LUKASI 11

₁Muṅwe musi Yesu o vha a tshi khou rabela huṅwe fhethu. Musi o no fhedza, muṅwe wa vhafunziwa vhawe a mu humbela a ri, “Muṋe washu, nga vha ri funze u rabela, u ḓi nga na Johanisi o funza vhafunziwa vhawe.” ₂Yesu a ri, “Ni tshi rabela ni tou ri,

₅A konou amba navho a ri, “Nṋa arali muṅwe waṋu a nga ya ha khonani yawe vhukati ha vhusiku a ri, ‘Khonani yanga, ndi khou humbela u fariswa nga mikonde miraru ya vhurotho; ₆ho tshenuwa ho dzhena mueni, zwino a thi na na tshini tshine a nga ḽa!’ ₇– nṋa uyo a nga kona u fhindula e ngomu nḓuni a ri, ‘Nṋe ni songo ṱolou nndina hafha ni tshi khou vhona ndo no vala na vothi, nṋe na vhananga ro no lala; ndi nga si vuwe nda ni fha.’ ₈Nṋe ndi ri naho a sa itwi nga ḽa vhukonani u ḓo vuwa a mu fha zwine a zwi lila nga u vhona u sivhelela hawe. ₉Ndi zwine nda ri: Ni ḓi dzula ni tshi humbela, ni ḓo ṋewa; ṱoḓani, ni ḓo wana; khokhonyani, ni ḓo vulelwa.

₁₀“Ndi uri ane a humbela, Mudzimu u ḓo mu fha; a ṱoḓaho u ḓo wana; nahone ane a khokhonya u ḓo vulelwa. ₁₁Ndi nnyi waṋu vhokhotsi a vhana ane ṅwana wawe a tshi mu humbela khovhe a nga mu fha ṋowa, ₁₂kana a tshi mu humbela gumba a mu ṋea phame? ₁₃Arali inwi na vhuvhi haṋu ni tshi kona u ṋea vhana vhaṋu zwivhuya, Khotsi aṋu wa ṱaḓulu u ḓo kundwa ngani u ṋea Muya Mukhethwa vha mu humbelaho?”

₁₄Yesu o vhuya a pandela thuṅwa ya tshimuma kha muṅwe munna, yone ya ri u bva, munna uyo a vho amba, vhathu vha kanuka. ₁₅Hone vhaṅwe vha ri, “U pandela thuṅwa nga maanḓa a Belesebulu khosi yadzo.”

₁₆Vhaṅwe-vho vha tshi mu linga vha mu humbela uri a ite tshiga tshi sumbaho uri maanḓa awe a bva ha Mudzimu. ₁₇Yesu nge a ḓivha zwine vha elekanya, a amba navho a ri, “Arali muvhuso wa ḓifhandekanya wa bva zwigwada zwivhili, zwa lwa nga tshazwo, tshawo ndi u wa; zwi ḓi nga muṱani, arali ha bva zwigwada zwivhili zwa lwa nga tshazwo, muṱa wonoyo ndi hone wo pwashea. ₁₈Zwo ralo na kha muvhuso wa Saṱhane, arali wa fhandekana wa bva zwigwada zwivhili zwine zwa lwa nga tshazwo, u nga ima hani? Ndi amba ngauri ni ri ndi pandela thuṅwa nga maanḓa a Belesebulu. ₁₉Zwino arali Nṋe ndi tshi pandela thuṅwa nga maanḓa a Belesebulu, vhafunziwa vhaṋu vha dzi pandela nga maanḓa a nnyi? Ndi zwine vhenevho vha ḓo sumbedza uri zwine na amba a si zwone.

₂₀“Hone vhunga zwi khagala uri Nṋe ndi pandela thuṅwa nga maanḓa a Mudzimu, ndi tshiga tsha uri muvhuso wa Mudzimu wo swika kha inwi.

