NEHEMIA 3

₁Mutsheṱo wo vuswa nga hei nḓila: Tshifhe muhulu Eliashibi na vhotshifhe ngae vho vusa Khoro ya Dzinngu, vha i kumedza Mudzimu, vha kwea dzigethe. Vho fhaṱa u swika Thawara ya vha Ḓana vha u kumedza Mudzimu, vha dovha vha fhirela phanḓa u swika kha Thawara ya Hananele.

₂Vhanna vha Jerikho vha fhaṱa tshipiḓa tsho vhandekanaho na tshenetsho, ha tevhela Zakhuru ṅwana wa Imiri.

₃Vhaḓuhulu vha Hasenaa vha fhaṱa Khoro ya Khovhe. Vha fulela, vha kwea dzikhoro, vha longa khoṋo na tswinga.

₄Miremotho, ṅwana wa Uria ṅwana wa Hakotsi, a vusa tshipiḓa tsho vhandekanaho na itsho, ha tevhela Mishulamu, ṅwana wa Berekhia ṅwana wa Meshesabele, ene a tevhelwa nga Tsadoko ṅwana wa Baana.

₅Tshipiḓa tshi tevhelaho tsho vuswa nga vhanna vha Thekua, hone vhaḓivhalea vhavho vha hana u shuma mushumo wa Muṋe wavho.

₆Joyada ṅwana wa Phasia na Mishulamu ṅwana wa Besodia vha vusa Khoro ya Jeshana. Vha fulela, vha kwea dzikhoro, vha longa khoṋo na tswinga.

₇Melathia a no bva Gibioni na Jadoni a no bva Mironotho, na vhanna vha no bva Gibioni na Mitsipha vha vusa tshipiḓa tsho vhandekanaho na itsho, u swika hune muvhusi wa Vhukovhela-ha-Yufuratha a dzula hone, ₈ha tevhela Uziele ṅwana wa Harahaya, mufuli wa musuku, ha konou tevhela Hanania muiti wa zwiḓolo zwi nukhelelaho, ene a vusa mutsheṱo u swika Mutsheṱoni wo aṱamaho, ₉ha tevhela Refaya ṅwana wa Huru, muvhusi wa hafu ya dzingu ḽa Jerusalema.

₁₀Jedaya ṅwana wa Harumafu a vusa tshipiḓa tsho vhandekanaho na itsho, tshe tsha vha tshi tsini na nnḓu yawe, ha tevhela Hatushi ṅwana wa Hashabania.

₁₁Malakhiya ṅwana wa Harimu na Hashubu ṅwana wa Phahathi Muaba vha dovha vha vusa tshipiḓa tshiṅwe, vha vusa na Thawara ya Dziṋanḓo, ₁₂ha tevhela Shalumu ṅwana wa Haloheshe, muvhusi wa hafu ya dzingu ḽa Jerusalema. Vhananyana vhawe vha mu farisa kha uyo mushumo.

₁₃Hanunu na vhadzulapo vha muḓi wa Zanua vha vusa Khoro ya Govha. Vha kwea dzigethe, vha longa khoṋo na tswinga, vha vusa mutsheṱo tshikhala tshi no ita mitha dza 440, u vhuya u swika Khoroni ya Mupfudze.

₁₄Malikhiya ṅwana wa Rekhaba, muvhusi wa dzingu ḽa Bethe Hakhereme, a vusa Khoro ya Mupfudze. A kwea dzigethe, a longa khoṋo na tswinga.

₁₅Shalumu ṅwana wa Kholohose, muvhusi wa dzingu ḽa Mitsipha, a vusa Khoro ya Tshisima. A fulela muṋango, a kwea dzigethe, a longa khoṋo na tswinga. Dzivhani ḽa Shela a fhaṱa mutsheṱo tsini ha tsimu ya musanda, u vhuya u swika zwiṱepisini zwine zwa tsela fhasi zwi tshi bva Muḓini wa Dafita.

₁₆Nehemia ṅwana wa Asibuku, muvhusi wa hafu ya dzingu ḽa Bethe Tsuru, a vusa tshipiḓa tsho vhandekanaho na itsho, u swika tshaloni tsha Dafita na damu na nnḓu ya vhahali.

