JOHANISI 13

₁Vhuṱambo ha Paseka vhu tshi sendela Yesu o vha a tshi zwi ḓivha uri tshifhinga tshawe tsho swika tsha uri a ṱuwe fhano shangoni a ye ha Khotsi. O vha a tshi ḓi funa vha re vhawe fhano shangoni, huno ho vha hu hone a tshi vho ḓo sumbedza u vha funa tshoṱhe.

₂Zwino Yesu na vhafunziwa vhawe vho vha vha tshi khou lalela. Diabolo o vha o no ḓi funzedza Judasi Iskariote ṅwana wa Simoni uri a fheṱe Yesu. ₃Yesu o vha a tshi zwi ḓivha uri Khotsi o mu kumedza zwoṱhe; a tshi ḓivha na uri o ḓa a tshi bva ha Mudzimu na uri u khou vhuelela ha Ene Mudzimu. ₄Ndi zwe a takuwa afho zwiḽiwani a bvula zwiambaro zwa nṱha a kanyela thaula khunduni. ₅Ndi hone a tshi shela maḓi sambeloni a thoma u ṱanzwa milenzhe ya vhafunziwa vhawe a tshi i phumula nga iḽa thaula ye a vha o kanyela. ₆A tshi swika kha Simoni Pitrosi, ene a amba nae a ri, “Muṋe washu, nṋa Vhone vha ṱoḓa u ṱanzwa nṋe milenzhe?”

₇Yesu a fhindula a ri, “Zwine Nṋe nda khou ita zwino inwi a ni zwi ṱalukanyi, hone ni ḓo zwi ṱalukanya ngavhuya.”

₈Pitrosi a ri, “Vhone vha nga si ḓo vhuya vha nṱanzwa milenzhe.”

Yesu a ri, “Arali nda sa ni ṱanzwa a ni tsha ḓo vha muthihi na Nṋe.”

₉Simoni Pitrosi a ri, “Muṋe washu, izwo vha songo tou nṱanzwa milenzhe fhedzi, kha ndi mbo ḓi ṱanzwiwa na zwanḓa na ṱhoho!”

₁₀Yesu a ri, “O ṱambaho ha tshee na tshika; ho ngo tsha fanela u ṱamba arali i si yone milenzhe. Inwi a ni na tshika; hone ndi tshi ralo a thi ambi noṱhe.” ₁₁(Yesu o vha a tshi ḓivha ane a ḓo mu fheṱa, ndi zwone zwe a ri, “A thi ambi noṱhe.”)

₁₂Musi o no fhedza u vha ṱanzwa milenzhe, a dovha a ambara zwiambaro a vhuelela vhudzuloni hawe, a vha vhudzisa a ri, “Nṋa izwi zwe nda ni ita ni a zwi ṱalukanya naa? ₁₃Ni tshi nnyamba ni ri ‘Vhafunzi’ na ‘Muṋe washu’. Ni amba zwone, ngauri iṱali zwi zwone zwine nda vha zwone. ₁₄Zwino-ha vhunga Nṋe ndi re Muṋe waṋu na Mufunzi waṋu ndo ni ṱanzwa milenzhe, na inwi ni fanela u ṱanzwana milenzhe. ₁₅Zwe nda ita ho tou vha u ni sumbedza uri na inwi ni edzise zwe Nṋe nda ni ita. ₁₆Zwino ipfani-ha: A hu na phuli ine ya fhira muṋe wayo; na muḓinḓa ha fhiri we a mu ruma. ₁₇Zwino vhunga ni tshi zwi ḓivha ni ḓo vha na mashudu arali ni tshi nga zwi ita.

₁₈“Ndi tshi ralo a thi ambi noṱhe, vhe nda nanga ndi a vha ḓivha. Hone hu fanela u khunyelela zwe Maṅwalo a amba a tshi ri, ‘Ane ra ḽa muthathendilo o mmvutshela-vho!’ ₁₉Ndi khou ni vhudza zwino zwi sa athu itea uri zwi tshi sala zwi tshi itea ni kone u tenda uri ‘ndi ane nda vha Ene’. ₂₀Zwino ipfani-ha: Ane a vhuya a ṱanganedza we nda mu ruma u ṱanganedza Nṋe, huno ane a ṱanganedza Nṋe u ṱanganedza we a nthuma.”

