MARKOSI 14

₁Musi ho sala maḓuvha mavhili hu tshi vha na vhuṱambo ha Paseka na ha Vhurotho vhu si na mbilisa, vhotshifhe vhahulwane na vhaḓivhi vha Mulayo vho vha vha tshi khou ṱoḓa nḓila ya u fara Yesu nga vhukwila uri vha mu vhulahe. ₂Vho vha vho ri, “Ri songo mu fara vhuṱamboni; vhathu vha nga ḓo ri vutshela.”

₃Yesu o vha e Bethania nḓuni ya Simoni uḽa wa u lwala lukanda. Musi a tshi khou ḽa ha ḓa muṅwe musadzi o fara mapfura a u nukhelela nga khambana ya munyaka. Ayo mapfura o vha a tshi bva kha muri une wa pfi munadi, nahone o vha e a mutengo muhulu. A pwasha iyo khambana a shela mapfura kha ṱhoho ya Yesu. ₄Vhaṅwe vhe vha vha vhe henefho vha dinalea vha amba nga tshavho vha ri, “Nṋa u itani a tshi tambisa mapfura nga u rali? ₅Enea mapfura ane a rengwa nga muholo wa ṅwaha woṱhe! Khezwi a songo rengiswa, tshelede ya ṋewa zwayo vhashai.” Vha ralo vha tshi sasaladza uyo musadzi. ₆Ndi hone Yesu a tshi ri, “Hoyu musadzi mu litsheni, ni songo ṱolou mu dina. Hufha o nnyitela zwivhuya. ₇Vhashai vha ḓo ḓi dzula vhe hone misi yoṱhe. Arali ni tshi funa u vha tonda ni ḓo ḓi vha tonda tshifhinga tshiṅwe na tshiṅwe. Hone Nṋe a ni nga vhi na Nṋe misi yoṱhe. ₈Hoyu musadzi o ita nga hune a kona ngaho uri a dzule o lugisela muvhili wanga ḓuvha ḽa u swiṱwa hanga. ₉Zwino ipfani-ha: Huṅwe na huṅwe hune mafhungo maḓifha a ḓo anḓadzwa shangoni ḽoṱhe, dzina ḽa hoyu musadzi ḽi ḓo pfala-vho hu tshi humbulwa zwe a nnyitela.”

₁₀Ndi hone Judasi Iskariote, muṅwe wa vhafunziwa vha 12, a tshi ya ha vhotshifhe vhahulwane uri a fheṱe Yesu. ₁₁Vha takala zwihulu vha tshi pfa zwine a amba, vha ita na u fulufhedzisa uri vha ḓo mu pfufha. Judasi a mbo thoma u ṱoḓa tshifhinga tsho teaho tsha u vha sumbedza hune Yesu a vha hone.

₁₂Nga ḓuvha ḽa u thoma ḽa vhuṱambo ha Vhurotho vhu si na mbilisa, ḽine ha ṱhavhiwa ngwana dza Paseka, vhafunziwa vha Yesu vha mu vhudzisa vha ri, “Vhafunzi, vha funa ri tshi yo vha lugisela ngafhi tshilalelo tsha Paseka?” ₁₃Ndi hone Yesu a tshi ruma vhavhili vhavho, a vha laya a ri, “Dzhenani hafho Jerusalema; ni ḓo ṱangana na munna o hwala mvuvhelo ya maḓi. Ni mu tevhele ₁₄a vhuye a dzhene nḓuni, ni konou amba na muṋe wa muḓi ni ri, ‘Vhafunzi vha khou vhudzisa iḽa kamara ine vha nga ḽela khayo Paseka na vhafunziwa vhavho.’ ₁₅Uyo u ḓo konou ni sumbedza kamara khulwane ya tshitizi yo swielwaho, ho dzulaho ho vhekanywa zwoṱhe zwine zwa ṱoḓea. Henefho ndi hone hune na ḓo ri lugisela.” ₁₆Vhaḽa vhafunziwa vha ṱuwa, vha dzhena muḓini, vha wana zwoṱhe zwe Yesu a amba zwo tou ralo; vha konou lugisa Paseka.

₁₇Nga madekwana Yesu a ḓa na vha 12. ₁₈Musi vha tshi khou lalela, Yesu a ri, “Zwino ipfani-ha: muṅwe waṋu ane a khou ḽa na Nṋe henefha u ḓo mpheṱa.”

