MARKOSI 6

₁Yesu a mbo ṱuwa afho na vhafunziwa vhawe, a humela muḓini wa hawe. ₂Nga Sabatha a mbo thoma u funza sinagogo. Vhathu vhanzhi vha tshi mu pfa vha akhamala. Vha vhudzisana nga tshavho vha ri, “Nṋa zwithu izwi o zwi wanafhi? Ndi vhuṱali-ḓe uvhu he a ṋewa ha u kona u ita zwingafhangafha? ₃Kani na zwino a si ene uḽa muvhaḓi ane ra mu ḓivha e ṅwana wa Maria? A si ene mukomana wa Jakopo na Jose na Judasi na Simoni? Khaladzi dzawe a ri nadzo henefhano?” Vha amba nga u ralo vha tshi tou mu sathula. ₄Yesu a konou amba navho a ri, “Muporofita u huliswa hoṱhe-hoṱhe, fhedzi ha hawe na mashakani na muṱani wa hawe ha huliswi.” ₅Henefho Yesu a si kone u ita maḓembe, a tou vhea vhalwadze vha si gathi zwanḓa a vha fhodza. ₆A kanuka a tshi vhona vha tshi mu landula.

Yesu a mbo ḓi tshimbila na miḓi ya henefho tsini a tshi enda a tshi funza vhathu. ₇A vhidza vha 12, a vha ṋea maanḓa a u pandela thuṅwa dza Saṱhane a konou vha ruma nga vhavhili-vhavhili, ₈a vha laya a ri, “Ni songo vhuya na ṱuwa na tshithu musi ni tshi fara lwendo; ni tou fara lubaḓa fhedzi; arali i mbuvha, kana mukhwama, kana tshelede, ni songo vhuya na ṱuwa nazwo. ₉Ni ambare thovho, hone ni songo vhuya na ṱuwa na hemmbe dzi no swika mbili. ₁₀Na dzhena muṱani ni dzule henefho he na thoma u swielelwa ni vhuye ni fhirele phanḓa. ₁₁Arali ni tshi dzhena huṅwe vha si ni takalele, vha si ni thetshelese, ni mbo ḓi ṱuwa, ni ite na u fhufhura buse milenzheni yaṋu, vhu vhe vhuṱanzi ha uri zwi kha vhone.” ₁₂Ndi hone vhafunziwa vha tshi ṱuwa vha yo ḓivhadza vhathu uri vha laṱe vhuvhi havho. ₁₃Vha pandela thuṅwa nnzhi kha vhathu, vha moṋa vhalwadze vhanzhi nga mapfura, vha fhola.

₁₄Bvumo ḽa Yesu ḽo ḓo swika-vho na nḓevheni dza khosi Herude, vhunga iṱali ḽo vha ḽo no ḓi pfala hoṱhe-hoṱhe – vhaṅwe vhathu vho vha vha tshi vho ri, “Ndi Johanisi Mulovhedzi we a vha o fa; o vuwa. Ndi zwine a kona ngazwo u ita zwithu zwingafhangafha.” ₁₅Vhaṅwe vha ri, “Hoyu ndi Elia.” Vhaṅwe-vho nga fhaḽa vhe, “Ndi muporofita a fanaho na vhaḽa vha misi iḽa ya kale.”

