MIRERO 2

₁Ṅwananga,

arali wa pfa maipfi anga,

wa vhulunga ndaela dzanga,

₂nḓevhe dzau dza thetshelesa vhuṱali,

mbilu yau ya ṱalukanya –

₃ndi ngoho,

arali wa vhidzelela nḓivho,

wa huwelela ṱhalukanyo,

₄wa i ṱoḓa unga siliva,

wa i ṱoḓisesa unga lupfumo lwo dzumbwaho,

₅ndi hone u tshi ḓo ṱalukanya

uri u ofha Muṋe washu zwi amba mini,

wa vhona uri u ḓivha Mudzimu ndi mini.

₆Vhuṱali ndi mpho ya Muṋe washu,

nḓivho na ṱhalukanyo

zwi bva mulomoni wawe.

₇Vha si na vhufhura

u ḓo ita uri zwi vha nakele,

ndi Ene tshiṱangu

tsha vho faraho nḓila i sa solisei.

₈U linda nḓila

dza vha no ita zwi re zwone,

a tsireledza vhalanda vhawe

vha fulufhedzeaho.

₉Arali wa nthetshelesa,

ndi hone u tshi ḓo ḓivha u ita zwi re zwone,

zwi sa khakhi, zwi sa solisei.

₁₀Ndi hone vhuṱali vhu tshi ḓo dzhena mbiluni yau,

wa pfa nḓivho i tshi u ḓifhela.

₁₁Vhuronwane vhu ḓo u tsireledza,

ṱhalukanyo ya u londola.

₁₂Vhuṱali vhu ḓo u pambusa nḓilani mmbi, wa fhambana na vha nyambo dza u thutha,

₁₃vhane vha pambuwa kha nḓila yo lugaho,

vha fara i yaho swiswini,

₁₄vha takalela u ita zwivhi,

vha ḓikhoḓa nga nyambo mmbi dza u thutha,

₁₅vhathu vha nḓila dza magombikwa, vho bvaho nḓilani.

₁₆Ndi hone u tshi ḓo kona u tinya musadzi wa phombwe,

ane a u fhura nga lulimi lwa u ḓifha,

hone e wa muṅwe,

₁₇ó ṱala munna we a mu vhinga

a tshee nga hawe,

a hangwa mulanga

we a vhofha na Mudzimu wawe;

₁₈u mbwandamela lufuni

hune ha ḓo vha hone nnḓu yawe,

nḓila dzawe dzi livha hu no dzula vho faho.

₁₉Vhane vha mu dalela a vha tsha vhuya,

a vha tsha vhona nḓila i yaho vhutshiloni.

₂₀Zwenezwo tshimbila nḓilani ya vhavhuya,

u nambatele ya vha fulufhedzeaho;

₂₁vha si na vhufhura vha ḓo kovhelwa shango,

vha sa solisei vha ḓo sala khaḽo.

₂₂Vhavhi vhone vha ḓo swielwa shangoni,

vha vhufhura vha ḓo tupulwa khaḽo.