LUKASI 18

₁Yesu a tshi ṱoḓa u vha funza uri vha fanela u dzula vha tshi rabela vha sa kulei nungo, a vha vhudza tshifanyiso hetshi ₂a ri, “Muḓini muṅwe ho vhuya ha vha na muṅwe muhaṱuli we a vha a sa ofhi Mudzimu, na muthu a sa londi. ₃Zwino muḓini wonoyo ho vha hu na muṅwe musadzi wa tshilikadzi; onoyo o vha a tshi ḓi ya ha muhaṱuli a tshi ri, ‘Kha vha nndamulele-vho kha swina ḽanga.’ ₄Ha fhela tshifhinga uyo muhaṱuli a sa zwi londi, hone a guma nga u elekanya a ri, ‘Nangwe ndi sa ofhi Mudzimu, na muthu ndi sa londi, ₅hone vhunga hei tshilikadzi i tshi ṱolou nnzindela, ndi ḓo vhuya nda sokou i lamulela ngauri nda sa ralo i ḓo ḓi ṱolou nnzindela, ya ḓo vhuya ya nndina!’ ” ₆Muṋe washu a konou ri, “Edzonu pfa zwine muhaṱuli wa mbilu mmbi a amba! ₇Zwino Mudzimu Ene vhanangiwa vhawe vhane vha mu ṱavhela mukosi vhusiku na masiari, a nga kundwa ngani u vha lamulela, naho a vha lengelela? ₈Nṋe ndi ri u ḓo ṱavhanya u vha lamulela. Hone Mubebwa-nga-muthu a tshi vhuya u ḓo wana shangoni hu tshi kha ḓi vha na lutendo naa?”

₉Na vha u ḓifhima uri vhone ndi vhavhuya, vha tshi nyadza vhaṅwe, Yesu a vha vhudza tshifanyiso hetshi a ri, ₁₀“Vhaṅwe vhanna vhavhili, Mufarisei na muthelisi, vho vhuya vha gonya thembeleni u yo rabela. ₁₁Mufarisei a ḓa a ima henefho, a rabelela mbiluni a ri, ‘Ndi a u livhuha Mudzimu ngauri a thi fani na vhaṅwe vhathu: ho dzula mavemu, vha songo lugaho, dziphombwe, nangwe e hoyu muthelisi, a thi fani nae. ₁₂Ndi ḓidzima luvhili nga vhege, ndi bvisa tshafumi kha zwoṱhe zwine nda wana.’ ₁₃Muthelisi ene a ima nga kulenyana a tshi tou tata na u lilala, a sokou ḓirwa khana nga u ḓisola a tshi ri, ‘Yawee Mudzimu, a thi hangwelwi-vho na, nṋe mutshinyi!’ ” ₁₄Yesu a ri, “Ndi a ni vhudza ndi ri, we a ya hayani o hangwelwa ndi muthelisi, e si Mufarisei. Vhoṱhe vhane vha ḓihudza vha ḓo ṱukufhadzwa, vhane vha ḓiṱukufhadza vha ḓo huliswa.”

₁₅Vhaṅwe vhathu vha vho ita na u ḓisa vhana ha Yesu uri a vha vhee zwanḓa. Vhafunziwa vha tshi zwi vhona vha vha kaidza. ₁₆Yesu Ene a vhidza avho vhana uri vha ḓe khae a ri, “Litshani vhana vha ḓe ha Nṋe; ni songo vha dzivhisa, ngauri muvhuso wa Mudzimu ndi wa vha no nga vhenevha. ₁₇Zwino ipfani-ha: ane a si tende u vhusiwa nga Mudzimu unga ṅwana, ha nga dzheni muvhusoni wawe na kathihi.”

₁₈Muṅwe wa vhahulwane vha Majuda a mu vhudzisa a ri, “Nandi vhone mufunzi muvhuya, uri ndi wane vhutshilo vhu sa fheli ndi fanela u ita mini?” ₁₉Yesu a mu fhindula a ri, “Khezwi ni tshi nnyita muvhuya? A hu na muthu a re muvhuya; muvhuya ndi Mudzimu e eṱhe. ₂₀Zwino milayo ya uri, ‘U songo ita vhupombwe; u songo vhulaha muthu; u songo tswa; u songo zwifhelela muṅwe; u hulise khotsi au na mme au’ hufha ni tshi i ḓivha?” ₂₁Munna uyo a fhindula a ri, “Heyo yoṱhe ndo i tevhedza u bva hanani.” ₂₂Yesu a tshi pfa zwenezwo a ri, “Ho tou sala tshithihi fhedzi tshine na fanela u tshi ita: rengisani zwoṱhe zwine na vha nazwo, ni kovhele vhashai tshelede; lwaṋu lupfumo ni ḓo lu wana ṱaḓulu. No no ita zwenezwo, ni ḓe ni vhe mufunziwa wanga.” ₂₃Munna uyo a tshi pfa izwo a ṱungufhala, ngauri o vha o pfuma zwihulu.

