JOSHUA 17

₁Tshipiḓa tsha shango ḽa vhukovhela ha Jorodani ḽo kovhelwa miṅwe miṱa ya lutsinga lwa Manase tanzhe ḽa Josefa. Makhiri khotsi a Giliadi o vha e tanzhe ḽa Manase, e muhali nndwani; ene o kovhelwa Giliadi na Bashani vhubvaḓuvha ha Jorodani. ₂Shango ḽa vhukovhela ha Jorodani ḽa kovhelwa vhaṅwe vha Manase zwi tshi tevhedza miṱa yavho: Abiesere na Heleke na Asriele na Shikheme na Hefere na Shemida. Havho ndi vhone vhaḓuhulu vha Manase ṅwana wa Josefa, nahone vho vha vhe vhaṋe vha miṱa. ₃Tselofihadi, ṅwana wa Hefere ṅwana wa Giliadi, ṅwana wa Makhiri, ṅwana wa Manase, o vha a si na vhana vha vhatuka, o vha e na vhananyana fhedzi. Vho vha vha tshi pfi Mahala na Nua na Hogola na Milikha na Thiritsa. ₄Vho ya ha tshifhe Eliasara na ha Joshua ṅwana wa Nunu na ha vharangaphanḓa, vha ri, “Muṋe washu o vhudza Mushe uri riṋe khathihi na mashaka ashu a tshinna a ri fhe tshipiḓa tsha shango uri ḽi vhe ḽashu.” Zwenezwo vha kovhelwa shango khathihi na mashaka avho a tshinna unga Muṋe washu o zwi amba. ₅Ndi zwe Manase a wana mikovhe ya fumi i tshi ingwa kha ya Giliadi na Bashani sia ḽa vhubvaḓuvha ha Jorodani, ₆vhunga vhaḓuhulu vhawe vha tshisadzi khathihi na vhaḓuhulu vhawe vha tshinna vho vha vho kovhelwa iḽo shango. Shango ḽa Giliadi ḽo vha ḽo kovhelwa vhaḓuhulu vhaṅwe vhoṱhe vha Manase.

₇Shango ḽa Manase ḽo vha ḽi tshi bva Ashere ḽa swika Mikhimithathi, vhubvaḓuvha ha Shikheme. Zwino masakha a livha tshipembe a angaredza vhathu vha Eni Thaphua. ₈Shango ḽo tangaho Thaphua ḽo vha ḽa Manase, hone muḓi wa Thaphua u re masakhani wo vha wa vhaḓuhulu vha Efraimi. ₉Masakha a tsela fhasi a livha Kudamboni kwa Kana. Miḓi ya tshipembe ha ukwo kudambo yo vha ya Efraimi, naho yo vha i shangoni ḽa Manase. Masakha a Manase a vha sia ḽa devhula ḽa ukwo kudambo, a yo guma Lwanzheni lwa Phandamashango. ₁₀Efraimi o vha e thungo ya tshipembe, Manase e thungo ya devhula, Lwanzhe lwa Phandamashango lwa vha masakha avho a vhukovhela. Thungo ya devhula vho ṋekana masakha na Ashere, vhubvaḓuvha-devhula vha ṋekana masakha na Isakhara. ₁₁Shangoni ḽa Isakhara na ḽa Ashere, Manase o vha e na muḓi wa Bethe Shiani na wa Ibiliamu, khathihi na ḓorobo dzo i tangaho, hu tshi angaredzwa na Doro (we wa vha u muvhunduni) na Endoro na Thaanakha na Megido, na ḓorobo dzo i tangaho. ₁₂Vhathu vha Manase hone a vho ngo kona u thatha vhathu vha dzulaho miḓini iyo, vhenevho Vhakanana vha ḓi dzula henefho. ₁₃Na musi Vhaisraele vhó no vha na maanḓa, a vho ngo thatha Vhakanana vhoṱhe, vho tou vha ita phuli dzavho.

₁₄Vhaḓuhulu vha Josefa vha vhudza Joshua vha ri, “Ndi mini vho ri kovhela kupiḓa kuthihi fhedzi uri ku vhe shango ḽashu? Muṋe washu o ri shudufhadza, ri vhanzhi.”

₁₅Joshua a fhindula a ri, “Arali no no anda, shango ḽa mivhunduni ḽó no vha ḽiṱuku ḽi si tsha ni eḓana, zwenezwo iyani maṱakani, ni ḓifhandele shangoni ḽa Vhapherisi na Vharefai.”

₁₆Vhone vha fhindula vha ri, “Shango ḽa mivhundu ndi ḽiṱuku, ḽi nga si ri eḓane, hone Vhakanana vha re midavhini, vhoṱhe vha no dzula Bethe Shiani na miḓanani yo u tangaho na vha no dzula govhani ḽa Jesriele vha na gariki dza tsimbi dza nndwa.”

₁₇Joshua a vhudza vha nnḓu ya Josefa vha matsinde a Efraimi na Manase, a ri, “Vhukuma ni vhanzhi, nahone ni na maanḓa. A ni wani mukovhe muthihi fhedzi. ₁₈Shango ḽa mivhunduni ḽi ḓo vha ḽaṋu. Naho ḽi na ḓaka, ni ḓo ḽi rema na ḽi dzhia ḽa vha ḽaṋu u bva kha ḽiṅwe sia u swika kha ḽiṅwe. Vhakanana vhone ni vha thathe vha ṱuwe, naho vhe na gariki dza nndwa dza tsimbi, vhe lushaka lwa maanḓa.”