MATIOSI 21

₁Musi vha tshi vho sendela Jerusalema, vha tshi vho swika Bethefage, Thavhani ya Miolivi, Yesu a ruma vhafunziwa vhavhili ₂a vha vhudza a ri, “Iyani muḓini u re hafho phanḓa. Hu ḓo ri ni tshi kha ḓi tou dzhena khawo na wana donngi ya tsadzi yo hungwaho i na donngana. Ni i vhofholole ni i ḓise fhano. ₃Arali na vhudziswa uri ni khou zwi itelani, ni ri, ‘Thovhele u na mushumo nadzo; u ḓo dzi vhuisa hu si kale.’ ”

₄Zwenezwo zwo itea uri hu khunyelele ḽo ambiwaho nga muporofita a tshi ri,

₆Vhafunziwa vha mbo ya vha ita zwenezwo zwe Yesu a vha laedza. ₇Vha ḓisa iḽa donngi na ṅwana wayo, vha kapea zwiambaro zwavho khadzo, Ene a konou namela. ₈Vhunzhi ha gogo ha adza zwiambaro gondoni, vhaṅwe vha rema matavhi a miri vha tshi a ala-vho nḓilani. ₉Vhathu vhe vha vha vhe phanḓa hawe na vhe vha vha vhe murahu vha thoma u huvha mihuvho vha tshi ri,

₁₀Yesu a tshi dzhena Jerusalema muḓi woṱhe wa tou dzinginyea nga bvumo ḽawe vhathu vha tshi ri, “Nṋa a nga vha e nnyi onoyu?” ₁₁Ḽiḽa gogo ḽa fhindula ḽa ri, “Ndi uḽa muporofita, Yesu wa Nazaretha kha ḽa Galelia.”

₁₂Yesu a dzhena muṱani wa thembele a thoma u pandela vhoṱhe vhe vha vha vha tshi khou renga na vhe vha vha vha tshi khou rengisa zwithu zwavho henefho, a mbo thenukanya maḓafula a vhatshintshi vha tshelede na zwidulo zwa vharengisi vha maivha, ₁₃ a vha vhudza a ri, “Maṅwalo a ri, ‘Nnḓu yanga i ḓo pfi nnḓu ya thabelo,’ zwino inwi no no i shandula ‘bako ḽa mavemu!’ ”

₁₄Ndi hone hu tshi ḓa mabofu na zwihole ha Yesu henefho thembeleni, a vha fhodza. ₁₅Vhotshifhe vhahulwane na vhaḓivhi vha Maṅwalo vha tshi vhona maḓembe e a ita, vha tshi pfa na vhana vha tshi khou huvha mihuvho henefho thembeleni vha tshi ri, “Hosiana! Murwa wa Dafita asuyu!” vha dinalea ₁₆vha amba na Yesu vha ri, “Nṋa vha khou zwi pfa zwine avha vhana vha khou amba?” Yesu a vha fhindula a ri, “Ndi khou vha pfa. Nṋa matsiko a ni athu vhala Maṅwaloni hune ha pfi, ‘Ndi ḓo ita uri milomo ya vhaṱoma na vhushie i nthende’?” ₁₇Ndi hone a tshi vha sia henefho a ṱuwa Jerusalema a ya Bethania a lala hone.

₁₈Nga matshelo Yesu a tshi vhuelela Jerusalema a farwa nga nḓala. ₁₉A vhona muhuyu wo ima henefho tsini ha nḓila u woṱhe, a ya khawo u yo ṱoḓa mahuyu, a si wane tshithu, a wana u na maṱari fhedzi. Ndi hone a tshi amba nawo a ri, “A u tsha ḓo aṋwa fuyu na lini na lini!” Muhuyu wa mbo ḓi oma na zwenezwo.

₂₀Vhafunziwa vha tshi zwi vhona vha kanuka vha ri, “Nṋa zwo ḓa hani muhuyu u tshi oma na zwenezwo?” ₂₁Yesu a vha fhindula a ri, “Zwino ipfani-ha: arali ni na lutendo, ni sa timatimi, a ni nga iti zwi no nga hezwi zwa muhuyu fhedzi; ni ḓo tou amba na thavha hei na ri, ‘Takuwa u ḓipose lwanzheni!’ zwa ralo. ₂₂Na zwoṱhe zwine na ḓo humbela nga thabelo ni tshi fulufhela ni ḓo fhiwa.”

₂₃Yesu a dzhena muṱani wa thembele a funza vhathu. Ndi hone vhotshifhe vhahulwane na vhahulwane vha lushaka vha tshi ḓa khae vha ri, “Nṋa ni tshi ita nga u ralo zwi bva kha nnyi? Ndi nnyi o ni fhaho maanḓa a u zwi ita?” ₂₄Yesu a vha fhindula a ri, “Imani ndi ni vhudzise-vho mbudziso. Arali na i fhindula ndi ḓo kona u ni vhudza-vho uri zwi bva kha nnyi ndi tshi ita nga u ralo. ₂₅Mbudziso yanga asiyi: Zwiḽa Johanisi a tshi lovhedza zwo vha zwi tshi bva kha nnyi? Kha Mudzimu kana kha vhathu?”