₂₁“Arali munna wa vhuhali a fara mafumo a linda nnḓu yawe, thundu yawe a hu na hune ya nga ya. ₂₂Hu nga tou thoma u ḓa a re na vhuhali u mu fhira, a lwa nae a mu kunda, a dzhia na aḽa mafumo e a vha o ḓitika ngao a konou kovhela vhathu thundu ye a thuba.

₂₃“Muthu ane a sa ime na Nṋe u lwa na Nṋe, a sa kuvhanganyiho sambi na Nṋe u a ḽi fhaḓa.

₂₄“Thuṅwa ya Saṱhane arali i tshi bva muthuni, i buḓekanya masoga i tshi ṱoḓa ha u awela hone. Musi yo kundwa i a amba ya ri, ‘Ndi ḓo vhuelela nḓuni yanga ine nda bva khayo!’ ₂₅I tshi swika i wana uyo muthu a tshi tou nga sa nnḓu yo swielwaho, ya thundu dzo vhekanywaho zwavhuḓi. ₂₆Zwenezwo i mbo yo dzhia dziṅwe thuṅwa ṱhanu na mbili dza vhuhali u fhira yone; dza ḓa dza dzhena kha uyo muthu dza dzula khae, mafhungo a vho vhifha u fhira zwiḽa mulovha.”

₂₇A tshi tou ralo muṅwe musadzi a vhidzelela e vhukati ha gogo a ri, “Ha, musadzi we a beba vhone a vha mamisa, u na mashudu!”

₂₈Yesu Ene a fhindula a ri, “Mashudu mahulwane a na onoyo muthu ane a ri u pfa ipfi ḽa Mudzimu a ita zwine ḽa amba.”

₂₉Musi vhathu vha tshi vho tou ita tshikhuvhugu vho tanga Yesu, Ene a isa phanḓa nga u ri, “Vhathu vha musalauno vha tou vha vhavhi vhukuma; vha humbela u itelwa maḓembe, hone a vha tsha ḓo vhona maṅwe arali e si aḽa a Jonasi. ₃₀Mubebwa-nga-muthu u ḓo vha tshiga kha vha musalauno zwa nga zwiḽa Jonasi e tshiga kha vhathu vha Ninive.

₃₁“Nga ḓuvha ḽa khaṱhulo khosi ya mufumakadzi i bvaho tshipembe i ḓo ḓa khoroni u rovhedza vhathu vha musalauno, ngauri ene o tou tshimbila a zwi pfa a tshi bva vhusendakamisi a tshi yo pfa vhuṱali ha Solomoni. Nṋe ndi ri: a fhiraho Solomoni u fhano. ₃₂Nga ḽeneḽo ḓuvha vha Ninive vha ḓo ḓa khoroni u rovhedza vhathu vha musalauno, ngauri vhone vho ri u pfa pfunzo ya Jonasi vha rembuluwa. Nṋe ndi ri: a fhiraho Jonasi u fhano.

₃₃“Ndi nnyi ane a ri u funga luvhone a lu dzumba tshisikuni kana a lu tiba nga nkho naa? Ha lu vhei vhudzuloni halwo kani uri lu vhonetshele vha no dzhena nḓuni? ₃₄Na maṱo aṋu o ralo; ndi luvhone lwa muvhili woṱhe. Arali maṱo aṋu a sa lwali, na muvhili waṋu woṱhe u ḓo vha tshedzani. Hone arali e si kwao, izwo na muvhili waṋu u ḓo vha swiswini. ₃₅Zwino ni vhone uri tshedza tshi re kha inwi tshi si shanduke swiswi. ₃₆Zwino arali muvhili waṋu woṱhe u na tshedza, hu si na na huṱukuṱuku hune wa vha na swiswi, u ḓo penya woṱhe zwa tou nga zwiḽa luvhone lu tshi ni vhonetshela.”

