MIRERO 31

Vho ri:

₂Iwe ṅwananga,

iwe ṅwananga we nda tou mu beba,

iwe ṅwananga we nda mu wana nga thabelo,

₃u songo fhedza nungo dzau nga vhasadzi;

maanḓa au a songo fhelela khavho,

ndi vhone vhane vha lozwa mahosi.

₄Lemuele,

u songo ḓikumedza waini nandi,

hezwo a zwo ngo tea khosi;

a zwo ngo tea khosi u lilela halwa.

₅A nga ḓo ri u nwa a hangwa zwine mulayo wa amba,

a vho kundisa vho kandeledzwaho u wana pfanelo dzavho.

₆Halwa vhu fhiwe vha no khou lovha,

waini i fhiwe vha no khou ḽa mbilu,

₇vha nwe vha hangwe vhushai havho, vha si tsha dovha vha elelwa u tambula havho.

₈Ambela vha sa koni u ḓiambela;

lwela pfanelo dza vha sa koni u ḓilwela.

₉Vha ambele, u haṱule u sa ṱaluli,

lwela pfanelo dza vhashai na vhaheḓana.

₁₀Musadzisadzi a nga wanwa nga nnyi?

Mutengo wawe u fhira wa nungu kule.

₁₁Munna wawe u a mu fulufhela tshoṱhe,

ha na tshivhuya tshine a tshi shaya.

₁₂Musadzi wawe u mu itela zwivhuya fhedzi

maḓuvha oṱhe a vhutshilo hawe,

zwi si zwi huvhadzaho.

₁₃U nanguludza ulu na muḓali,

a shuma nga zwanḓa zwawe zwo takala.

₁₄U nga zwikepe zwa vhavhambadzi,

a tshi vhuya na zwiḽiwa zwawe zwi no bva kule.

₁₅U fhinduwa hu tshee hee nzwii,

a bikela muṱa wawe zwiḽiwa,

a avhela na vhashumi vhawe vha vhasidzana.

₁₆U vhamba maano a renga tsimu,

a limisa tsimu ya minḓirivhe nga malamba awe.

₁₇Ndi mushumi wa biko,

zwanḓa zwawe zwi na nungo, zwi kona u shuma.

₁₈U vhona uri zwine a shuma zwi a mu vhuedza,

luvhone lwawe lu lala lu tshi duga.

₁₉U hoṱa muḓali, a luka masila.

₂₀U putulula tshanḓa tshawe a pakulela vhashai,

a ṋea vhaheḓana zwine vha zwi shaya.

₂₁Musi mahaḓa a tshi wa, ha ofhi tshithu,

hufha vha muṱa wawe vhoṱhe vho ambara tswuku.

₂₂U luka masila a u pila mmbete wawe;

ene o ambara muḓali na dza muridili.

₂₃Munna wawe u a huliswa khoroni ya muḓi

hune a dzula na vhahulwane vha shango.

₂₄Musadzi uyo u luka masila a muḓali a a rengisa,

a rengisela vhavhambadzi masila a u atha.

₂₅O ambara nungo na vhugala,

ha ofhi zwa maḓuvha a ḓaho.

₂₆A tshi amba u sumbedza vhuṱali;

lulimini lwawe hu na ndayo dzi fulufhedzeaho.

₂₇U sedza mafhungo a muṱa wawe;

ha dzuli nga zwanḓa.

₂₈Vhana vhawe vha a mu khoḓa vha ri u na mashudu;

na munna wawe u ralo, a ri,

₂₉“Vhasadzi vhanzhi vha ita zwihulu,

hone inwi ni vha fhira vhoṱhe!”

₃₀Lunako lu a fhura, lu a fhufha lwa fhira,

huno a no fanela u khoḓiwa ndi musadzi a ofhaho Muṋe washu.

₃₁Nga a ṋewe pfufho yo mu teaho;

nga a khoḓwe khoroni ya muḓi, a tshi khoḓelwa zwe a shuma!