LUKASI 1

₁Thifilosi muṋe wanga, Ho no ḓi vha na vhanzhi vhe vha edzisa u ṅwala dzibugu nga zwe zwa itea vhukati hashu. ₂Vho ṅwala eneaḽa e ra vhudzwa nga vhe vha tou zwi vhona u bva mathomoni azwo, vha vhuya vha vha vhaanḓadzi vha mafhungo maḓifha. ₃Ndi hone muṋe wanga, nṋe-vho ndi tshi konou sedzulusa ayo mafhungo nga vhuronwane u bva he a thoma, nda zwi vhona uri zwo fanela ndi tshi vha ṅwalela bugu ine ya a hanelela yo tou dzudzanywaho zwavhuḓi. ₄Hezwi ndi khou zwi itela uri na vhone vha kone u ḓivha uri mafhungo haya e vha funzwa ndi ngoho vhukuma.

₅Misi Herude e khosi shangoni ḽa Judia ho vha hu na muṅwe tshifhe wa tshigwada tsha Abia we a vha a tshi pfi Zakaria. Musadzi wawe na ene o vha e wa lutsinga lwa Aroni, a tshi pfi Elisabethe.

₆Vhoṱhe vhuvhili havho vho vha vha tshi tshila vhutshilo vhu takadzaho Mudzimu, vha tshi tevhedza milayo yoṱhe na maipfi a Muṋe washu vha sa solisei. ₇Hone vho vha vha si na ṅwana ngauri Elisabethe o vha e muumba, nahone vhuvhili havho vho vha vho no vha vhathu vha maḓuvha.

₈Ḽiṅwe ḓuvha Zakaria o vha e ene tshifhe nḓuni ya Mudzimu nga tshifhinga tshe tsha vha tsho telwa tshigwada tshawe. ₉O vha o tou nangwa nga madeṅwa hu tshi tevhedzwa kuitele kwa vhotshifhe, uri a vhe ene ane a dubisela Mudzimu zwioro kha aḽiṱari. Ndi zwe a vha o dzhena nḓuni ya Mudzimu, ₁₀vhathu vhoṱhe vho sala muṱani wa thembele vha tshi khou rabela nga tshifhinga tsha u dubisa zwioro. ₁₁Ha ḓa muruṅwa wa Muṋe washu a ḓisumbedza ene, a vhonala o ima thungo ya tshauḽa tsha aḽiṱari ya zwioro. ₁₂Zakaria a tshi vhona uyo muruṅwa a tshenuwa o dzhenwa nga nyofho. ₁₃Ndi hone uyo muruṅwa a tshi amba nae a ri, “U songo ofha Zakaria. Thabelo yau yo pfiwa. Nazwino Elisabethe musadzi wau u ḓo u bebela ṅwana wa mutukana; u mu rine dzina ḽi no pfi Johanisi. ₁₄Iwe u ḓo takala lwa u takala; vhanzhi vha ḓo pembelela u bebwa hawe. ₁₅U ḓo vha muthu muhulwane phanḓa ha Mudzimu. Ha nga nwi waini na zwi kambaho; u ḓo bebwa o ḓala Muya Mukhethwa. ₁₆Vhanzhi vha lushaka lwa Israele u ḓo vha humisela ha Mudzimu Muṋe wavho. ₁₇U ḓo vha muḓinḓa wa Mudzimu, a re na Muya Mukhethwa na maanḓa a Muporofita Elia. U ḓo pfumedzanya vhabebi na vhana vhavho; vhadzia-u-sa-pfa u ḓo ita uri vha vhe vhavhuya, uri vhathu vha dzule vho lindela Muṋe wavho.”

₁₈Zakaria a vhudzisa uyo muruṅwa a ri, “Nṋa ndi ḓo zwi ḓivha hani uri zwine wa khou amba ndi zwone? Ndi amba ngauri nṋe ndo no ḓi vha mukalaha, na musadzi wanga o no vha mukegulu!” ₁₉Muruṅwa a fhindula a ri, “Ndi nṋe Gabriele mukoma a ṱwaho na Mudzimu; ndo rumiwa u ḓa u u vhudza mafhungo haya maḓifha. ₂₀Zwino-ha ngauri a wo ngo tenda zwe nda u vhudza, a u tsha ḓo kona u amba hu vhuye hu itee zwe nda amba; u itea hone zwi ḓo itea nga tshifhinga tshazwo.”

₂₁Zwi tshi khou ralo vhathu vho vha vho ḓi lindela Zakaria vha tshi vho kanuka uri u khou lengiswa nga mini nḓuni ya Mudzimu. ₂₂Ene a tshi bvela nnḓa o vha a sa tsha kona u amba na vhathu, vhone vha zwi vhona uri o vhona bono musi e nḓuni ya Mudzimu. Zwino nge a kundwa u amba nga mulomo a vho tou amba navho nga zwanḓa.

₂₃Musi tshifhinga tshawe tsha u shuma thembeleni tshi tshi fhela, Zakaria a humela hayani. ₂₄Hú songo fhela tshifhinga tshingafhani Elisabethe musadzi wawe a vha muthu wa thovhela, a fhedza miṅwedzi miṱanu o ḓidzumba, ₂₅a tshi ri, “Zwino ndi hone Mudzimu o nnyitela vhuthu; o fhedza huḽa u ṱolou sewa hanga.”

