MIRERO 11

₁Tshikalo

tshi no kala zwi si zwone

tshi nengisa Muṋe washu; tsho teaho tshi a mu takadza.

₂U ḓihudza hu tevhelwa nga ṱhoni;

tsha muṱali ndi u ḓiṱukufhadza.

₃U sa solisea ha vha si na vhufhura hu a vha endedza;

vha sa fulufhedzei vha ḓo fela nḓila dzavho dza magombikwa.

₄Lupfumo a lu farisi tshithu

musi wa khaṱhulo;

u thetshelesa Mudzimu hu tshidza lufuni.

₅U fulufhedzea ha a sa solisei hu mu onyolosela nḓila dzawe,

ngeno muvhi a tshi fashwa nga vhuvhi hawe.

₆Vhuvhuya ha vha si na vhufhura vhu a vha tshidza,

ngeno vha sa fulufhedzei vha tshi fashwa

nga nyemulo dzavho.

₇Zwe muvhi a zwi fulufhela, a tshi fa zwi lovha nae;

maanḓa e a ḓitika ngao ndi mahandana.

₈A thetshelesaho Mudzimu u lamukiswa khomboni,

ya wela muvhi.

₉A no nyadza Mudzimu u vhulaha vhaṅwe nga mulomo wawe,

ngeno a thetshelesaho Mudzimu a tshi vha ponyokisa nga nḓivho yawe.

₁₀Musi muvhuya zwi tshi mu nakela,

muḓi u huvha mihuvho;

vhavhi vha tshi lovha hu pfala mifhululu.

₁₁Muḓi u wana mashudu nga vha si na vhufhura,

wa fhaṱwa;

mulomo wa muvhi wone u pwasha muḓi.

₁₂A no sasaladza vhaṅwe ha na ṱhalukanyo;

munna wa ṱhalukanyo u a fhumula.

₁₃Wa zwitshele ha vhudzwi tshiphiri;

ane a fulufhedzea u a tshi vhulunga.

₁₄Lushaka lu a wa nga u shaya nyeletshedzo,

hone ho andaho vhaeletshedzi lu dzula lwo kunda.

₁₅Arali wa ḓivhofha u lifhela muṅwe mulandu une a nga u ita,

u ḓo ḓisola;

ane a lamba u ḓidzhenisa khazwo o ḓirula.

₁₆Musadzi u huliselwa vhulenda,

hone vhalevhi vha zuwa lupfumo fhedzi.

₁₇Munna wa vhuthu u a vhuelwa;

wa tshiṱuhu u ḓiṱoḓela mafhanza.

₁₈Muvhi u a bindula zwa fhufha;

a no zwala mbeu ya vhuvhuya ha nga kundwi u pfufhiwa.

₁₉A sa tseki kha u ita zwi re zwone u ḓo tshila;

ane a omelela kha vhuvhi u ḓo fa.

₂₀Muṋe washu u vhenga vha mbilu ya vhufhura;

u takalela vha sa solisei.

₂₁Ḓivhani uri:

muvhi ha nga kundwi u lifhedzwa;

vhana vha vhavhuya vhone vha ḓo wanala vha si na mulandu.

₂₂Musadzi wa lunako a si na ṱhalukanyo,

u nga tshiṅina tsha musuku tshi ningoni ya nguluvhe.

₂₃A thetshelesaho Mudzimu u ḓo wana zwivhuya zwine a zwi lila;

muvhi ene o lindela ṱhamu fhedzi.

₂₄Mapakulile u ḓi pfuma a tshi ya;

a no dzima na zwo fanelaho vhaṅwe

ene u ḓi shaya a tshi ya.

₂₅A si na vhutshivha u ḓo pfuma;

a no dzimula ḓora ḽa vhaṅwe,

na ḽawe ḽi ḓo dzimulwa-vho.

₂₆Ane a hana na mavhele, vhathu vha a mu teketela;

hu shudufhadzwa ane a tenda u a rengisa.

₂₇Ane a ḓidinela u ita zwivhuya u ḓo takalelwa;

tshilila-u-vhona-khombo tshi ḓo i vhona.

₂₈Ane a ḓitika nga lupfumo lwawe u ḓo wa;

ane a fulufhedzea zwi ḓo mu nakela,

a nga ṱari ḽidala ḽi titimaho.

₂₉A sa londoli muṱa wawe

u ḓo sala na muya;

tsilu ḽi ḓo vha phuli ya muṱali.

₃₀Mitshelo ya ane a thetshelesa Mudzimu i a tshidza;

muṱali u kona u tswa mbilu dza vhathu.

₃₁Arali na muvhuya a tshi wana zwo mu fanelaho fhano fhasi,

kha muvhi na mutshinyi zwi ḓo tou ngani?