₁₇Vhalivi vhe vha vusa zwipiḓa zwa mutsheṱo zwo vhandekanaho na izwo ndi havha: Rehumi ṅwana wa Bani o vusa tshipiḓa tsho vhandekanaho na itsho, ha tevhela Hashabia, muvhusi wa hafu ya dzingu ḽa Keila, a vusa a tshi itela dzingu ḽawe; ₁₈ha tevhela Binui ṅwana wa Henadada, muvhusi wa hafu ya dzingu ḽa Keila, a vusa tshipiḓa tsho vhandekanaho na itsho, ₁₉ha tevhela Ezere ṅwana wa Jeshua, muvhusi wa Mitsipha, a engedza tshiṅwe tshipiḓa, a vusa tsho vhandekanaho na nnḓu ya zwihali, u swika fhethu hune mutsheṱo wa ita khuḓa, ₂₀ha tevhela Barukhu ṅwana wa Zabai, a vusa tshiṅwe tshipiḓa u bva khuḓani u swika muṋangoni wa nnḓu ya tshifhe muhulu Eliashibi, ₂₁ha tevhela Miremotho ṅwana wa Uria ṅwana wa Hakotsi, a dovha a vusa tshiṅwe tshipiḓa u swika magumoni a nnḓu ya Eliashibi.

₂₂Vhotshifhe vhe vha vusa zwipiḓa zwa mutsheṱo zwo vhandekanaho na izwo ndi havhano: Vhotshifhe vha no bva vhuponi vhu re tsini ha Jerusalema vho vusa tshipiḓa tsho vhandekanaho na itsho, ₂₃ha tevhela Benyamini na Hashubu, vha vusa tshipiḓa tsho vhandekanaho na nnḓu dzavho; ha tevhela Azaria, ṅwana wa Maaseya ṅwana wa Anania, na ene a vusa tshipiḓa tsho vhandekanaho na nnḓu yawe, ₂₄ha tevhela Binui ṅwana wa Henadada, a dovha u vusa tshiṅwe tshipiḓa tsha vhuvhili, u bva nḓuni ya Azaria u swika khuḓani ya mutsheṱo; ₂₅ha tevhela Phalala ṅwana wa Uzai, a vusa u bva khuḓani ya mutsheṱo na thawara ya pfamo ya nṱha tsini ha muṱa wa vhalindi; ha tevhela Phedaya ṅwana wa Pharoshi, ₂₆a vusa u swika thungo ya vhubvaḓuvha tsini ha Khoro ya Maḓi na thawara i lindaho thembele. (Hafhu ho vha hu tsini na tshipiḓa tshiḽa tsha muḓi tshine tsha pfi Ofele, hune ha dzula vha shumaho thembeleni.)

₂₇Vhanna vha Thekua vha dovha vha vusa tshipiḓa tsho vhandekanaho na itsho, itsho tsho vha tshi tshipiḓa tshavho u bva fhethu ho livhanaho na thawara khulu ine ya linda thembele u swika kha mutsheṱo u re tsini ha Ofele; ₂₈ha tevhela tshigwada tsha vhotshifhe, tsha vusa u bva Khoroni ya Bere vha tshi ya thungo ya devhula, muṅwe na muṅwe a tshi fhaṱa ho vhandekanaho na nnḓu yawe; ₂₉ha tevhela Tsadoko ṅwana wa Imere, a vusa tshipiḓa tsho vhandekanaho na nnḓu yawe; ha tevhela Shemaya ṅwana wa Shekhania, mulindi wa Khoro ya Vhubvaḓuvha; ₃₀ha tevhela Hanania ṅwana wa Shelemia, na Hanunu ṅwana wa vhuṱanu na vhuthihi wa Tsalafu; itsho tsho vha tshipiḓa tshavho tsha vhuvhili; ha tevhela Mishulamu ṅwana wa Berekhia, a fhaṱa tshipiḓa tsho vhandekanaho na vhudzulo hawe; ₃₁ha tevhela Malikhiya mufuli wa musuku, a fhaṱa u swika kha nnḓu ine ya dzula vhanna vha no shuma thembeleni na vhashavhi, yone yo vha i tsini na Khoro ya Mifikadi, tsini ha kamara ya nṱha na khuḓa ya vhubvaḓavha-devhula ya mutsheṱo.

₃₂Vhafuli vha musuku na vhashavhi vha fhaṱa tshipiḓa tsha u fhedzisela, u bva kamarani fhaḽa khuḓani u swika Khoroni ya Dzinngu.