₃₇A tshi tou fhedza u amba, muṅwe Mufarisei a mu humbela uri a yo ḽa nae ha hawe; nangoho vha swika vha thoma u ḽa. ₃₈Tshe tsha kanukisa Mufarisei ndi nge Yesu a ḽa a songo ṱamba zwanḓa. ₃₉Ndi hone Muṋe washu a tshi ri, “Inwi Vhafarisei, ni ṱanzwa khavho na ndilo nga nnḓa hu uri mbiluni dzaṋu ndi tseḓa fhedzi na vhuvhi! ₄₀Matsilu ndinwi, nṋa Mudzimu we a sika nga nnḓa a si onoyo we a sika na nga ngomu? ₄₁Hone khezwi ni sa ṋei vhashai zwi re khavhoni na ndiloni dzaṋu; ndi hone ni tshi ḓo wana hu si tshee na tshi na tshika.

₄₂“Ni khou ḓiṱulela khombo inwi Vhafarisei! Ni bvisa tshafumi kha lugu na muxe na miṅwe miroho ya tshakha-tshakha, hone a ni londani, a ni funi Mudzimu, ngeno zwi zwone zwine na fanela u zwi ita, na zwiḽa zwiṅwe ni si zwi litshe.

₄₃“Ni ḓiṱulela khombo inwi Vhafarisei! Ni funesa u dzudzwa ha khwiṋe sinagogoni, na u reshwa nga u huliswa vanḓani. ₄₄Ea izwi! Hufha ni tshi nga zwalo zwo no kanganyedzeaho zwine vhathu vha tshimbila khazwo vha ḓikumadza vha sa zwi ḓivhi.”

₄₅Zwenezwo muṅwe wa vhaḓivhi vha Mulayo a ri, “Vha a ḓivha vhafunzi, vha tshi ralo vha khou sema na riṋe?”

₄₆Yesu a fhindula a ri, “Na inwi vhaḓivhi vha Mulayo ni ḓo zwi vhona! Ni takadzwa nga u hwesa vhaṅwe mihwalo i lemelaho ngeno inwi vhaṋe ni sa vhuyi na funa na u i kwama na nga munwe zwawo. ₄₇Ee, vhukuma zwi ḓo ni vhifhela. Ni ṱama zwalo zwa vhaporofita, vhenevhaḽa vhaporofita vhe vhomakhulukuku waṋu vha vha vhulaha. ₄₈Arali ni tshi ralo zwi sumbedza uri ni khou pfumbisa zwe vhomakhulukuku waṋu vha ita, ngauri vhone vho vha vha u vhulaha, inwi ni vha u ṱama zwalo. ₄₉Vhuṱali ha Mudzimu iṱali ho vha ho no ḓi zwi amba ha ri, ‘Ndi ḓo vha rumela vhaporofita na vhaapostola, vhone vha ḓo tovhola vhaṅwe, vha ita na u vha vhulaha.’ ₅₀Hezwi zwi amba uri malofha a vhaporofita vhoṱhe e a shululwa tshee shango ḽa sikwa, a ḓo vhiliwa kha vhathu vha musalauno – ₅₁u bva kha malofha a Abele u vhuya u swika nga a Zakaria we a vhulawa vhukati ha aḽiṱari na nnḓu ya Mudzimu. Ee, ndi hone ndo amba; oṱhe a ḓo vhiliwa kha vhathu vha musalauno!

₅₂“Ni ḓo zwi vhona inwi vhaḓivhi vha Mulayo! No ṱuwa na khii ya nḓivho, zwino hu vho ri inwi a no ngo dzhena, na vhaḽa vhane vhe ri a dzhena, ni a vha dzivhisa.”

₅₃Yesu a tshi ṱuwa henefho vhaḓivhi vha Mulayo na Vhafarisei vho vha vho no mu fara nga mbilu, vha thoma u mu ṱokonya nga u mu vhudzisa tshino na tshiḽa. ₅₄U ralo ho vha hu u mu rea fhedzi uri khamusi u ḓo tshenuwa o amba tshiṅwe tshi songo ḓaho.