DZIPHISALEMA 116

₁Muṋe washu ndi a mu funa,

u pfa mukosi wanga.

₂O nthetshelesa,

ndi ḓo ḓi mu vhidzelela ndi tshi kha ḓi tshila.

₃Ndo vha ndo tandwa nga thambo dza lufu,

ndó no ingamela tshalo,

ndó no farwa nga nyofho,

na khombo na u ḽa mbilu,

₄nda ḓi vhidzelela dzina ḽa Muṋe washu,

nda ri, “Muṋe washu, ntshidze!”

₅Muṋe washu u na tshilidzi,

u a fulufhedzea,

Mudzimu washu u na khathutshelo.

₆Muṋe washu u tsireledza vha si na nungo;

nde ndo rambaladzwa a ḓi ntshidza.

₇Kha ndi dovhe ndi rudze mbilu,

hufha Muṋe washu o nnyitela vhuthu.

₈Iwe Muṋe washu, wo nṋula lufuni,

wa mphumula miṱodzi,

wa ntika nda si tsha khukhulwa;

₉ndi ḓo tshila ndi tshi vhonwa nga Muṋe washu,

ndí shangoni ḽa vhapenyu.

₁₀Nangwe ndi tshi ri,

“Ndo kuyekanywa tshoṱhe!”

a tho ngo litsha u fulufhela.

₁₁Zwiḽa ndi nyofhoni ndo ri,

“Vhathu vhoṱhe ndi vhadzia-u-zwifha!”

₁₂Zwivhuya zwoṱhe zwe Muṋe washu a nnyitela

ndi nga mu lifhela ngani?

₁₃Ndi ḓo livhuha zwe Muṋe washu a ntshidza

nga u mu ṋekedza nduvho ya tshinwelo tsha waini,

nda rabela dzina ḽawe;

₁₄ndi ḓo khunyeledza zwe nda anela Muṋe washu

vhathu vhawe vhoṱhe vha tshi zwi vhona.

₁₅Muṋe washu u vhona lufu

lwa vhalanda vhawe vha fulufhedzeaho

zwi si zwithu zwiṱuku.

₁₆Muṋe washu,

ngoho ndi mulanda wau,

ndi mushumeli wau,

ndo bebwa nga mushumeli wau wa musadzi;

wo vhofholola geḓane dze dza vha dzo mmbofha.

₁₇Ndi ḓo u ṋekedza zwiṱhavhelo zwa ndivhuho,

nda rabela dzina ḽa Muṋe washu.

₁₈Ndi ḓo khunyeledza zwe nda anela Muṋe washu

vhathu vhawe vhoṱhe vha tshi zwi vhona,

₁₉miṱani ya nnḓu ya Muṋe washu,

ngomu hau, iwe Jerusalema.

Haleluya,

nga hu rendwe Muṋe washu!