Maḓembe a Mudzimu a kale a fhumudza o hanganeaho
Phisalema ya Asafu ye a sikela malogwane, Jeduthuni.
Mukosi
1Ndi ṱavhela Mudzimu mukosi!
Ndi ṱavhela Mudzimu mukosi a mpfa.
2Musi wa khombo ndi ṱoḓa Muṋe wa zwoṱhe;
vhusiku hoṱhe ndi rabela ndó imisa zwanḓa,
thabelo i sa tumuwi,
hone nda si wane mufhumudzi.
3Nda ri u elekanya Mudzimu nda gomela,
nda humbula nda pfa ndo kulea nungo.
U humbula zwa misi ya kale
4Wo ita uri ndi lale ndó donola maṱo,
nda ḽa mbilu nda kundwa u amba;
5nda humbula maḓuvha aḽa a kale,
miṅwaha yo fhiraho.
6Vhusiku nda elelwa luimbo lwanga,
nda elekanya nda ḓivhudzisa nda ri,
7“Muṋe wa zwoṱhe o ri laṱa tshoṱhe naa?
Nṋa a nga si tsha dovha a ri takalela?
8Lufuno lwawe lu sa dzinginyei lwo nyamalala tshoṱhe naa?
Nṋa zwe a ri fulufhedzisa a zwi tsheeho?
9Kani Mudzimu o hangwa u khathutshela?
Tshilidzi tshawe tsho kundwa nga mbiti kani?”
10Nda elekanya nda ri,
“Tshi no mmbaisesa
ndi uri Waṱaḓuluṱaḓulu
ha tsha sumbedza maanḓa awe.”
U ṱuṱuwedzwa nga maḓembe e Mudzimu a ita kale
11Litshani ndi elekanye mishumo ya Muṋe washu.
Ee, ndi ḓo elekanya maḓembe au a kale.
12Ndi ḓo elekanya mishumo yau yoṱhe,
nda humbula mishumo yau ya maanḓa.
13Mudzimu,
zwine wa ita ndi zwikhethwa;
ndi ufhio mudzimu a no eḓana na Mudzimu washu?
14Iwe u Mudzimu a no ita maḓembe;
u ṱanela dzitshakha maanḓa au.
15Wo tshidza vhathu vhau nga maanḓa au,
vhaḓuhulu vha Jakopo na Josefa.
Mudzimu a tshi dzinginyisa shango na lwanzhe
16Mudzimu, maḓi o ri u u vhona,
o ri u vhona uri ndi Iwe, a ofha,
a tetemela,
a dzinginyea u swika vhudzivhani hao,
17makole a shulula maḓi,
mubvumo wa pfala lutomboni,
misevhe yau ye vhenge phanḓa na murahu,
18milinga ya gariki yau ya nndwa
ya bvuma ye ngindii, ngindii,
phenyo dzau dza vhonetshela shango,
ḽifhasi ḽa tetemela ḽa dzinginyea,
19Iwe wa fhira vhukati ha lwanzhe,
wa vula nḓila vhukati ha maḓi a maanḓa,
nangwe vhuṱala hau vhu songo vhonala.
20Wo endedza vhathu vhau unga sambi ḽa nngu,
vhó rangwa phanḓa nga Mushe na Aroni.
