JUELE 1

₂Inwi vhahulwane ipfani!

Noṱhe inwi ni dzulaho shangoni ḽino,

thetshelesani!

Ho no vhuya ha itea zwo raliho misi yaṋu

kana misi ya vhokhotsi aṋu?

₃Zwi vhudzeni vhana vhaṋu, vhana vhaṋu vha zwi vhudze

vhana vhavho-vho,

vhana vhavho vha zwi vhudze murafho u ḓaho.

₄Zwo siwaho nga lutsinga lwa nzie zwo ḽiwa nga nzie khulu.

Zwo siwaho nga nzie khulu zwo ḽiwa nga nzie ṱhukhu.

Zwo siwaho nga nzie ṱhukhu zwo fhedziswa nga magerere.

₅Vuwani ni lile, inwi zwidakwa!

Honḓani noṱhe inwi vhanwi vha waini,

lilelani waini,

yo dzhavhuliwa mulomoni waṋu.

₆Shango ḽanga ḽo dzhenelwa nga luṅwe lushaka,

lushaka lwa maanḓa lwo andaho,

lwa maṋo a no nga a ndau ya nduna,

lwa madungammbwa a no nga a ndau ya tsadzi.

₇Lwo fhedza minḓirivhe yanga,

lwa tshinyadza mihuyu yanga.

Lwo kwatula na makwati ayo,

lwa laṱa kule,

lwa sia matavhi ayo e matshena.

₈Jerusalema, lila unga muselwa a tshi lilela munna wawe

o ambara madzanganda.

₉Nduvho ya thoro na nduvho ya waini

a zwi tsha ḓo ṋekedzwa nḓuni ya Muṋe washu.

Vhotshifhe vhane vha shumela Muṋe washu

vha khou lila vha tou ṱavha mukosi.

₁₀Masimu o sala e swoto,

mavu a khou lila,

mavhele o fhela,

waini a i tsha wanala,

a hu tshee na mapfura.

₁₁Inwi vhalimi, ṱovhowani,

inwi vhalimi vha minḓirivhe,

honḓani;

lilelani goroi na baḽi,

khaṋo ya masimuni yo tshinyadzwa.

₁₂Minḓirivhe yo oma,

mihuyu yo puta;

migranada na mitshevho na miapula –

miri yoṱhe ya tsimuni yo oma.

Vhukuma dakalo ḽa vhathu ḽo fhela.

₁₃Inwi vhotshifhe,

ambarani madzanganda ni lile,

honḓani inwi ni no shuma aḽiṱarini.

Iḓani, lalani no fuka madzanganda,

inwi vhane na shumela Mudzimu wanga,

ngauri nḓuni ya Mudzimu waṋu a hu tshee na nduvho ya thoro na ya waini.

₁₄Ḓivhadzani ḓuvha ḽikhethwa ḽa u ḓidzima,

kuvhanganyani tshivhidzo tshikhethwa.

Vhidzani vhahulwane na vhoṱhe vhadzulapo,

vha ḓe nḓuni ya Muṋe washu Mudzimu waṋu,

ni ṱavhele Muṋe washu mukosi!

₁₅Musi uyo u ofhisa hani!

Vhukuma ḓuvha ḽa Muṋe washu ḽi tsini;

ḽi ḓo ḓa unga ndozwo ya Ramaanḓaoṱhe.

₁₆Zwiḽiwa a zwo ngo fhela ri tshi zwi vhona naa?

Mifhululu na dakalo a zwo ngo fhela nḓuni ya Muṋe washu naa?

₁₇Mbeu yo fela fhasi ha maḓinga.

Zwisiku a zwi tshee na tshithu,

maḓulu o pwashekana,

a hu tshee na mavhele.

₁₈Kholomo dzi ri u lila!

Masambi a kholomo a sokou tendeleka

nga u shaya pfulo;

na masambi a nngu a khou kundelwa.

₁₉Yawee Muṋe wanga,

nṋe ndi vhidzelela Iwe,

mulilo wo fhisa pfulo yoṱhe,

khavhu ya mulilo yo fhisa miri yoṱhe ya ḓaka.

₂₀Na phukha dza ḓaka dzo lindela Iwe;

milambwana ya maḓi yo xa;

mulilo wo fhisa pfulo ye lore.