MIRERO 9

₁Vhuṱali,

ene mufumakadzi wa mupfumi,

ho ḓifhaṱela nnḓu yaho,

ha i tika nga phuphu ṱhanu na mbili dza matombo,

₂ha ṱhavha kholomo dzaho,

ha ṱuḓa waini yaho,

ha ḓeka ḓafula ḽaho,

₃ha ruma vhasidzana u yo vhidza vhathu,

vha ime miḓini hune vha vhonwa nga vhoṱhe

vha ri, “Vhuṱali vhu ri,

₄‘A si na nzhele nga a ḓe!’

Kha a si na ṱhalukanyo vhu ri,

₅‘Iḓani ni ḽe vhuswa hanga,

ni nwe waini ye nda i ṱuḓa.

₆Ṱutshelani vhutsilu ni tshile,

ni tou longondo nḓilani ya ṱhalukanyo.’ ”

₇Ane a laya munyefuli u a ḓinyadzisa,

ane a kaidza muvhi u ḓivhidzela maṱamba.

₈U songo kaidza munyefuli, a nga ḓo u vhenga,

kaidza muṱali, u ḓo u funa.

₉Laya muṱali,

ndi hone a tshi ḓo ṱalifhesa,

funza a fulufhedzeaho, ndi hone a tshi ḓo engedza pfunzo yawe.

₁₀Tshisima tsha vhuṱali

ndi u ofha Muṋe washu,

u ḓivha Mudzimu, Ene Mukhethwa, ndi yone ṱhalukanyo.

₁₁Ndi nṋe vhuṱali ane nda andisa maḓuvha au,

nda u ṋea ndalamo.

₁₂Arali wo ṱalifha wo ṱalifhela iwe muṋe,

zwi ḓi nga arali wa nyefula, u ḓo zwi konḓelela u woṱhe.

₁₃Vhutsilu vhu nga musadzi wa luambo,

ha shoni, ha ḓivhi tshithu.

₁₄U dzula muṋangoni wa nnḓu yawe,

u dzula miḓini

hune a vhonwa nga vhathu vhoṱhe,

₁₅a vhidzelela vhafhiri vha nḓila

vho livhaho kha zwavho, a ri,

₁₆“A sa ḓivhi tshithu

nga a pambutshele ngeno!”

A tshi vhudza a si na ṱhalukanyo u ri,

₁₇“Maḓi o tswiwaho ha ḓifhi zwone;

vhuswa vhu ḽiwaho muthu o dzumbama vhu takadza hani!”

₁₈Hone vhakungiwa a vha ḓivhi

uri henefho ngomu ho dzula mimuya ya vho faho,

vhaeni vhawe vha fhasi-fhasi dindini.