MIRERO 5

₁Ṅwananga, thetshelesa

ndi tshi u vhudza zwe nda vhona,

ipfa ndi tshi u eletshedza,

₂uri u vhe na vhuronwane,

zwine wa amba zwi sumbe nḓivho.

₃Milomo ya musadzi wa phombwe i ela mutoli,

haṋwani hawe hu suvhelela u fhira mapfura,

₄a fhedza nga u kalakata unga lunungwane,

a halifha unga banga ḽa mutsheahoṱhe.

₅U ḓo u hwala a u tsisela lufuni,

o livha vhudzulavhafu.

₆Nḓila dzi isaho vhutshiloni ha dzi londi,

u sokou tendeleka a sa ḓivhi hune a ya.

₇Zwino iwe ṅwananga, nthetshelese,

u songo pambuwa kha zwine nda u vhudza:

₈Mu shavhe, u vhe kule nae,

u songo vhuya wa sendela tsini na vothi ḽa nnḓu yawe,

₉hu sa vho ḓo huliswa vhaṅwe,

iwe wa nyadziwa,

maanḓa au a vho ḓo fhedzwa nga wa tshiṱuhu,

₁₀vhatsinda vha ḽa lupfumo lwau,

tsha biko ḽau tsha pfumisa mutsinda,

₁₁wa vho fa u tshi gomela,

ṋama yau na muvhili zwo ṱahala,

₁₂wa vho ri,

“Ndo ḓiitelani khundavhalai?

Mbilu yanga yo nyadzelani u kaidzwa?

₁₃Ndo nyadza vhafunzi vhanga vha tshi nndaya,

vha tshi mpfunza nda konyolela matanda nḓevheni!

₁₄Ndo ṱoḓou lovha ndi ṱano!”

₁₅A u vhoni ṅwananga,

iwe inwa maḓi a bvaho tshisimani tshau,

ane a gubunyea á songo dzikuswa nga muṅwe.

₁₆Kani u tama zwisima zwau zwi tshi ela na shango,

maḓi a milambwana yau a ṱuwa na gondo?

₁₇Nga zwi vhe zwau u woṱhe,

u songo ṱanganelana na vhatsinda.

₁₈Tshisima tshau nga tshi shudufhadzwe,

u takalele musadzi we wa mu vhinga u tshee nga hau.

₁₉O naka sa ntsana,

u tamisa sa ngululu.

Ngavhe lunako lwawe lu tshi u nyanyula misi yoṱhe,

a dzula o thuba mbilu yau.

₂₀Ṅwananga, ndi mini mbilu yau i tshi nga thubwa nga musadzi wa phombwe,

wa kuvhatedzana na musadzi a si wau?

₂₁Nḓila dza muthu dzi ḓivhiwa nga Muṋe washu,

u sedza hoṱhe hune a tshimbila.

₂₂Muvhi u fashwa nga vhuvhi hawe,

u vhoxwa nga nnzwa dza vhutshinyi hawe;

₂₃u vhulawa nga u shaya mulayo,

a xedzwa nga vhutsilu hawe vhuhulu.