DZIPHISALEMA 147

₁Haleluya,

nga hu rendwe Muṋe washu!

Ndi zwavhuḓi hani

u renda Mudzimu washu nga nyimbo!

Zwi takadza hani! O tewa nga thendo.

₂Muṋe washu u fhaṱa Jerusalema;

u kuvhanganya Vhaisraele vho balanganaho.

₃U fhodza vha mbilu dzi vhavhaho,

a pomba mbonzhe dzavho.

₄U vhea tshivhalo tsha ṋaledzi,

iṅwe na iṅwe a i rina dzina.

₅Muṋe washu ndi muhulwane,

maanḓa awe ha konei,

ṱhalukanyo yawe a i gumi.

₆Muṋe washu u vusa vho kandekanywaho,

vhavhi vhone u vha posa fhasi.

₇Livhuhani Muṋe washu nga nyimbo;

Mudzimu washu mu rendeni nga mbila.

₈U pila lutombo nga makole,

ḽifhasi a ḽi nisela mvula,

mivhunduni a medza hatsi.

₉U ṋea dziphukha zwiḽiwa zwadzo,

na mafhondo a mahunguvhu a tshi lila.

₁₀Maanḓa a bere a si one ane a mu takadza,

na vhuhali ha vhahali a si hone vhune a vhu takalela;

₁₁Muṋe washu u takadzwa nga vhane vha mu ofha,

vhane vha fulufhela lufuno lwawe lu sa dzinginyei.

₁₂Iwe Jerusalema, renda Muṋe washu,

iwe Tsioni, renda Mudzimu wau!

₁₃Ndi Ene a no khwaṱhisa tswinga dzau,

a shudufhadza vhana vhau.

₁₄U ladza shango masakhani au,

a u fusha nga mavhele avhuḓi.

₁₅U vhetshela ḽifhasi mulayo;

zwine a amba zwi mbo ḓi itea.

₁₆U nisa gabugu ya tshena unga muḓali,

a hashekanya mahaḓa a nga milora,

₁₇a nisa tshifhango tsha nga thombwana;

ndi nnyi ane a nga konḓelela phepho yawe?

₁₈A dovha a tou amba fhedzi zwa mbo ḓi ṋoka,

a fhungisa mimuya yawe ha ela maḓi.

₁₉O dzumbululela Jakopo ipfi ḽawe,

a ḓivhadza Israele pfanelo dze a vhofha.

₂₀Hezwo ha athu zwi itela dziṅwe tshakha,

dzone a dzi ḓivhi milayo yawe.

Haleluya,

nga hu rendwe Muṋe washu!