₂₄Yesu a tshi vhona uri o ṱungufhala a ri, “Zwi konḓa hani uri vhapfumi vha dzhene muvhusoni wa Mudzimu! ₂₅Muthu o pfumaho u dzhena muvhusoni wa Mudzimu zwi mu konḓela u fhira musi gamela i tshi edzisa u fhira nga buli ḽa ṋeleṱe.” ₂₆Vhathu vhe vha pfa a tshi ralo vha ri, “Zwino hu kha ḓi ḓo tshidzwa nnyi-ha?” ₂₇Yesu a fhindula a ri, “Zwine vhathu zwa vha kunda, Mudzimu a zwi mu kundi.”

₂₈Ndi hone Pitrosi a tshi ri, “Kha vha dzou vhona riṋe, ro ṱutshela zwoṱhe zwe ra vha ri nazwo ra vha vhafunziwa vhavho.” ₂₉Yesu a ri, “Zwino ipfani-ha: muthu ane a ṱutshela nnḓu yawe kana musadzi kana vharathu kana vhabebi kana vhana vhawe a tshi itela muvhuso wa Mudzimu, ₃₀Mudzimu ha nga litshi u mu ṋea zwi no fhira kule zwiḽa zwe a ṱutshela. U ḓo mu ṋea musi a tshee fhano shangoni; huno musi ndi tshi vhuya u ḓo mu ṋea na vhutshilo vhu sa gumi.”

₃₁Yesu a vhidzela vha 12 thungo a amba navho a ri, “Ḓivhani uri ri khou gonya Jerusalema. Henengei hu ḓo itea zwoṱhe zwe vhaporofita vha ṅwala vha tshi amba Mubebwa-nga-muthu uri: ₃₂U ḓo kumedzwa vhannḓa. Vhenevho vha ḓo tamba ngae vha mu tambudza, vha tshi mu pfela na mare. ₃₃Vha ḓo mu rwa nga mboma, vha fhedza nga u mu vhulaha. Hone nga ḓuvha ḽa vhuraru u ḓo vuwa vhafuni.”

₃₄Vhafunziwa ayo mafhungo a vho ngo kona u a ṱalukanya ngauri o vha a tshee o vha dzumbama, huno vha si ḓivhe uri Yesu a tshi ralo u amba mini.

₃₅Musi Yesu a tshi vho sendela Jerikho, ha vha uri muṅwe munna wa bofu o dzula tsini ha nḓila a tshi khou humbela zwifhiwa. ₃₆Onoyo a tshi pfa hu tshi khou fhira gogo ḽihulu a vhudzisa uri hu khou itea mini. ₃₇Vha mu vhudza vha ri, “Hu khou fhira Yesu wa Nazaretha.” ₃₈Ene a vhidzelela a ri, “Yesu Murwa wa Dafita, a thi khathutshelwi zwanga naa?” ₃₉Vhathu vhe vha vha vhe phanḓa vha mu kaidza uri a fhumule, fhedzi ha tou vha hone a tshi ṋaṋa u ṱavha mukosi a tshi ri, “Murwa wa Dafita, a thi khathutshelwi zwanga naa?” ₄₀Yesu a ima a ri uyo munna wa bofu a ḓiswe. A tshi swika Yesu a mu vhudzisa a ri, ₄₁“Ni funa ndi tshi ni itela mini?” Ene a ri, “Muṋe wanga, ndi tama u vhona.” ₄₂Ndi hone Yesu a tshi amba nae a ri, “Nazwino fholani ni vhone; lutendo lwaṋu lwo ni fhodza.” ₄₃Kathihi fhedzi a mbo ḓi kona u vhona; a renda Mudzimu a tshi khou tevhela Yesu. Vhathu vhoṱhe vha tshi zwi vhona vha renda Mudzimu.