufuno o zwi ita;

ḽifhasi nga he ḽa kanda ḽo vhona gundo ḽa Mudzimu washu.

₄Ḽifhasi ḽoṱhe

nga ḽi ṱavhele Muṋe washu mukosi nga dakalo,

nga ḽi mu huvhele mihuvho nga nyimbo.

₅Imbelani Muṋe washu nga haripa,

ni imbe ni tshi lidza haripa!

₆Pembelelani Khosi, Muṋe washu,

ni tshi lidza porompiṱa na phalaphala!

₇Lwanzhe nga lu bvume na zwoṱhe zwi re khalwo;

na shango na zwoṱhe zwi dzulaho khaḽo.

₈Milambo nga i vhande zwanḓa;

dzithavha nga dzi fhululedze,

₉dzi imbele Muṋe washu;

u khou ḓa u haṱula ḽifhasi.

U ḓo haṱula shango a sa ṱaluli,

tshakha u ḓo dzi haṱula nga khaṱhulo ya ngoho.