MARKOSI 1

₁Haya ndi mafhungo maḓifha a Yesu Khristo Murwa wa Mudzimu.

₂O thoma nga he zwa ṅwalwa buguni ya muporofita Yesaya hu tshi pfi,

₄Ndi zwe Johanisi Mulovhedzi a ḓa sogani a tshi ḓivhadza mafhungo a Mudzimu a uri vhathu vha laṱe vhuvhi havho vha lovhedzwe, Mudzimu a vha hangwele vhutshinyi havho. ₅Shango ḽoṱhe ḽa Judia na muḓi woṱhe wa Jerusalema wa ya u mu thetshelesa, vha bula vhutshinyi havho, a konou vha lovhedza mulamboni wa Jorodani.

₆Johanisi o vha o ambara nguvho ya vhukuse ha gamela, khunduni o i vhofha nga bannda ya mukumba, zwiḽiwa zwawe zwi nzie na ṋotshi dza ḓaka. ₇A vha vhudza a ri, “Hu si kale hu ḓo ḓa ane a mphira kule, lune ndi si vhuye nda fanela na u kotama nda vhofholola navhula dzawe. ₈Nṋe ndi ni lovhedza nga maḓi, hone Ene u ḓo ni lovhedza nga Muya Mukhethwa.”

₉Misi iyo Yesu a ṱuwa Nazaretha, shangoni ḽa Galelia, a yo lovhedzwa nga Johanisi mulamboni wa Jorodani. ₁₀Musi Yesu a tshi bva maḓini, kathihi fhedzi a vhona lutombo lu tshi fhanduwa, Muya Mukhethwa a tshi khou tsela khae e kha tshivhumbeo tsha ḽiivha. ₁₁Ha pfala ipfi ḽi bvaho ṱaḓulu ḽi tshi ri, “U Murwa wanga muthihi fhedzi, u a ntakadza.”

₁₂Muya a mbo ḓi mu hwala a mu isa sogani. ₁₃Henengei a fhedza maḓuvha a 40 e vhukati ha zwivhanda, Saṱhane a tshi khou mu linga. Zwo no ralo ha ḓa vharuṅwa vha mu shumela.

₁₄Musi Johanisi o no hoṋelwa dzhele Yesu a ya Galelia u ḓivhadza mafhungo maḓifha a Mudzimu ₁₅a ri, “Tshifhinga ndi tshone, ni ḓo ṱuwa ni tshi vhuswa nga Mudzimu. Laṱani-ha vhuvhi haṋu ni tende mafhungo maḓifha.”

₁₆Huno Yesu a tshi khou tshimbila khunzikhunzini ya Dzivha ḽa Galelia, a vhona vharei vha khovhe vhavhili, Simoni na murathu wawe Andrisi, vha tshi khou rea khovhe nga mambule; ₁₇a amba navho a ri, “Iḓani ni vhe vhafunziwa vhanga, ndi ni funze u vha vhafashi vha vhathu.” ₁₈Vhone vha ṱutshela mambule avho na zwenezwo, vha vha vhafunziwa vhawe.

₁₉A tshi fhirela phanḓa, a wana Jakopo ṅwana wa Zebedia e na Johanisi murathu wawe, hu hone vha tshi khou dzudzanya mambule avho tshikepeni tshavho. ₂₀Yesu a vha vhidza, vha mbo ḓi sia khotsi avho na vhashumi tshikepeni vha vha vhafunziwa vhawe.

₂₁Vha swika muḓini wa Kapernaumi. Nga Sabatha Yesu a dzhena sinagogoni a funza. ₂₂Vhathu vha kanuka pfunzo yawe, ngauri o vha a sa funzi sa vhaḓivhi vha Mulayo, a tshi tou pfala e Ene Muṋe wa mafhungo.