₁₉Vha dinalea, vha thoma u mu vhudzisa nga muthihi nga muthihi vha tshi ri, “Kani Vhafunzi vha khou amba nṋe?” ₂₀Yesu a fhindula a ri, “Ndi muṅwe henefha kha inwi vha 12 ane nda khou thotha nae. ₂₁Mubebwa-nga-muthu u ḓo fa nga he zwa ṅwalwa, hone hoyo ane a ḓo mu fheṱa u ḓo zwi vhona. Onoyo u ḓo vhuya a ri, ‘Ndo bebelwani?’ ”

₂₂Musi vha tshi khou ḽa, Yesu a dzhia vhurotho, a renda Mudzimu a konou vhu ṅwatekanya a ṋea vhafunziwa vhawe a tshi ri, “Ṱanganedzani, hoyu ndi muvhili wanga.” ₂₃O no ralo a dzhia tshinwelo, a livhuha Mudzimu a vha ṋea, vha nwa ngatsho vhoṱhe, ₂₄a ri, “Haya ndi malofha anga ane a ḓo shululelwa vhathu vhanzhi, ndi a u khwaṱhisa mulanga wa Mudzimu. ₂₅Zwino ipfani-ha: A thi tsha ḓo dovha nda nwa waini ndi vhuye ndi i nwe nga huswa nga heḽo ḓuvha muvhusoni wa Mudzimu.” ₂₆Ndi hone vha tshi imba luimbo, vha konou ya Thavhani ya Miolivi.

₂₇Yesu a amba na vhafunziwa vhawe a ri, “Noṱhe ni ḓo nndaṱa, nga he ha ṅwalwa hu tshi pfi,

₂₈“Hone musi ndo no vuswa vhafuni ndi ḓo ya Galelia, inwi na konou ḓo tevhela.” ₂₉Ndi hone Pitrosi a tshi ri, “Naho vhoṱhe vha tshi nga vha laṱa, nṋe ndi nga si vha laṱe.” ₃₀Yesu a mu fhindula a ri, “Zwino ipfani-ha: mukukulume u sa athu lila luvhili vhusiku ha ṋamusi, ni ḓo vha no no landula kararu na ri a ni nnḓivhi.” ₃₁Pitrosi a fhindula a tou khwaṱhisa tshoṱhe a ri, “Nangwe hu tshi tou pfi ndi fe navho, ndi nga si vhuye nda vha landula!” Na vhaḽa vhaṅwe vhafunziwa vhoṱhe vha ḓi ralo-vho.

₃₂Musi vha tshi swika fhethu hu no pfi Getsemani, Yesu a vhudza vhafunziwa vhawe a ri, “Salani henefha, ndi kha ḓi ya u rabela.” ₃₃A ṱuwa na Pitrosi na Jakopo na Johanisi, a ṱungufhala o tou hanganea, ₃₄a amba navho a ri, “Mbilu yanga i vhavha lune nda nga ndi sa fa. Dzulani henefha, ni songo eḓela.” ₃₅A fhirela phanḓanyana a ḓiposa fhasi, a humbela Mudzimu uri arali zwi tshi konadzea a si welwe nga dambudzo iḽo. ₃₆A rabela a ri, “Baba Muṋe wanga, Iwe Mukonazwoṱhe, itshi tshinwelo a tshi mpfuki zwanga naa? Hone hu songo itwa zwine Nṋe nda funa, kha hu itwe zwi funwaho nga Iwe.”

₃₇A tshi vhuya, a wana vhaḽa vhafunziwa vhararu vho eḓela, a amba na Pitrosi a ri, “Simoni, no eḓela naa? Ni tou kundwa na u pandela khofhe awara nthihi zwayo naa? ₃₈Fhaṱuwani ni rabele, uri ni si ungwe. Mbiluni ni a zwi funa, ni ro kundwa nge na vha vhathu vha ṋama.” ₃₉A dovha a yo rabela a tshi khou ḓi amba eneaḽa. ₄₀A tshi vhuya a ḓi wana vho dovha u eḓela, ngauri maṱo avho o vha a tshi khou lemela nga khofhe, vha si tsha ḓivha uri vha nga fhindula vha ri mini. ₄₁A tshi vhuya khavho lwa vhuraru a ri, “Nṋa ni tshee no eḓela zwaṋu no ḓiawetshela? Zwo itea. Tshikhathi tshazwo tsho swika. Zwino Mubebwa-nga-muthu ndi hone o kumedzwa zwanḓani zwa vhatshinyi. ₄₂Takuwani ri ṱuwe, uḽa muthu we a mpheṱa o swika.”

₄₃Musi Yesu a tshi kha ḓi amba, ha mbo bvelela Judasi, we a vha e muṅwe wa vha 12, e na tshigwada tsho hwalaho mapanga na dzithonga, tsho rumiwaho nga vhotshifhe vhahulwane na vhaḓivhi vha Mulayo na vhahulwane vha lushaka. ₄₄Tshiḽa tshifheṱi tsho vha tsho dzula tsho vha vhudza tsha ri, “Ane nda ḓo mu resha nga u tou mu kuvhatedza, ndi ene. Ni mu fare ni ṱuwe nae o lindwa.”

₄₅Judasi u swika a mbo ḓi ya ha Yesu a ri, “Vhafunzi vhanga!” A tshi ralo a mu kuvhatedza. ₄₆Vha mbo ḓi fara Yesu. ₄₇Hone muṅwe wa vhe vha vha vho ima henefho a bvisa banga a tshi ri u rema phuli ya tshifhe muhulu, hone a vho sokou i tumula nḓevhe. ₄₈Yesu a amba navho a ri, “Ni tou vhuya na bva no hwala mapanga na dzithonga ni tshi ḓa u fara Nṋe nda nga ndi ḽivemu naa? ₄₉Hufha ḓuvha ḽiṅwe wa ḽiṅwe ndo vha ndi tshi ḓi funza thembeleni ni hone; no kundwa ngani u mpfara? Hone kha ri litshe hu khunyelele zwe Maṅwalo a amba.” ₅₀Zwi tshi ralo vhafunziwa vhawe vhoṱhe vha mu ṱutshela vha shavha.