₂₁Yesu o ri u amba zwenezwo a ṱungufhala vhukuma, a tou phula a ri, “Zwino ipfani-ha: muṅwe waṋu hafha u ḓo mpheṱa.” ₂₂Vhafunziwa vha lavhelesana vho hanganea vha sa ḓivhi uri u amba nnyi. ₂₃Muṅwe wa vhafunziwa, uḽa we Yesu a vha a tshi mu funa, o vha o ḓisendeka ngae. ₂₄Simoni Pitrosi a mbo ḓi mu sinyedza a ri, “Vha vhudziseni uri vha khou amba nnyi.” ₂₅Uyo mufunziwa nangoho a mbo ḓi tshingamela tsini ha Yesu a vhudzisa a ri, “Muṋe washu, ndi nnyi onoyo?” ₂₆Yesu a fhindula a ri, “Ane nda ḓo thotha kugaku muthothoni nda mu ṋea ndi ene.” Ndi hone a tshi dzhia kugaku a ku thotha a ku ṋea Judasi ṅwana wa Simoni Iskariote. ₂₇Judasi a tshi tou ḽa ukwo kugaku a mbo ḓi dzhenwa nga Saṱhane. Ndi hone Yesu a tshi mu vhudza a ri, “Zwine na fanela u zwi ita, ṱavhanyani u zwi ita!” ₂₈Kha vhe vha vha vho dzula henefho hu si vhe na muthihi we a kona u pfa uri Yesu u khou ri mini a tshi amba na Judasi. ₂₉Vhunga Judasi o vha e ene mufaratshikwama vhaṅwe vhafunziwa vho ri khamusi Yesu o mu ruma u renga zwiṅwe zwithu zwa vhuṱambo, kana uri a yo fha zwifhiwa vhashai. ₃₀Judasi a tshi tou ṱanganedza kuḽa kugaku ha mbo ḓi vha u ṱuwa. Zwenezwo ho vha vhu vhusiku.

₃₁Judasi ó no bva Yesu a ri, “Zwino ndi hone vhugala ha Mubebwa-nga-muthu ho vhonala, na vhugala ha Mudzimu ndi hone ho vhonala ngae. ₃₂Zwino vhunga vhugala ha Mudzimu ho vhonala ngae, Mudzimu Ene muṋe u ḓo vhonadza vhugala ha Mubebwa-nga-muthu, nahone ha nga lengi u zwi ita. ₃₃Vhananga, ndi kha ḓi tou vha na inwi tshifhinga tshiṱukuṱuku. Ni ḓo nṱoḓa, hone zwiḽa zwe nda vhudza Majuda ndi vhudza na inwi ndi ri, ‘Hune nda ya hone inwi ni nga si ntevhele.’ ₃₄Zwino mulayo muswa une nda ni ṋea asuyu: Funanani. Vhunga Nṋe ndo ni funa, na inwi ni fanela u funana. ₃₅Arali ni tshi funana ndi hone vhoṱhe vha tshi ḓo ḓivha uri ni vhafunziwa vhanga.”

₃₆Simoni ane ḽiṅwe a pfi Pitrosi a mu vhudzisa a ri, “Muṋe washu, nṋa vha khou ya ngafhi?”

Yesu a fhindula a ri, “Hune nda khou ya hone a si hune na nga kona u ntevhela zwino; ni ḓo ntevhela ngavhuya.”

₃₇Pitrosi a tshi fhindula a ri, “Muṋe washu, ndi mini tshine tsha nga nkundisa u vha tevhela zwino? Hufha na u fa ndo ḓiimisela u vha fela!”

₃₈Yesu a ri, “Ni ri no ḓiimisela u mpfela? Thetshelesani ndi ni vhudze: Mukukulume u sa athu lila ni ḓo vha no no landula luraru na ri a ni nnḓivhi.”