₂₃Zwenezwo muṅwe munna we a vha e na thuṅwa ya Saṱhane, a ṱavha mukosi a ri, ₂₄“U ṱoḓani fhano Iwe Yesu wa Nazaretha? Kani-ha ndi hone wo ḓa u ri lozwa? Iwe ndi a u ḓivha: U muḓinḓa mukhethwa wa Mudzimu.” ₂₅Yesu a i kaidza a ri, “Fhumula iwe, u bve kha hoyu muthu!” ₂₆Iyo thuṅwa ya khwiḓukanya uyo munna, ya ṱavha mukosi muhulu ha mbo ḓi vha u bva hayo. ₂₇Zwa akhamadza vhathu vhoṱhe lwe vha thoma u vhudzisana vha ri, “Nṋa ndi mini izwi? Kani ndi yone pfunzo ntswa i no tou vha na maanḓa mangafha? Henefha hune a kaidza na thuṅwa dza mu pfa!” ₂₈Zwi tshi ralo bvumo ḽa Yesu ḽa mbo ḓi pfala hoṱhe-hoṱhe shangoni ḽa Galelia.

₂₉U bva henefho sinagogoni ha vha u ya hayani ha Simoni na Andrisi vhe na Jakopo na Johanisi. ₃₀Makhulutshisadzi wa Simoni vho vha vho rwelwa fhasi nga biso, muvhili woṱhe u tshi tou duga. Yesu a mbo vhudzwa eneo mafhungo. ₃₁A ya a mu fara nga tshanḓa a mu vusa, a mbo ḓi fhola a vha bikela.

₃₂Nga madekwana ḽi tshi vho swifhala, vha ḓisa vhalwadze vhoṱhe ha Yesu, na vha na thuṅwa dza Saṱhane. ₃₃Muḓi woṱhe wa kuvhangana muṱani wonoyo. ₃₄Yesu a fhodza vhanzhi vha malwadze o fhambanaho, a pandela na thuṅwa nnzhi kha vhathu. Huno vhunga dzo vha dzi tshi ḓivha uri ndi Ene nnyi, ho ngo vhuya a dzi tendela dzi tshi zwi bula.

₃₅Nga matshelo Yesu a fhinduwa hu tshee vhusiku a yo rabela sogani. ₃₆Simoni na vhaḽa vhaṅwe vha bva vha yo mu ṱoḓa. ₃₇Vha tshi mu wana vha ri, “Vhathu vhoṱhe vha khou vha lila.” ₃₈Yesu a mbo ri, “Hafhu ri kha ḓi ḓo dzhena na kha miṅwe miḓi henefhano, ndi vha ḓivhadze-vho mafhungo maḓifha, vhunga ndo ḓela zwone.”

₃₉Ndi zwe Yesu a ṱanganya ḽoṱhe ḽa Galelia, a tshi ri u funza sinagogoni, a dovha a pandela na thuṅwa dza Saṱhane.

₄₀Ha ḓa munna khae a lwalaho vhulwadze ha lukanda vhu kumadzaho; onoyo a gwadama a mu losha a ri, “Muṋe wanga, hufha vhe na maanḓa a u mphodza; a thi fhodzwi-vho?” ₄₁Yesu a mu pfela vhuṱungu, a isa tshanḓa tshawe a mu kwama a ri, “Na zwino, fholani zwaṋu.” ₄₂A mbo ḓi fhola na zwenezwo, a sala o tou swoto. ₄₃Yesu a mu pandela a tshi amba o tou halifha a ri, ₄₄“Ni a vhona, ni songo vhuya na zwi vhudza muthu, tshaṋu ni mbo ḓi ya ha tshifhe uri a ni vhone, ni konou ṋekedza tshipfumelo tshe ra laedzwa nga Mushe, tshi vhe hone vhuṱanzi kha nnyi na nnyi ha uri no fhola.” ₄₅Hone uyo munna u ṱuwa henefho ha mbo ḓi vha u thoma u anḓadza ayo mafhungo, lwe Yesu zwa vho mu konḓela u tshimbila vhathuni; a vho tou dzula masogani; hone na henefho vhathu vha ḓi mu tevhela vha tshi bva thungo dzoṱhe.