₅₁Ho vha hu na muṅwe muṱhannga wa muhali a tshi khou tevhela Yesu o tou kanyela luvhemba. Vha tshi mu fara ₅₂a sutuka a vha sia nalwo a shavha e fhedzi.

₅₃Vha isa Yesu ha tshifhe muhulu; vhoṱhe vhotshifhe vhahulwane na vhahulwane vha lushaka na vhaḓivhi vha Mulayo vha kuvhangana henefho. ₅₄Pitrosi a tevhela Yesu nga kule a vhuya a dzhena khoroni ya tshifhe muhulu. A tshi swika henefho a dzula na vhalindi a ḓiorela mulilo. ₅₅Vhotshifhe vhahulwane na vhanna vha khoro vha linga u wana vhuṱanzi ha u hwesa Yesu mulandu uri a vhulawe, hone ha si wanale, ₅₆ngauri naho ṱhanzi nnzhi dzo mu pomoka, zwo vhonala uri vhuṱanzi havho a vhu anḓani.

₅₇Vhaṅwe vha tshi takuwa vha mu pomoka vha ri, ₅₈“Riṋe ro tou mu pfa a tshi zuwa a tshi ri, ‘Ndi ḓo thutha hei nnḓu ya Mudzimu yo fhaṱwaho nga vhathu nda imisa iṅwe nga maḓuvha mararu, i songo fhaṱwaho nga vhathu!’ ” ₅₉Na henefho vhuṱanzi havho vhu si anḓane.

₆₀Tshifhe muhulu a vhuya a tou ima phanḓa ha khoro a vhudzisa Yesu a ri, “Nṋa a hu na ḽine na ḓifhindulela ngaḽo kha zwine avha vhathu vha ri no zwi ita?” ₆₁Yesu a sokou fhumula a si fhindule tshithu. Tshifhe muhulu a dovha a mu vhudzisa a ri, “Ndi inwi Mesia Murwa wa Murendwa naa?” ₆₂Yesu a ri, “Ndi Nṋe. Noṱhe ni ḓo vhona ‘Mubebwa-nga-muthu o dzula thungo ya tshauḽa tsha Ramaanḓa vha vhusa vhoṱhe. U ḓo vhuya e kha gole.’ ”

₆₃Tshifhe muhulu a kherukanya phuraphura yawe a ri, “Nṋa ri kha ḓi ṱoḓa dziṅwe ṱhanzi dza mini? ₆₄Hufha no tou mu pfa nga dzaṋu nḓevhe a tshi tamba nga dzina ḽa Mudzimu. Vha hashu, ni ri mini ngazwo?” Vhoṱhe vha amba vha ri, “U na mulandu, kha a vhulawe!”

₆₅Vhaṅwe vha mbo ḓi thoma u mu pfela mare, vha mu khurumedza tshifhaṱuwo, vha mu sinḓa nga mavili vha tshi ri, “Porofita uri wo rwiwa nga nnyi!” Nga ngeno vhalindi vha vha vha a mu ṱanganedza nga mipama.

₆₆Musi Pitrosi a tshee o dzula ngei fhasi khoroni ha ḓa muṅwe wa vhashumi vha tshifhe muhulu vha vhasidzana. ₆₇A tshi vhona Pitrosi a tshi khou ora mulilo a tou mu sedzesa a ri, “Na vhone vho vha vhe na Yesu wa Nazaretha.” ₆₈Pitrosi a hanedza a ri, “Ayo a thi a ḓivhi; na zwine na khou amba a thi zwi pfi!” A tshi ralo a bva a ya lufherani; [mukukulume wa vha u a lila.] ₆₉Uḽa musidzana a dovha a mu vhona henefho, a vhudza vhaṅwe vho imaho henefho a ri, “Hoyu munna ndi muṅwe wavho.” ₇₀Pitrosi a dovha a hanedza. Hu sa athu fhela tshifhinga tshingafhani vhaṅwe vha dovha vha amba na Pitrosi vha ri, “Ni songo vhuya na hanedza uri ni muṅwe wavho, hufha na inwi ni Mugalelia.” ₇₁Pitrosi a vhuya a tou ana a ri, “Arali ndi tshi khou zwifha Mudzimu kha a nthwe. Hoyu munna ane na khou mu amba ndi ri a thi mu ḓivhi!” ₇₂A tshi tou ralo mukukulume wa vha u a lila lwa vhuvhili. Pitrosi a mbo elelwa zwiḽa zwe Yesu a amba a tshi ri, “Hu ḓo ri mukukulume u sa athu lila luvhili na vha no no hanedza kararu na ri a ni nnḓivhi.” Pitrosi a pfa o tou fhelelwa, a thoma u lila.