Vhone vha thoma u zwi amba nga tshavho vha ri, “Nṋa ri nga tou ri mini? Arali ra ri, ‘Kha Mudzimu,’ u ḓo ri, ‘Zwino-ha na kundwa ngani u tenda pfunzo yawe?’ ₂₆Zwino-vho ra ri, ‘Kha vhathu,’ ri ofha magogo haya ngauri vha ḓivha Johanisi e muporofita.” ₂₇Ndi hone vha tshi sokou fhindula Yesu vha ri, “A ri ḓivhi.” Ene a konou vha fhindula a ri, “Izwo-ha Nṋe-vho a thi nga ni vhudzi uri ndi tshi ita hezwi zwithu zwi bva kha nnyi.

₂₈“Inwi ni zwi vhona hani? Ho vhuya ha vha na muṅwe munna we a vha e na vhana vhavhili vha vhatuka. A ya ha wa u thoma a ri, ‘Ṅwananga, iyani ni yo shuma tsimuni ya minḓirivhe ṋamusi.’ ₂₉Muṱhannga a fhindula a ri, ‘A thi funi.’ Hone a sala a tshi ḓisola a ya. ₃₀Ndi hone khotsi avho a tshi ya ha wa vhuvhili a mu vhudza zwenezwiḽa. Muṱhannga a fhindula a ri, ‘Ndi zwone muṋe wanga,’ hone a sala a si tsha ya. ₃₁Zwino kha havha vhavhili ndi nnyi we a ita zwine khotsi awe a zwi funa?” Vhaḽa vha fhindula vha ri, “Ndi uḽa wa u thoma.” Yesu a vha vhudza a ri, “Thetshelesani ndi ni vhudze: vhathelisi vhadzia-u-ṱangula vhathu, na dziphombwe, vha ḓo dzhena muvhusoni wa Mudzimu inwi ni sa athu. ₃₂Hufha Johanisi o ḓa u ni sumbedza nḓila-nḓila ni si mu tende, hone vhathelisi na dziphombwe vho tenda zwe a amba, inwi na zwi vhona, ni si sale ni tshi ḓisola na zwi tenda.

₃₃“Tshiṅwe tshifanyiso asitshi: Ho vhuya ha vha na muṋe wa tsimu we a lima minḓirivhe a i vhiela nga mutsheṱo, a kora bonḓelo ḽa u sukela nḓirivhe kha lutombo, a ita na u fhaṱa ḓingo ḽilapfu ḽa u linda tsimu. O no ralo a i hirisa kha vhalimi a pfulutshela shangoni ḽiṅwe. ₃₄Musi tshifhinga tsha u fula nḓirivhe tshi tshi swika a ruma vhashumi kha vhahiri uri vha yo dzhia mukovhe wawe. ₃₅Vhalimi vhone vha fara vhashumi vhaḽa, muṅwe vha mu likita, muṅwe vha mu vhulaha, muṅwe vha mu kanḓa nga matombo. ₃₆A dovha a ruma vhaṅwe vha no fhira vhaḽa vha u thoma, na vhone vha vha ita zwenezwo. ₃₇A fhedza nga u ruma ṅwana wawe wa mutuka a ri, ‘Ndi vhona uri ṅwananga vha ḓo mu teledza.’ ₃₈Hone vhaḽa vhalimi vha tshi vhona ṅwana wawe vha amba nga tshavho vha ri, ‘Hoyu ndi ene muḽaifa. Iḓani noṱhe ri mu vhulahe, ndi hone tsimu iyi i tshi ḓo vha ifa ḽashu!’ ₃₉Vha fara uḽa muṱhannga vha mu kudza nnḓa ha tsimu ya minḓirivhe vha mu vhulaha. ₄₀Zwino muṋe wa tsimu a tshi vhuya, vhaḽa vhalimi u ḓo vha itani?” ₄₁Vha fhindula vha ri, “Zwigevhenga zwiḽa nandi? U ḓo vha vhulaha nga nḓila i ofhisaho, iyo tsimu a i ṋea vhaṅwe vhalimi, vhane vha ḓo mu ṋea mukovhe wawe nga tshifhinga.”

₄₂Yesu a vha vhudza a ri, “Kani a ni athu vhuya na vhala Maṅwaloni fhaḽa hu no pfi,

₄₃ “Ndi zwine nda khou ni vhudza nda ri ni ḓo dzhielwa muvhuso wa Mudzimu wa fhiwa lushaka lune lwa aṋwa mitshelo yawo. [ ₄₄Ane a wela kha tombo iḽo u ḓo vunḓekana; hu ḓi nga ane ḽa mu wela, ḽi a mu pwaṱukanya.”]

₄₅Vhotshifhe vhahulwane na Vhafarisei vha tshi pfa zwifanyiso zwawe vha mbo ḓi zwi pfa uri u khou amba vhone, ₄₆vha vho linga uri a farwe, hone vha ofha gogo ḽa vhathu, ngauri gogo ḽo vha ḽi tshi ri Yesu ndi muporofita.