Thabelo ya lushaka ya u humbela mulalo
Phisalema ya vhana vha Kora ye vha sikela malogwane.
Vhuthu ha Mudzimu ha misi yo fhelaho
1Muṋe washu, wo tonda shango ḽau,
wa dovha wa ita uri Jakopo zwi mu anḓe;
2wo hangwela vhathu vhau milandu yavho,
wa tiba zwoṱhe zwe vha khakha;
3wo humisa mbiti dzau wa dzi thudzela thungo.
Ṱhamu ya Mudzimu ya misi ino
4Mudzimu Mutshidzi washu,
dovha u ri vuse,
u songo tsha ri sinyutshela.
5Ndi hone wo ri sinyutshela tshoṱhe naa?
Mirafho i ḓaho i ḓo ḓi vhona mbiti dzau dzi sa dzimi naa?
6A u nga dovhi wa ri ṋea vhutshilo,
vhathu vhau vha konou u pembelela naa?
7Muṋe washu,
ri sumbedze lufuno lwau
lu sa dzinginyei,
u ri tshidze.
Mulalo u kha ḓi ḓaho
8Ndi ḓo thetshelesa
zwine Mudzimu Muṋe washu
a ḓo amba:
vhathu vhawe vha fulufhedzeaho u vha fulufhedzisa mulalo,
tenda vha si humele kha zwa vhutsilu.
9Ngoho, ha lengi u tshidza vhane vha mu ofha;
vhugala hawe vhu ḓo dovha ha dzula shangoni ḽashu.
10Ndi hone vhuthu na u fulufhedzea zwi tshi ḓo ṱangana,
vhuvhuya na mulalo zwa kuvhatedzana,
11u fulufhedzea ha simuwa fhasi,
vhuvhuya ha sedza fhasi vhu makoleni,
12Muṋe washu a ri ṋea zwivhuya,
shango ḽashu ḽa bveledza khaṋo,
13vhuvhuya ha mu ranga phanḓa,
ha swielela ṋayo dzawe nḓila.