₁₆Herude a tshi zwi pfa a ri, “Ndi Johanisi we nda mu tumula ṱhoho. O vuwa vhafuni!” _17-18A tshi mu vhulaha zwo vha zwo ḓa nga nḓila hei: Herude o vha o ṱahisa Herudiasi musadzi wa mukomana wawe Filipi, zwino Johanisi a tshi ḓi ṱolou mu vhudza uri a zwo ngo fanela a tshi ṱahisa mmane wawe. Herude a vhuya a amba nga tsha vhukoma a ri Johanisi a fariwe a hoṋelwe dzhele. ₁₉Herudiasi o vha o no fara Johanisi nga mbilu, a tshi ṱoḓa na u mu vhulaha, hone a ro kundwa ₂₀ngauri Herude o vha a tshi mu ofha, nga u ḓivha uri ndi munna muvhuya o ḓikumedzaho Mudzimu. O vha a tshi tou ita na u mu tsireledza, nahone a tshi ḓi takalela u mu thetshelesa, naho zwine Johanisi a amba zwo vha zwi tshi mu tshenusa. ₂₁Hone Herudiasi o fhedza nga u wana nḓila ya u vhulaha Johanisi. Ho vha hu na munyanya wa mabebo a Herude, ene Herude o ramba magota awe oṱhe, na vhalangammbi, na vhaḓivhalea vha shango ḽa Galelia. ₂₂Ṅwananyana wa Herudiasi a ḓa a tshina phanḓa ha Herude na vhaeni vhawe, a tou vha takadza. Khosi ya konou amba nae ya ri, “Ambani tshine na funa. Ndi ḓo ni ṋea.” ₂₃A dovha a tou ana a khwaṱhisa a ri, “Ndi ni fulufhedzisa uri ndi ḓo ni ṋea tshiṅwe na tshiṅwe tshine na humbela, naho hu u ni fhandulela shango ḽanga nga vhukati!” ₂₄Musidzana a mbo ḓi bva, a ya ha mme awe a vhudzisa a ri, “Ndi humbele mini?” Mme awe a fhindula a ri, “Humbelani ṱhoho ya Johanisi Mulovhedzi.” ₂₅Musidzana a mbo ḓi ṱavhanya u gidimela ha khosi a ri, “Ndo vha ndi tshi khou ri vha nga nṋea zwanga ṱhoho ya Johanisi Mulovhedzi zwino, i ḓe i ndiloni.” ₂₆Iyo khumbelo ya ṱhavha khosi nga maanḓa, hone a ro kundwa u hana, nge a vha o ana vhaeni vhoṱhe vha tshi zwi pfa. ₂₇A mbo ḓi ruma ḽiswole uri ḽi ḓise ṱhoho ya Johanisi; ḽa ya dzhele ḽa mu tumula ṱhoho; ₂₈ḽa ḓa nayo i ndiloni, ḽa i ṋea uḽa musidzana, ene a i ṋea mme awe.

₂₉Musi vhafunziwa vha Johanisi vha tshi pfa zwo itwaho, vha ḓa vha dzhia tshitumbu tshawe, vha yo tshi swiṱa.

₃₀Vhaapostola vha tshi vhuya, vha hanelela Yesu zwoṱhe zwe vha ita na zwe vha funza. ₃₁Ho vha hu na vhathu vhanzhi, vhaṅwe vha tshi bva, vhaṅwe vha tshi dzhena, lwe Yesu na vhafunziwa vhawe vha kundwa na tshifhinga tsha u ḽa. Yesu a vhuya a amba navho a ri, “Nga ri ṱuwe nga tshashu uri ni wane tshifhinga tsha u awelanyana fhethu hu si na vhathu.” ₃₂Vha mbo ḓi dzhena tshikepeni nga tshavho, vha ya fhethu hu si na vhathu.

₃₃Musi vha tshi ṱuwa vha vhonwa nga vhathu vhanzhi, vha vha ḓivha, vha gidima vha tshi bva miḓini yoṱhe, vha tshi ya afho he Yesu na vhafunziwa vhawe vha vha vho livha hone, vha swika Ene a sa athu. ₃₄Yesu a tshi bva tshikepeni a vhona gogo ḽihulu ḽa vhathu, a vha pfela vhuṱungu nge a vhona vha tshi tou nga nngu dzi si na mulisa. A mbo ḓi vha funza zwithu zwinzhi.

