DZIPHISALEMA 149

₁Haleluya,

nga hu rendwe Muṋe washu!

Imbelani Muṋe washu luimbo luswa,

mu rendeni

tshivhidzoni tsha vhalanda vhawe vha fulufhedzeaho!

₂Israele, takalelani Muvhumbi waṋu,

vhana vha Tsioni,

pembelelani Khosi yaṋu!

₃Nga vha rende dzina ḽawe nga u ḓala muḓalo,

vha mu imbele hu tshi lila mirumba na mbila!

₄Muṋe washu u takalela vhathu vhawe;

vha u ḓiṱukufhadza u vha ṱama nga gundo.

₅Vhalanda vhawe vha fulufhedzeaho nga vha pembele,

o vha ṋea vhugala,

vha fhululedze nangwe vho lala.

₆Nga vha rende Mudzimu vha tou ṱavha mukosi,

vhó fara mapanga a mutsheahoṱhe;

₇Ene u lifhedza dzitshakha,

a laṱisa vhathu,

₈a vhofha mahosi avho nga dzigeḓane,

vharangaphanḓa vha vhoxwa nga tsimbi,

₉u ralo ha vha u khunyeledza khaṱhulo yo ṅwalwaho,

na u pfufha vhalanda vhawe vha fulufhedzeaho

nga vhugala.

Haleluya,

nga hu rendwe Muṋe washu!