₂₆Musi zwi tshi vho ita miṅwedzi miṱanu na muthihi Elisabethe e muthu wa thovhela, Mudzimu a mbo ruma muruṅwa Gabriele kha muṅwe muḓi wa Galelia une wa pfi Nazaretha ₂₇u isa fhungo kha muṅwe musidzana we a vha o fulufhedziswa munna a no pfi Josefa, muḓuhulu wa khosi Dafita. Onoyo musidzana o vha a tshi pfi Maria. ₂₈Muruṅwa a ḓa khae a ri, “Mulalo Maria! Mashudu au ndi mahulu; Muṋe washu u na iwe.” ₂₉Maria a tshi pfa ayo maipfi a akhamala, a ḓivhudzisa mbiluni uri zwi nga vha zwi tshi amba mini. ₃₀Ndi hone muruṅwa a tshi ri, “U songo ofha Maria; Mudzimu o u tonda zwihulu. ₃₁U ḓo vha muthu wa thovhela wa beba ṅwana wa mutukana; u mu ire dzina ḽa Yesu. ₃₂U ḓo vha muhulwane lune a ḓo tou pfi Murwa wa Waṱaḓuluṱaḓulu. Mudzimu Muṋe washu u ḓo mu ambadza vhuhosi ha Dafita makhulukuku wawe. ₃₃U ḓo vha khosi ya zwiḓuhulu zwa Jakopo misi yoṱhe; muvhuso wawe a u nga gumi!”

₃₄Ndi hone Maria a tshi amba na muruṅwa a ri, “Hufha nṋe ndi sa athu vhuya nda ḓivha muthu wa munna, zwino zwine vha khou amba zwi nga itea hani?”

₃₅Muruṅwa a tshi mu fhindula a ri, “Muya Mukhethwa u ḓo ḓa kha iwe; maanḓa a Waṱaḓuluṱaḓulu a ḓo kavha kha iwe. Ndi zwine uyo ṅwana a ḓo tou pfi Mukhethwa, Murwa wa Mudzimu. ₃₆Vhona zwe zwa itea kha shaka ḽau Elisabethe. O vha a tshi pfi ndi muumba, hone zwino vhona, zwi vho ita miṅwedzi miṱanu na muthihi e muthu wa thovhela naho o no tou vha mukegulu wa maḓuvha, ₃₇ngauri a hu na tshithu tshine Mudzimu a sa tshi kone.”

₃₈Maria a ri, “Ndi mulanda wa Muṋe washu! Zwine wa ri zwi ḓo itea kha nṋe kha zwi itee.” Ndi hone muruṅwa a tshi ṱuwa.

₃₉Hu sa athu vhuya ha fhela tshifhinga tshingafhani Maria a ṱuwa a livha muḓini muṅwe u re thavhani dza Judia. ₄₀A tshi swika a dzhena nḓuni ya Zakaria, a vusa Elisabethe. ₄₁Elisabethe a ri u pfa Maria a tshi mu vusa, ṅwana a re muvhilini wawe a thoma u tamba-tamba. Elisabethe a mbo ḓi ḓala Muya Mukhethwa, ₄₂a fhululedza a ri,

₄₆Maria a ri,

₅₆Maria a dzula na Elisabethe miṅwedzi ine ya ṱoḓou swika miraru, a konou humela hayani.

₅₇Musi tshifhinga tsha uri Elisabethe a vhofholowe tshi tshi swika, a beba ṅwana wa mutukana. ₅₈Vhahura vhawe na mashaka awe vha tshi pfa uri Muṋe washu o mu tonda zwingafhani vha takala nae nga maanḓa.

₅₉Nga ḓuvha ḽa vhuṱanu-na-vhuraru ṅwana ó bebiwa, vha ḓa u mu fumbisa. Vha ri vha ṱoḓa u mu ira dzina ḽa khotsi awe Zakaria, ₆₀hone mme awe a hanedza a ri, “Hai, hoyu u pfi Johanisi.” ₆₁Vhone vha fhindula vha ri, “Hufha hu si na wa haṋu ane a vha na dzina iḽo!” ₆₂Ndi hone vha tshi thoma u amba na khotsi awe nga zwanḓa vha tshi vhudzisa uri u funa ṅwana a tshi pfi nnyi. ₆₃Zakaria a humbela baphathi ḽa u ṅwalela khaḽo, a ṅwala a ri, “U pfi Johanisi.” Vhoṱhe vha kanuka. ₆₄A tshi kha ḓi tou ralo, Zakaria a mbo ḓi dovha a kona u amba, a thoma u renda Mudzimu. ₆₅Vhahura vhawe vhoṱhe vha dzhenwa nga nyofho; haya mafhungo oṱhe a pfala hoṱhe thavhani dza Judia. ₆₆Vhoṱhe vhe vha zwi pfa vha thoma u elekanya vha ḓivhudzisa vha ri, “Nṋa uyu ṅwana u ḓo tou vha mini?” Vha ralo nge zwa vha zwi tshi tou vhonala uri Mudzimu u nae.

₆₇Khotsi awe Zakaria a ḓala Muya Mukhethwa a porofita a ri,

₈₀Ṅwana uyo a aluwa, a khwaṱha na muyani, a dzula sogani u swika ḓuvha ḽe a bvela khagala vhukati ha lushaka lwa Israele.