₃₅Nga mathabama vhafunziwa vhawe vha ḓa khae vha ri, “Fhano hune ra vha hone ndi sogani nahone ḓuvha ḽo no ṱuwesa. ₃₆Kha vha vhofholole vhathu vha yo ḓirengela zwiḽiwa miḓini na miḓanani ya fhano tsini.” ₃₇Yesu a vha fhindula a ri, “Vha ṋeeni zwiḽiwa inwi vhaṋe.” Vha mu vhudzisa vha ri, “Kani-ha vha khou ṱoḓa ri tshi yo renga vhurotho ha maseṱha a 200, vha ḽe hone?” ₃₈Yesu a vha vhudzisa a ri, “Ni na mikonde mingana? Iyani ni sedze.” Musi vho no ya vha sedza vha ḓa vha mu vhudza vha ri, “Ndi miṱanu, na khovhe mbili.”

₃₉Ndi hone Yesu a tshi vhudza vhafunziwa vhawe uri vha dzudze vhathu kha tshiṱanzhela nga zwigwada. ₄₀Nangoho vhathu vha dzula fhasi vho ita zwigwada zwa ḓana ḓana na zwa mahumi maṱanu maṱanu. ₄₁Yesu a mbo ḓi dzhia iyo mikonde miṱanu na khovhe mbili a lilala a livhuha Mudzimu, a ṅwatekanya iyo mikonde a tshi ṋea vhafunziwa vhawe uri vha kovhele vhathu, a dovha a vha kovhela idzo khovhe mbili; ₄₂muṅwe na muṅwe a ḽa a fura. ₄₃Vhafunziwa vha ḓadza mifaro ya 12 nga zwipeḓu zwo salaho zwa vhurotho na khovhe. ₄₄Kha vhe vha ḽa izwo zwiḽiwa, vhanna fhedzi vho vha vhe 5 000.

₄₅Yesu a mbo ḓi kombetshedza vhafunziwa vhawe uri vha dzhene tshikepeni vha mu range phanḓa vho livha Betsaida seli ha dzivha, uri Ene a thome u vhofholola vhathu. ₄₆Musi o no onesana navho a yo rabela tshikwarani. ₄₇Musi lu tshi vho swifhala tshikepe tsho vha tsho no vha vhukatikati ha dzivha, Yesu o sala nnḓa e eṱhe. ₄₈Nga maḓautsha a vhona vhafunziwa vhawe vha tshi khou kakarika na tshikepe, ngauri vho vha vho livhana na muya. Ndi hone a tshi ḓa khavho a tshi khou tshimbila nṱha ha maḓi, a tshi nga u ḓo fhira henefho. _49-50Vhoṱhe vha tshi mu vhona a tshi khou tshimbila nṱha ha maḓi, vha humbula uri ndi tshirunzi, vha tshenuwa vha ṱavha mukosi. Yesu a mbo ḓi amba navho a ri, “Rudzani mbilu; ndi Nṋe, ni songo ofha!” ₅₁A dzhena henefho tshikepeni, muya wa dzika. Vhafunziwa vhone vho vha vho akhamala, vho no xelelwa na nga muhumbulo. ₅₂Hafhu na zwiḽa zwa mikonde ya vhurotho vho vha vha songo ṱalukanya uri zwi ambani, vho vha vha tshee swiswini.

₅₃Vha wela dzivha vha tsela kha ḽa Genesaretha, vha vhofha tshikepe. ₅₄Musi vha tshi bva tshikepeni vhathu vha mbo ḓi ri, “Yesu khoyu!” ₅₅Vha balangana na shango, vha hwala na vhalwadze kha mahingo vha vha isa afho he vha vha vha tshi pfa e hone. ₅₆Hoṱhe he Yesu a ya, ḓoroboni na miḓini, na miḓanani, vhathu vho vha vha tshi isa vhalwadze vhavho vanḓani, vha mu humbela uri vhalwadze vhavho vha tou kwama zwavho shaphu ḽa nguvho yawe, vhoṱhe vhe vha ḽi kwama vha fhola.